śrīmadvālmīkīya rāmāyaṇē bālakāṇḍam ।
atha pañchaviṃśassargaḥ ।
atha tasyāpramēyasya munērvachanamuttamam ।
śrutvā puruṣaśārdūlaḥ pratyuvācha śubhāṃ giram ॥ 1 ॥
alpavīryā yadā yakṣā śśrūyantē munipuṅgava ।
kathannāgasahasrasya dhārayatyabalā balam ॥ 2 ॥
viśvāmitrō'bravīdvākyaṃ śṛṇa yēna balōttarā ।
varadānakṛtaṃ vīryaṃ dhārayatyabalā balam ॥ 3 ॥
pūrvamāsīnmahāyakṣassukēturnāma vīryavān ।
anapatyaśśubhāchārassa cha tēpē mahattapaḥ ॥ 4 ॥
pitāmahastu suprītastasya yakṣapatē stadā ।
kanyāratnaṃ dadau rāma tāṭakāṃ nāma nāmataḥ ॥ 5 ॥
dadau nāgasahasrasya balaṃ chāsyāḥ pitāmahaḥ ।
natvēva putraṃ yakṣāya dadau brahmā mahāyaśāḥ ॥ 6 ॥
tāṃ tu jātāṃ vivardhantīṃ rūpayauvanaśālinīm ।
jharjhaputrāya sundāya dadau bhāryāṃ yaśasvinīm ॥ 7 ॥
kasyachittvatha kālasya yakṣī putramajāyata ।
mārīchaṃ nāma durdharṣaṃ yaśśāpādrākṣasō'bhavat ॥ 8 ॥
sundē tu nihatē rāma sāgastyamṛṣisattamam ।
tāṭakā saha putrēṇa pradharṣayitumichChati ॥ 9 ॥
bhakṣārthaṃ jātasaṃrambhā garjantī sābhyadhāvata ।
0 āpatantīṃ tu tāṃ dṛṣṭvā agastyō bhagavānṛṣiḥ ॥ 10 ॥
rākṣasatvaṃ bhajasvēti mārīchaṃ vyājahāra saḥ ।
1 agastyaḥ paramakruddhastāṭakāmapi śaptavān ॥ 11 ॥
puruṣādī mahāyakṣī virūpā vikṛtānanā ।
idaṃ rūpaṃ vihāyātha dāruṇaṃ rūpamastu tē ॥ 12 ॥
saiṣā śāpakṛtāmarṣā tāṭakā krōdhamūrChitā ।
dēśamutsādayatyēnamagastyacharitaṃ śubham ॥ 13 ॥
ēnāṃ rāghava durvṛttāṃ yakṣīṃ paramadāruṇām ।
gōbrāhmaṇahitārthāya jahi duṣṭaparākramām ॥ 14 ॥
na hyēnāṃ śāpasamspṛṣṭāṃ kaśchidutsahatē pumān ।
nihantuṃ triṣu lōkēṣu tvāmṛtē raghunandana ॥ 15 ॥
na hi tē strīvadhakṛtē ghṛṇā kāryā narōttama ।
chāturvaṇyahitārthāya kartavyaṃ rājasūnunā ॥ 16 ॥
nṛśaṃsamanṛśaṃsaṃ vā prajārakṣaṇakāraṇāt ।
pātakaṃ vā sadōṣaṃ vā kartavyaṃ rakṣatā satā ॥ 17 ॥
rājyabhāraniyuktānāmēṣa dharmassanātanaḥ ।
adharmyāṃ jahi kākutstha dharmōhyasyā na vidyatē ॥ 18 ॥
śrūyatē hi purā śakrō virōchanasutāṃ nṛpa ।
pṛthivīṃ hantumichChantīṃ mantharāmabhyasūdayat ॥ 19 ॥
viṣṇunāpi purā rāma bhṛgupatnī dṛḍhavratā ।
anindraṃ lōkamichChantī kāvyamātā niṣūditā ॥ 20 ॥
ētaiśchānyaiścha bahubhī rājaputra mahātmabhiḥ ।
adharmasahitā nāryō hatāḥ puruṣasattamaiḥ ॥ 21 ॥
ityārṣē śrīmadrāmāyaṇē vālmīkīya ādikāvyē bālakāṇḍē pañchaviṃśassargaḥ ॥
