ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଷଟ୍ପଂଚାଶସ୍ସର୍ଗଃ ।
ଏଵମୁକ୍ତୋ ଵସିଷ୍ଠେନ ଵିଶ୍ଵାମିତ୍ରୋ ମହାବଲଃ ।
ଆଗ୍ନେୟମସ୍ତ୍ରମୁତ୍କ୍ଷିପ୍ୟ ତିଷ୍ଠ ତିଷ୍ଠେତି ଚାବ୍ରଵୀତ୍ ॥ 1 ॥
ବ୍ରହ୍ମଦଂଡଂ ସମୁତ୍କ୍ଷିପ୍ୟ କାଲଦଂଡମିଵାଽପରମ୍ ।
ଵସିଷ୍ଠୋ ଭଗଵାନ୍ କ୍ରୋଧାଦିଦଂ ଵଚନମବ୍ରଵୀତ୍ ॥ 2 ॥
କ୍ଷତ୍ରବଂଧୋ ସ୍ଥିତୋସ୍ମ୍ୟେଷ ୟଦ୍ବଲଂ ତଦ୍ଵିଦର୍ଶୟ ।
ନାଶୟାମ୍ୟଦ୍ୟ ତେ ଦର୍ପଂ ଶସ୍ତ୍ରସ୍ୟ ତଵ ଗାଧିଜ ॥ 3 ॥
କ୍ଵ ଚ ତେ କ୍ଷତ୍ରିୟବଲଂ କ୍ଵ ଚ ବ୍ରହ୍ମବଲଂ ମହତ୍ ।
ପଶ୍ୟ ବ୍ରହ୍ମବଲଂ ଦିଵ୍ୟଂ ମମ କ୍ଷତ୍ରିୟପାଂସନ ॥ 4 ॥
ତସ୍ୟାସ୍ତ୍ରଂ ଗାଧିପୁତ୍ରସ୍ୟ ଘୋରମାଗ୍ନେୟମୁଦ୍ୟତମ୍ ।
ବ୍ରହ୍ମଦଂଡେନ ତଚ୍ଛାଂତମଗ୍ନେର୍ଵେଗ ଇଵାଂଭସା ॥ 5 ॥
ଵାରୁଣଂ ଚୈଵ ରୌଦ୍ରଂ ଚ ଐଂଦ୍ରଂ ପାଶୁପତଂ ତଥା ।
ଐଷୀକଂ ଚାପି ଚିକ୍ଷେପ କୁପିତୋ ଗାଧିନଂଦନଃ ॥ 6 ॥
ମାନଵଂ ମୋହନଂ ଚୈଵ ଗାଂଧର୍ଵଂ ସ୍ଵାପନଂ ତଥା ।
ଜୃଂଭଣଂ ମାଦନଂ ଚୈଵ ସଂତାପନଵିଲାପନେ ॥ 7 ॥
ଶୋଷଣଂ ଦାରଣଂ ଚୈଵ ଵଜ୍ରମସ୍ତ୍ରଂ ସୁଦୁର୍ଜୟମ୍ ।
ବ୍ରହ୍ମପାଶଂ କାଲପାଶଂ ଵାରୁଣଂ ପାଶମେଵ ଚ ॥ 8 ॥
ପୈନାକାସ୍ତ୍ରଂ ଚ ଦୟିତଂ ଶୁଷ୍କାର୍ଦ୍ରେ ଅଶନୀ ଉଭେ ।
ଦଂଡାସ୍ତ୍ରମଥ ପୈଶାଚଂ କ୍ରୌଂଚମସ୍ତ୍ରଂ ତଥୈଵ ଚ ॥ 9 ॥
ଧର୍ମଚକ୍ରଂ କାଲଚକ୍ରଂ ଵିଷ୍ଣୁଚକ୍ରଂ ତଥୈଵ ଚ ।
ଵାୟଵ୍ୟଂ ମଥନଂ ଚୈଵ ଅସ୍ତ୍ରଂ ହୟଶିରସ୍ତଥା ॥ 10 ॥
ଶକ୍ତିଦ୍ଵୟଂ ଚ ଚିକ୍ଷେପ କଂକାଲଂ ମୁସଲଂ ତଥା ।
560 ଵୈଦ୍ୟାଧରଂ ମହାସ୍ତ୍ରଂ ଚ କାଲାସ୍ତ୍ରମଥ ଦାରୁଣମ୍ ॥ 11 ॥
ତ୍ରିଶୂଲମସ୍ତ୍ରଂ ଘୋରଂ ଚ କାପାଲମଥ କଂକଣମ୍ ।
ଏତାନ୍ୟସ୍ତ୍ରାଣି ଚିକ୍ଷେପ ସର୍ଵାଣି ରଘୁନଂଦନ ॥ 12 ॥
ଵସିଷ୍ଠେ ଜପତାଂ ଶ୍ରେଷ୍ଠେ ତଦଦ୍ଭୁତମିଵାଭଵତ୍ ।
