śrīmadvālmīkīya rāmāyaṇē bālakāṇḍam ।
atha pañchamassargaḥ ।
. sarvā pūrvamiyaṃ yēṣāmāsītkṛtsnā vasundharā ।
prajāpatimupādāya nṛpāṇāṃ jayaśālinām ॥ 1 ॥
yēṣāṃ sa sagarō nāma sāgarō yēna khānitaḥ ।
ṣaṣṭiḥ putrasahasrāṇi yaṃ yāntaṃ paryavārayan ॥ 2 ॥
ikṣvākūṇāmidaṃ tēṣāṃ rājñāṃ vaṃśē mahātmanām ।
mahadutpannamākhyānaṃ rāmāyaṇamiti śrutam ॥ 3 ॥
tadidaṃ vartayiṣyāmi sarvaṃ nikhilamāditaḥ ।
dharmakāmārthasahitaṃ śrōtavyamanasūyayā ॥ 4 ॥
kōsalō nāma muditassphītō janapadō mahān ।
niviṣṭassarayūtīrē prabhūtadhanadhānyavān ॥ 5 ॥
ayōdhyā nāma nagarī tatrāsīllōkaviśrutā ।
manunā mānavēndrēṇa yā purī nirmitā svayam ॥ 6 ॥
āyatā daśa cha dvē cha yōjanāni mahāpurī ।
śrīmatī trīṇi vistīrṇā suvibhaktamahāpathā ॥ 7 ॥
rājamārgēṇa mahatā suvibhaktēna śōbhitā ।
muktapuṣpāvakīrṇēna jalasiktēna nityaśaḥ ॥ 8 ॥
tāṃ tu rājā daśarathō mahārāṣṭravivardhanaḥ ।
purīmāvāsayāmāsa divaṃ dēvapatiryathā ॥ 9 ॥
kavāṭatōraṇavatīṃ suvibhaktāntarāpaṇām ।
sarvayantrāyudhavatīmupētāṃ sarvaśilpibhiḥ ॥ 10 ॥
sūtamāgadhasambādhāṃ śrīmatīmatulaprabhām ।
uchchāṭṭāladhvajavatīṃ śataghnīśatasaṅkulām ॥ 11 ॥
vadhūnāṭakasaṅghaiścha saṃyuktāṃ sarvataḥ purīm ।
udyānāmravaṇōpētāṃ mahatīṃ sālamēkhalām ॥ 12 ॥
durgagambhīraparighāṃ durgāmanyairdurāsadām ।
vājivāraṇasampūrṇāṃ gōbhiruṣṭraiḥ kharaistathā ॥ 13 ॥
sāmantarājasaṅghaiścha balikarmabhirāvṛtām ।
nānādēśanivāsaiścha vaṇigbhirupaśōbhitām ॥ 14 ॥
prāsādai ratnavikṛtaiḥ parvatairupaśōbhitām ।
kūṭāgāraiścha sampūrṇāmindrasyēvāmarāvatīm ॥ 15 ॥
chitrāmaṣṭāpadākārāṃ naranārīgaṇairyutām ।
sarvaratnasamākīrṇāṃ vimānagṛhaśōbhitām ॥ 16 ॥
gṛhagāḍhāmavichChidrāṃ samabhūmau nivēśitām ।
śālitaṇḍulasampūrṇāmikṣukāṇḍarasōdakām ॥ 17 ॥
dundubhībhirmṛdaṅgaiścha vīṇābhiḥ paṇavaistathā ।
nāditāṃ bhṛśamatyarthaṃ pṛthivyāṃ tāmanuttamām ॥ 18 ॥
vimānamiva siddhānāṃ tapasādhigataṃ divi ।
sunivēśitavēśmāntāṃ narōttamasamāvṛtām ॥ 19 ॥
yē cha bāṇairna vidhyanti viviktamaparāparam ।
śabdavēdhyaṃ cha vitataṃ laghuhastā viśāradāḥ ॥ 20 ॥
siṃhavyāghravarāhāṇāṃ mattānāṃ nardatāṃ vanē ।
hantārō niśitaiśśastrairbalādbāhubalairapi ॥ 21 ॥
tādṛśānāṃ sahasraistāmabhipūrṇāṃ mahārathaiḥ ।
purīmāvāsayāmāsa rājā daśarathastadā ॥ 22 ॥
yē cha bāṇairna vidhyanti viviktamaparāparam ।
śabdavēdhyaṃ cha vitataṃ laghuhastā viśāradāḥ ॥ 23 ॥
siṃhavyāghravarāhāṇāṃ mattānāṃ nardatāṃ vanē ।
hantārō niśitaiśśastrairbalādbāhubalairapi ॥ 24 ॥
tādṛśānāṃ sahasraistāmabhipūrṇāṃ mahārathaiḥ ।
purīmāvāsayāmāsa rājā daśarathastadā ॥ 25 ॥
tāmagnimadbhirguṇavadbhirāvṛtāṃ dvijōttamairvēdaṣaḍaṅgapāragaiḥ ।
sahasradaissatyaratairmahātmabhi rmaharṣikalpai ṛṣibhiścha kēvalaiḥ ॥ 26 ॥
ityārṣē śrīmadrāmāyaṇē vālmīkīya ādikāvyē bālakāṇḍē pañchamassargaḥ ॥
