શ્રીમદ્વાલ્મીકીય રામાયણે બાલકાંડમ્ ।
અથ ષટ્પંચાશસ્સર્ગઃ ।
એવમુક્તો વસિષ્ઠેન વિશ્વામિત્રો મહાબલઃ ।
આગ્નેયમસ્ત્રમુત્ક્ષિપ્ય તિષ્ઠ તિષ્ઠેતિ ચાબ્રવીત્ ॥ 1 ॥
બ્રહ્મદંડં સમુત્ક્ષિપ્ય કાલદંડમિવાઽપરમ્ ।
વસિષ્ઠો ભગવાન્ ક્રોધાદિદં વચનમબ્રવીત્ ॥ 2 ॥
ક્ષત્રબંધો સ્થિતોસ્મ્યેષ યદ્બલં તદ્વિદર્શય ।
નાશયામ્યદ્ય તે દર્પં શસ્ત્રસ્ય તવ ગાધિજ ॥ 3 ॥
ક્વ ચ તે ક્ષત્રિયબલં ક્વ ચ બ્રહ્મબલં મહત્ ।
પશ્ય બ્રહ્મબલં દિવ્યં મમ ક્ષત્રિયપાંસન ॥ 4 ॥
તસ્યાસ્ત્રં ગાધિપુત્રસ્ય ઘોરમાગ્નેયમુદ્યતમ્ ।
બ્રહ્મદંડેન તચ્છાંતમગ્નેર્વેગ ઇવાંભસા ॥ 5 ॥
વારુણં ચૈવ રૌદ્રં ચ ઐંદ્રં પાશુપતં તથા ।
ઐષીકં ચાપિ ચિક્ષેપ કુપિતો ગાધિનંદનઃ ॥ 6 ॥
માનવં મોહનં ચૈવ ગાંધર્વં સ્વાપનં તથા ।
જૃંભણં માદનં ચૈવ સંતાપનવિલાપને ॥ 7 ॥
શોષણં દારણં ચૈવ વજ્રમસ્ત્રં સુદુર્જયમ્ ।
બ્રહ્મપાશં કાલપાશં વારુણં પાશમેવ ચ ॥ 8 ॥
પૈનાકાસ્ત્રં ચ દયિતં શુષ્કાર્દ્રે અશની ઉભે ।
દંડાસ્ત્રમથ પૈશાચં ક્રૌંચમસ્ત્રં તથૈવ ચ ॥ 9 ॥
ધર્મચક્રં કાલચક્રં વિષ્ણુચક્રં તથૈવ ચ ।
વાયવ્યં મથનં ચૈવ અસ્ત્રં હયશિરસ્તથા ॥ 10 ॥
શક્તિદ્વયં ચ ચિક્ષેપ કંકાલં મુસલં તથા ।
560 વૈદ્યાધરં મહાસ્ત્રં ચ કાલાસ્ત્રમથ દારુણમ્ ॥ 11 ॥
ત્રિશૂલમસ્ત્રં ઘોરં ચ કાપાલમથ કંકણમ્ ।
એતાન્યસ્ત્રાણિ ચિક્ષેપ સર્વાણિ રઘુનંદન ॥ 12 ॥
વસિષ્ઠે જપતાં શ્રેષ્ઠે તદદ્ભુતમિવાભવત્ ।
તાનિ સર્વાણિ દંડેન ગ્રસતે બ્રહ્મણસ્સુતઃ ॥ 13 ॥
તેષુ શાંતેષુ બ્રહ્માસ્ત્રં ક્ષિપ્તવાન્ ગાધિનંદનઃ ।
તદસ્ત્રમુદ્યતં દૃષ્ટ્વા દેવાસ્સાગ્નિપુરોગમાઃ ॥ 14 ॥
દેવર્ષયશ્ચ સંભ્રાંતાગંધર્વાસ્સમહોરગાઃ ।
ત્રૈલોક્યમાસીત્સંતપ્તં બ્રહ્માસ્ત્રે સમુદીરિતે ॥ 15 ॥
તદપ્યસ્ત્રં મહાઘોરં બ્રહ્મં બ્રાહ્મેણ તેજસા ।
વસિષ્ઠો ગ્રસતે સર્વં બ્રહ્મદંડેન રાઘવ ॥ 16 ॥
બ્રહ્માસ્ત્રં ગ્રસમાનસ્ય વસિષ્ઠસ્ય મહાત્મનઃ ।
ત્રૈલોક્યમોહનં રૌદ્રં રૂપમાસીત્સુદારુણમ્ ॥ 17 ॥
રોમકૂપેષુ સર્વેષુ વસિષ્ઠસ્ય મહાત્મનઃ ।
મરીચ્ય ઇવ નિષ્પેતુરગ્નેર્ધૂમાકુલાર્ચિષઃ ॥ 18 ॥
પ્રાજ્વલદ્બ્રહ્મદંડશ્ચ વસિષ્ઠસ્ય કરોદ્યતઃ ।
વિધૂમ ઇવ કાલાગ્નિર્યમદંડ ઇવાપરઃ ॥ 19 ॥
તતોઽસ્તુવન્ મુનિગણા વસિષ્ઠં જપતાં વરમ્ ।
અમોઘં તે બલં બ્રહ્મન્ તેજો ધારય તેજસા ॥ 20 ॥
નિગૃહીતસ્ત્વયા બ્રહ્મન્ વિશ્વામિત્રો મહાતપાઃ ।
પ્રસીદ જપતાં શ્રેષ્ઠ લોકાસ્સંતુ ગતવ્યથાઃ ॥ 21 ॥
એવમુક્તો મહાતેજાશ્શમં ચક્રે મહાતપાઃ ।
વિશ્વામિત્રોઽપિ નિકૃતો વિનિશ્વસ્યેદમબ્રવીત્ ॥ 22 ॥
ધિગ્બલં ક્ષત્રિયબલં બ્રહ્મતેજો બલં બલમ્ ।
એકેન બ્રહ્મદંડેન સર્વાસ્ત્રાણિ હતાનિ મે ॥ 23 ॥
તદેતત્સમવેક્ષ્યાહં પ્રસન્નેંદ્રિયમાનસઃ ।
તપો મહત્સમાસ્થાસ્યે યદ્વૈ બ્રહ્મત્વકારણમ્ ॥ 24 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે ષટ્પંચાશસ્સર્ગઃ ॥