ତାନି ସର୍ଵାଣି ଦଂଡେନ ଗ୍ରସତେ ବ୍ରହ୍ମଣସ୍ସୁତଃ ॥ 13 ॥
ତେଷୁ ଶାଂତେଷୁ ବ୍ରହ୍ମାସ୍ତ୍ରଂ କ୍ଷିପ୍ତଵାନ୍ ଗାଧିନଂଦନଃ ।
ତଦସ୍ତ୍ରମୁଦ୍ୟତଂ ଦୃଷ୍ଟ୍ଵା ଦେଵାସ୍ସାଗ୍ନିପୁରୋଗମାଃ ॥ 14 ॥
ଦେଵର୍ଷୟଶ୍ଚ ସଂଭ୍ରାଂତାଗଂଧର୍ଵାସ୍ସମହୋରଗାଃ ।
ତ୍ରୈଲୋକ୍ୟମାସୀତ୍ସଂତପ୍ତଂ ବ୍ରହ୍ମାସ୍ତ୍ରେ ସମୁଦୀରିତେ ॥ 15 ॥
ତଦପ୍ୟସ୍ତ୍ରଂ ମହାଘୋରଂ ବ୍ରହ୍ମଂ ବ୍ରାହ୍ମେଣ ତେଜସା ।
ଵସିଷ୍ଠୋ ଗ୍ରସତେ ସର୍ଵଂ ବ୍ରହ୍ମଦଂଡେନ ରାଘଵ ॥ 16 ॥
ବ୍ରହ୍ମାସ୍ତ୍ରଂ ଗ୍ରସମାନସ୍ୟ ଵସିଷ୍ଠସ୍ୟ ମହାତ୍ମନଃ ।
ତ୍ରୈଲୋକ୍ୟମୋହନଂ ରୌଦ୍ରଂ ରୂପମାସୀତ୍ସୁଦାରୁଣମ୍ ॥ 17 ॥
ରୋମକୂପେଷୁ ସର୍ଵେଷୁ ଵସିଷ୍ଠସ୍ୟ ମହାତ୍ମନଃ ।
ମରୀଚ୍ୟ ଇଵ ନିଷ୍ପେତୁରଗ୍ନେର୍ଧୂମାକୁଲାର୍ଚିଷଃ ॥ 18 ॥
ପ୍ରାଜ୍ଵଲଦ୍ବ୍ରହ୍ମଦଂଡଶ୍ଚ ଵସିଷ୍ଠସ୍ୟ କରୋଦ୍ୟତଃ ।
ଵିଧୂମ ଇଵ କାଲାଗ୍ନିର୍ୟମଦଂଡ ଇଵାପରଃ ॥ 19 ॥
ତତୋଽସ୍ତୁଵନ୍ ମୁନିଗଣା ଵସିଷ୍ଠଂ ଜପତାଂ ଵରମ୍ ।
ଅମୋଘଂ ତେ ବଲଂ ବ୍ରହ୍ମନ୍ ତେଜୋ ଧାରୟ ତେଜସା ॥ 20 ॥
ନିଗୃହୀତସ୍ତ୍ଵୟା ବ୍ରହ୍ମନ୍ ଵିଶ୍ଵାମିତ୍ରୋ ମହାତପାଃ ।
ପ୍ରସୀଦ ଜପତାଂ ଶ୍ରେଷ୍ଠ ଲୋକାସ୍ସଂତୁ ଗତଵ୍ୟଥାଃ ॥ 21 ॥
ଏଵମୁକ୍ତୋ ମହାତେଜାଶ୍ଶମଂ ଚକ୍ରେ ମହାତପାଃ ।
ଵିଶ୍ଵାମିତ୍ରୋଽପି ନିକୃତୋ ଵିନିଶ୍ଵସ୍ୟେଦମବ୍ରଵୀତ୍ ॥ 22 ॥
ଧିଗ୍ବଲଂ କ୍ଷତ୍ରିୟବଲଂ ବ୍ରହ୍ମତେଜୋ ବଲଂ ବଲମ୍ ।
ଏକେନ ବ୍ରହ୍ମଦଂଡେନ ସର୍ଵାସ୍ତ୍ରାଣି ହତାନି ମେ ॥ 23 ॥
ତଦେତତ୍ସମଵେକ୍ଷ୍ୟାହଂ ପ୍ରସନ୍ନେଂଦ୍ରିୟମାନସଃ ।
ତପୋ ମହତ୍ସମାସ୍ଥାସ୍ୟେ ୟଦ୍ଵୈ ବ୍ରହ୍ମତ୍ଵକାରଣମ୍ ॥ 24 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଷଟ୍ପଂଚାଶସ୍ସର୍ଗଃ ॥
