ശ്രീമദ്വാല്മീകീയ രാമായണേ ബാലകാംഡമ് ।
അഥ പംചമസ്സര്ഗഃ ।
. സർവാ പൂർവമിയം യേഷാമാസീത്കൃത്സ്നാ വസുംധരാ ।
പ്രജാപതിമുപാദായ നൃപാണാം ജയശാലിനാമ് ॥ 1 ॥
യേഷാം സ സഗരോ നാമ സാഗരോ യേന ഖാനിതഃ ।
ഷഷ്ടിഃ പുത്രസഹസ്രാണി യം യാംതം പര്യവാരയന് ॥ 2 ॥
ഇക്ഷ്വാകൂണാമിദം തേഷാം രാജ്ഞാം വംശേ മഹാത്മനാമ് ।
മഹദുത്പന്നമാഖ്യാനം രാമായണമിതി ശ്രുതമ് ॥ 3 ॥
തദിദം വര്തയിഷ്യാമി സർവം നിഖിലമാദിതഃ ।
ധര്മകാമാര്ഥസഹിതം ശ്രോതവ്യമനസൂയയാ ॥ 4 ॥
കോസലോ നാമ മുദിതസ്സ്ഫീതോ ജനപദോ മഹാന് ।
നിവിഷ്ടസ്സരയൂതീരേ പ്രഭൂതധനധാന്യവാന് ॥ 5 ॥
അയോധ്യാ നാമ നഗരീ തത്രാസീല്ലോകവിശ്രുതാ ।
മനുനാ മാനവേംദ്രേണ യാ പുരീ നിര്മിതാ സ്വയമ് ॥ 6 ॥
ആയതാ ദശ ച ദ്വേ ച യോജനാനി മഹാപുരീ ।
ശ്രീമതീ ത്രീണി വിസ്തീര്ണാ സുവിഭക്തമഹാപഥാ ॥ 7 ॥
രാജമാര്ഗേണ മഹതാ സുവിഭക്തേന ശോഭിതാ ।
മുക്തപുഷ്പാവകീര്ണേന ജലസിക്തേന നിത്യശഃ ॥ 8 ॥
താം തു രാജാ ദശരഥോ മഹാരാഷ്ട്രവിവര്ധനഃ ।
പുരീമാവാസയാമാസ ദിവം ദേവപതിര്യഥാ ॥ 9 ॥
കവാടതോരണവതീം സുവിഭക്താംതരാപണാമ് ।
സർവയംത്രായുധവതീമുപേതാം സർവശില്പിഭിഃ ॥ 10 ॥
സൂതമാഗധസംബാധാം ശ്രീമതീമതുലപ്രഭാമ് ।
ഉച്ചാട്ടാലധ്വജവതീം ശതഘ്നീശതസംകുലാമ് ॥ 11 ॥
വധൂനാടകസംഘൈശ്ച സംയുക്താം സർവതഃ പുരീമ് ।
ഉദ്യാനാമ്രവണോപേതാം മഹതീം സാലമേഖലാമ് ॥ 12 ॥
ദുര്ഗഗംഭീരപരിഘാം ദുര്ഗാമന്യൈര്ദുരാസദാമ് ।
വാജിവാരണസംപൂര്ണാം ഗോഭിരുഷ്ട്രൈഃ ഖരൈസ്തഥാ ॥ 13 ॥
സാമംതരാജസംഘൈശ്ച ബലികര്മഭിരാവൃതാമ് ।
നാനാദേശനിവാസൈശ്ച വണിഗ്ഭിരുപശോഭിതാമ് ॥ 14 ॥
പ്രാസാദൈ രത്നവികൃതൈഃ പർവതൈരുപശോഭിതാമ് ।
കൂടാഗാരൈശ്ച സംപൂര്ണാമിംദ്രസ്യേവാമരാവതീമ് ॥ 15 ॥
ചിത്രാമഷ്ടാപദാകാരാം നരനാരീഗണൈര്യുതാമ് ।
സർവരത്നസമാകീര്ണാം വിമാനഗൃഹശോഭിതാമ് ॥ 16 ॥
ഗൃഹഗാഢാമവിച്ഛിദ്രാം സമഭൂമൌ നിവേശിതാമ് ।
ശാലിതംഡുലസംപൂര്ണാമിക്ഷുകാംഡരസോദകാമ് ॥ 17 ॥
ദുംദുഭീഭിര്മൃദംഗൈശ്ച വീണാഭിഃ പണവൈസ്തഥാ ।
നാദിതാം ഭൃശമത്യര്ഥം പൃഥിവ്യാം താമനുത്തമാമ് ॥ 18 ॥
വിമാനമിവ സിദ്ധാനാം തപസാധിഗതം ദിവി ।
സുനിവേശിതവേശ്മാംതാം നരോത്തമസമാവൃതാമ് ॥ 19 ॥
യേ ച ബാണൈര്ന വിധ്യംതി വിവിക്തമപരാപരമ് ।
ശബ്ദവേധ്യം ച വിതതം ലഘുഹസ്താ വിശാരദാഃ ॥ 20 ॥
സിംഹവ്യാഘ്രവരാഹാണാം മത്താനാം നര്ദതാം വനേ ।
ഹംതാരോ നിശിതൈശ്ശസ്ത്രൈര്ബലാദ്ബാഹുബലൈരപി ॥ 21 ॥
താദൃശാനാം സഹസ്രൈസ്താമഭിപൂര്ണാം മഹാരഥൈഃ ।
പുരീമാവാസയാമാസ രാജാ ദശരഥസ്തദാ ॥ 22 ॥
യേ ച ബാണൈര്ന വിധ്യംതി വിവിക്തമപരാപരമ് ।
ശബ്ദവേധ്യം ച വിതതം ലഘുഹസ്താ വിശാരദാഃ ॥ 23 ॥
സിംഹവ്യാഘ്രവരാഹാണാം മത്താനാം നര്ദതാം വനേ ।
ഹംതാരോ നിശിതൈശ്ശസ്ത്രൈര്ബലാദ്ബാഹുബലൈരപി ॥ 24 ॥
താദൃശാനാം സഹസ്രൈസ്താമഭിപൂര്ണാം മഹാരഥൈഃ ।
പുരീമാവാസയാമാസ രാജാ ദശരഥസ്തദാ ॥ 25 ॥
താമഗ്നിമദ്ഭിര്ഗുണവദ്ഭിരാവൃതാം ദ്വിജോത്തമൈർവേദഷഡംഗപാരഗൈഃ ।
സഹസ്രദൈസ്സത്യരതൈര്മഹാത്മഭി ര്മഹര്ഷികല്പൈ ഋഷിഭിശ്ച കേവലൈഃ ॥ 26 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ പംചമസ്സര്ഗഃ ॥
