ശ്രീമദ്വാല്മീകീയ രാമായണേ ബാലകാംഡമ് ।
അഥ ഷട്പംചാശസ്സര്ഗഃ ।
ഏവമുക്തോ വസിഷ്ഠേന വിശ്വാമിത്രോ മഹാബലഃ ।
ആഗ്നേയമസ്ത്രമുത്ക്ഷിപ്യ തിഷ്ഠ തിഷ്ഠേതി ചാബ്രവീത് ॥ 1 ॥
ബ്രഹ്മദംഡം സമുത്ക്ഷിപ്യ കാലദംഡമിവാഽപരമ് ।
വസിഷ്ഠോ ഭഗവാന് ക്രോധാദിദം വചനമബ്രവീത് ॥ 2 ॥
ക്ഷത്രബംധോ സ്ഥിതോസ്മ്യേഷ യദ്ബലം തദ്വിദര്ശയ ।
നാശയാമ്യദ്യ തേ ദര്പം ശസ്ത്രസ്യ തവ ഗാധിജ ॥ 3 ॥
ക്വ ച തേ ക്ഷത്രിയബലം ക്വ ച ബ്രഹ്മബലം മഹത് ।
പശ്യ ബ്രഹ്മബലം ദിവ്യം മമ ക്ഷത്രിയപാംസന ॥ 4 ॥
തസ്യാസ്ത്രം ഗാധിപുത്രസ്യ ഘോരമാഗ്നേയമുദ്യതമ് ।
ബ്രഹ്മദംഡേന തച്ഛാംതമഗ്നേർവേഗ ഇവാംഭസാ ॥ 5 ॥
വാരുണം ചൈവ രൌദ്രം ച ഐംദ്രം പാശുപതം തഥാ ।
ഐഷീകം ചാപി ചിക്ഷേപ കുപിതോ ഗാധിനംദനഃ ॥ 6 ॥
മാനവം മോഹനം ചൈവ ഗാംധർവം സ്വാപനം തഥാ ।
ജൃംഭണം മാദനം ചൈവ സംതാപനവിലാപനേ ॥ 7 ॥
ശോഷണം ദാരണം ചൈവ വജ്രമസ്ത്രം സുദുര്ജയമ് ।
ബ്രഹ്മപാശം കാലപാശം വാരുണം പാശമേവ ച ॥ 8 ॥
പൈനാകാസ്ത്രം ച ദയിതം ശുഷ്കാര്ദ്രേ അശനീ ഉഭേ ।
ദംഡാസ്ത്രമഥ പൈശാചം ക്രൌംചമസ്ത്രം തഥൈവ ച ॥ 9 ॥
ധര്മചക്രം കാലചക്രം വിഷ്ണുചക്രം തഥൈവ ച ।
വായവ്യം മഥനം ചൈവ അസ്ത്രം ഹയശിരസ്തഥാ ॥ 10 ॥
ശക്തിദ്വയം ച ചിക്ഷേപ കംകാലം മുസലം തഥാ ।
560 വൈദ്യാധരം മഹാസ്ത്രം ച കാലാസ്ത്രമഥ ദാരുണമ് ॥ 11 ॥
ത്രിശൂലമസ്ത്രം ഘോരം ച കാപാലമഥ കംകണമ് ।
ഏതാന്യസ്ത്രാണി ചിക്ഷേപ സർവാണി രഘുനംദന ॥ 12 ॥
വസിഷ്ഠേ ജപതാം ശ്രേഷ്ഠേ തദദ്ഭുതമിവാഭവത് ।
താനി സർവാണി ദംഡേന ഗ്രസതേ ബ്രഹ്മണസ്സുതഃ ॥ 13 ॥
തേഷു ശാംതേഷു ബ്രഹ്മാസ്ത്രം ക്ഷിപ്തവാന് ഗാധിനംദനഃ ।
തദസ്ത്രമുദ്യതം ദൃഷ്ട്വാ ദേവാസ്സാഗ്നിപുരോഗമാഃ ॥ 14 ॥
ദേവര്ഷയശ്ച സംഭ്രാംതാഗംധർവാസ്സമഹോരഗാഃ ।
ത്രൈലോക്യമാസീത്സംതപ്തം ബ്രഹ്മാസ്ത്രേ സമുദീരിതേ ॥ 15 ॥
തദപ്യസ്ത്രം മഹാഘോരം ബ്രഹ്മം ബ്രാഹ്മേണ തേജസാ ।
വസിഷ്ഠോ ഗ്രസതേ സർവം ബ്രഹ്മദംഡേന രാഘവ ॥ 16 ॥
ബ്രഹ്മാസ്ത്രം ഗ്രസമാനസ്യ വസിഷ്ഠസ്യ മഹാത്മനഃ ।
ത്രൈലോക്യമോഹനം രൌദ്രം രൂപമാസീത്സുദാരുണമ് ॥ 17 ॥
രോമകൂപേഷു സർവേഷു വസിഷ്ഠസ്യ മഹാത്മനഃ ।
മരീച്യ ഇവ നിഷ്പേതുരഗ്നേര്ധൂമാകുലാര്ചിഷഃ ॥ 18 ॥
പ്രാജ്വലദ്ബ്രഹ്മദംഡശ്ച വസിഷ്ഠസ്യ കരോദ്യതഃ ।
വിധൂമ ഇവ കാലാഗ്നിര്യമദംഡ ഇവാപരഃ ॥ 19 ॥
തതോഽസ്തുവന് മുനിഗണാ വസിഷ്ഠം ജപതാം വരമ് ।
അമോഘം തേ ബലം ബ്രഹ്മന് തേജോ ധാരയ തേജസാ ॥ 20 ॥
നിഗൃഹീതസ്ത്വയാ ബ്രഹ്മന് വിശ്വാമിത്രോ മഹാതപാഃ ।
പ്രസീദ ജപതാം ശ്രേഷ്ഠ ലോകാസ്സംതു ഗതവ്യഥാഃ ॥ 21 ॥
ഏവമുക്തോ മഹാതേജാശ്ശമം ചക്രേ മഹാതപാഃ ।
വിശ്വാമിത്രോഽപി നികൃതോ വിനിശ്വസ്യേദമബ്രവീത് ॥ 22 ॥
ധിഗ്ബലം ക്ഷത്രിയബലം ബ്രഹ്മതേജോ ബലം ബലമ് ।
ഏകേന ബ്രഹ്മദംഡേന സർവാസ്ത്രാണി ഹതാനി മേ ॥ 23 ॥
തദേതത്സമവേക്ഷ്യാഹം പ്രസന്നേംദ്രിയമാനസഃ ।
തപോ മഹത്സമാസ്ഥാസ്യേ യദ്വൈ ബ്രഹ്മത്വകാരണമ് ॥ 24 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ഷട്പംചാശസ്സര്ഗഃ ॥
