શ્રીમદ્વાલ્મીકીય રામાયણે બાલકાંડમ્ ।
અથ પંચમસ્સર્ગઃ ।
. સર્વા પૂર્વમિયં યેષામાસીત્કૃત્સ્ના વસુંધરા ।
પ્રજાપતિમુપાદાય નૃપાણાં જયશાલિનામ્ ॥ 1 ॥
યેષાં સ સગરો નામ સાગરો યેન ખાનિતઃ ।
ષષ્ટિઃ પુત્રસહસ્રાણિ યં યાંતં પર્યવારયન્ ॥ 2 ॥
ઇક્ષ્વાકૂણામિદં તેષાં રાજ્ઞાં વંશે મહાત્મનામ્ ।
મહદુત્પન્નમાખ્યાનં રામાયણમિતિ શ્રુતમ્ ॥ 3 ॥
તદિદં વર્તયિષ્યામિ સર્વં નિખિલમાદિતઃ ।
ધર્મકામાર્થસહિતં શ્રોતવ્યમનસૂયયા ॥ 4 ॥
કોસલો નામ મુદિતસ્સ્ફીતો જનપદો મહાન્ ।
નિવિષ્ટસ્સરયૂતીરે પ્રભૂતધનધાન્યવાન્ ॥ 5 ॥
અયોધ્યા નામ નગરી તત્રાસીલ્લોકવિશ્રુતા ।
મનુના માનવેંદ્રેણ યા પુરી નિર્મિતા સ્વયમ્ ॥ 6 ॥
આયતા દશ ચ દ્વે ચ યોજનાનિ મહાપુરી ।
શ્રીમતી ત્રીણિ વિસ્તીર્ણા સુવિભક્તમહાપથા ॥ 7 ॥
રાજમાર્ગેણ મહતા સુવિભક્તેન શોભિતા ।
મુક્તપુષ્પાવકીર્ણેન જલસિક્તેન નિત્યશઃ ॥ 8 ॥
તાં તુ રાજા દશરથો મહારાષ્ટ્રવિવર્ધનઃ ।
પુરીમાવાસયામાસ દિવં દેવપતિર્યથા ॥ 9 ॥
કવાટતોરણવતીં સુવિભક્તાંતરાપણામ્ ।
સર્વયંત્રાયુધવતીમુપેતાં સર્વશિલ્પિભિઃ ॥ 10 ॥
સૂતમાગધસંબાધાં શ્રીમતીમતુલપ્રભામ્ ।
ઉચ્ચાટ્ટાલધ્વજવતીં શતઘ્નીશતસંકુલામ્ ॥ 11 ॥
વધૂનાટકસંઘૈશ્ચ સંયુક્તાં સર્વતઃ પુરીમ્ ।
ઉદ્યાનામ્રવણોપેતાં મહતીં સાલમેખલામ્ ॥ 12 ॥
દુર્ગગંભીરપરિઘાં દુર્ગામન્યૈર્દુરાસદામ્ ।
વાજિવારણસંપૂર્ણાં ગોભિરુષ્ટ્રૈઃ ખરૈસ્તથા ॥ 13 ॥
સામંતરાજસંઘૈશ્ચ બલિકર્મભિરાવૃતામ્ ।
નાનાદેશનિવાસૈશ્ચ વણિગ્ભિરુપશોભિતામ્ ॥ 14 ॥
પ્રાસાદૈ રત્નવિકૃતૈઃ પર્વતૈરુપશોભિતામ્ ।
કૂટાગારૈશ્ચ સંપૂર્ણામિંદ્રસ્યેવામરાવતીમ્ ॥ 15 ॥
ચિત્રામષ્ટાપદાકારાં નરનારીગણૈર્યુતામ્ ।
સર્વરત્નસમાકીર્ણાં વિમાનગૃહશોભિતામ્ ॥ 16 ॥
ગૃહગાઢામવિચ્છિદ્રાં સમભૂમૌ નિવેશિતામ્ ।
શાલિતંડુલસંપૂર્ણામિક્ષુકાંડરસોદકામ્ ॥ 17 ॥
દુંદુભીભિર્મૃદંગૈશ્ચ વીણાભિઃ પણવૈસ્તથા ।
નાદિતાં ભૃશમત્યર્થં પૃથિવ્યાં તામનુત્તમામ્ ॥ 18 ॥
વિમાનમિવ સિદ્ધાનાં તપસાધિગતં દિવિ ।
સુનિવેશિતવેશ્માંતાં નરોત્તમસમાવૃતામ્ ॥ 19 ॥
યે ચ બાણૈર્ન વિધ્યંતિ વિવિક્તમપરાપરમ્ ।
શબ્દવેધ્યં ચ વિતતં લઘુહસ્તા વિશારદાઃ ॥ 20 ॥
સિંહવ્યાઘ્રવરાહાણાં મત્તાનાં નર્દતાં વને ।
હંતારો નિશિતૈશ્શસ્ત્રૈર્બલાદ્બાહુબલૈરપિ ॥ 21 ॥
તાદૃશાનાં સહસ્રૈસ્તામભિપૂર્ણાં મહારથૈઃ ।
પુરીમાવાસયામાસ રાજા દશરથસ્તદા ॥ 22 ॥
યે ચ બાણૈર્ન વિધ્યંતિ વિવિક્તમપરાપરમ્ ।
શબ્દવેધ્યં ચ વિતતં લઘુહસ્તા વિશારદાઃ ॥ 23 ॥
સિંહવ્યાઘ્રવરાહાણાં મત્તાનાં નર્દતાં વને ।
હંતારો નિશિતૈશ્શસ્ત્રૈર્બલાદ્બાહુબલૈરપિ ॥ 24 ॥
તાદૃશાનાં સહસ્રૈસ્તામભિપૂર્ણાં મહારથૈઃ ।
પુરીમાવાસયામાસ રાજા દશરથસ્તદા ॥ 25 ॥
તામગ્નિમદ્ભિર્ગુણવદ્ભિરાવૃતાં દ્વિજોત્તમૈર્વેદષડંગપારગૈઃ ।
સહસ્રદૈસ્સત્યરતૈર્મહાત્મભિ ર્મહર્ષિકલ્પૈ ઋષિભિશ્ચ કેવલૈઃ ॥ 26 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે પંચમસ્સર્ગઃ ॥
