ශ්රීමද්වාල්මීකීය රාමායණේ බාලකාංඩම් ।
අථ ෂට්පංචාශස්සර්ගඃ ।
ඒවමුක්තෝ වසිෂ්ඨේන විශ්වාමිත්රෝ මහාබලඃ ।
ආග්නේයමස්ත්රමුත්ක්ෂිප්ය තිෂ්ඨ තිෂ්ඨේති චාබ්රවීත් ॥ 1 ॥
බ්රහ්මදංඩං සමුත්ක්ෂිප්ය කාලදංඩමිවාऽපරම් ।
වසිෂ්ඨෝ භගවාන් ක්රෝධාදිදං වචනමබ්රවීත් ॥ 2 ॥
ක්ෂත්රබංධෝ ස්ථිතෝස්ම්යේෂ යද්බලං තද්විදර්ශය ।
නාශයාම්යද්ය තේ දර්පං ශස්ත්රස්ය තව ගාධිජ ॥ 3 ॥
ක්ව ච තේ ක්ෂත්රියබලං ක්ව ච බ්රහ්මබලං මහත් ।
පශ්ය බ්රහ්මබලං දිව්යං මම ක්ෂත්රියපාංසන ॥ 4 ॥
තස්යාස්ත්රං ගාධිපුත්රස්ය ඝෝරමාග්නේයමුද්යතම් ।
බ්රහ්මදංඩේන තච්ඡාංතමග්නේර්වේග ඉවාංභසා ॥ 5 ॥
වාරුණං චෛව රෞද්රං ච ඓංද්රං පාශුපතං තථා ।
ඓෂීකං චාපි චික්ෂේප කුපිතෝ ගාධිනංදනඃ ॥ 6 ॥
මානවං මෝහනං චෛව ගාංධර්වං ස්වාපනං තථා ।
ජෘංභණං මාදනං චෛව සංතාපනවිලාපනේ ॥ 7 ॥
ශෝෂණං දාරණං චෛව වජ්රමස්ත්රං සුදුර්ජයම් ।
බ්රහ්මපාශං කාලපාශං වාරුණං පාශමේව ච ॥ 8 ॥
පෛනාකාස්ත්රං ච දයිතං ශුෂ්කාර්ද්රේ අශනී උභේ ।
දංඩාස්ත්රමථ පෛශාචං ක්රෞංචමස්ත්රං තථෛව ච ॥ 9 ॥
ධර්මචක්රං කාලචක්රං විෂ්ණුචක්රං තථෛව ච ।
වායව්යං මථනං චෛව අස්ත්රං හයශිරස්තථා ॥ 10 ॥
ශක්තිද්වයං ච චික්ෂේප කංකාලං මුසලං තථා ।
560 වෛද්යාධරං මහාස්ත්රං ච කාලාස්ත්රමථ දාරුණම් ॥ 11 ॥
ත්රිශූලමස්ත්රං ඝෝරං ච කාපාලමථ කංකණම් ।
ඒතාන්යස්ත්රාණි චික්ෂේප සර්වාණි රඝුනංදන ॥ 12 ॥
වසිෂ්ඨේ ජපතාං ශ්රේෂ්ඨේ තදද්භුතමිවාභවත් ।
තානි සර්වාණි දංඩේන ග්රසතේ බ්රහ්මණස්සුතඃ ॥ 13 ॥
තේෂු ශාංතේෂු බ්රහ්මාස්ත්රං ක්ෂිප්තවාන් ගාධිනංදනඃ ।
තදස්ත්රමුද්යතං දෘෂ්ට්වා දේවාස්සාග්නිපුරෝගමාඃ ॥ 14 ॥
දේවර්ෂයශ්ච සංභ්රාංතාගංධර්වාස්සමහෝරගාඃ ।
ත්රෛලෝක්යමාසීත්සංතප්තං බ්රහ්මාස්ත්රේ සමුදීරිතේ ॥ 15 ॥
තදප්යස්ත්රං මහාඝෝරං බ්රහ්මං බ්රාහ්මේණ තේජසා ।
වසිෂ්ඨෝ ග්රසතේ සර්වං බ්රහ්මදංඩේන රාඝව ॥ 16 ॥
බ්රහ්මාස්ත්රං ග්රසමානස්ය වසිෂ්ඨස්ය මහාත්මනඃ ।
ත්රෛලෝක්යමෝහනං රෞද්රං රූපමාසීත්සුදාරුණම් ॥ 17 ॥
රෝමකූපේෂු සර්වේෂු වසිෂ්ඨස්ය මහාත්මනඃ ।
මරීච්ය ඉව නිෂ්පේතුරග්නේර්ධූමාකුලාර්චිෂඃ ॥ 18 ॥
ප්රාජ්වලද්බ්රහ්මදංඩශ්ච වසිෂ්ඨස්ය කරෝද්යතඃ ।
විධූම ඉව කාලාග්නිර්යමදංඩ ඉවාපරඃ ॥ 19 ॥
තතෝऽස්තුවන් මුනිගණා වසිෂ්ඨං ජපතාං වරම් ।
අමෝඝං තේ බලං බ්රහ්මන් තේජෝ ධාරය තේජසා ॥ 20 ॥
නිගෘහීතස්ත්වයා බ්රහ්මන් විශ්වාමිත්රෝ මහාතපාඃ ।
ප්රසීද ජපතාං ශ්රේෂ්ඨ ලෝකාස්සංතු ගතව්යථාඃ ॥ 21 ॥
ඒවමුක්තෝ මහාතේජාශ්ශමං චක්රේ මහාතපාඃ ।
විශ්වාමිත්රෝऽපි නිකෘතෝ විනිශ්වස්යේදමබ්රවීත් ॥ 22 ॥
ධිග්බලං ක්ෂත්රියබලං බ්රහ්මතේජෝ බලං බලම් ।
ඒකේන බ්රහ්මදංඩේන සර්වාස්ත්රාණි හතානි මේ ॥ 23 ॥
තදේතත්සමවේක්ෂ්යාහං ප්රසන්නේංද්රියමානසඃ ।
තපෝ මහත්සමාස්ථාස්යේ යද්වෛ බ්රහ්මත්වකාරණම් ॥ 24 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ෂට්පංචාශස්සර්ගඃ ॥
