ஶ்ரீமத்³வால்மீகீய ராமாயணே பா³லகாண்ட³ம் ।
அத² ஷட்பஞ்சாஶஸ்ஸர்க:³ ।
ஏவமுக்தோ வஸிஷ்டே²ன விஶ்வாமித்ரோ மஹாப³ல: ।
ஆக்³னேயமஸ்த்ரமுத்க்ஷிப்ய திஷ்ட² திஷ்டே²தி சாப்³ரவீத் ॥ 1 ॥
ப்³ரஹ்மத³ண்ட³ம் ஸமுத்க்ஷிப்ய காலத³ண்ட³மிவாபரம் ।
வஸிஷ்டோ² ப⁴க³வான் க்ரோதா⁴தி³த³ம் வசனமப்³ரவீத் ॥ 2 ॥
க்ஷத்ரப³ந்தோ⁴ ஸ்தி²தோஸ்ம்யேஷ யத்³ப³லம் தத்³வித³ர்ஶய ।
நாஶயாம்யத்³ய தே த³ர்பம் ஶஸ்த்ரஸ்ய தவ கா³தி⁴ஜ ॥ 3 ॥
க்வ ச தே க்ஷத்ரியப³லம் க்வ ச ப்³ரஹ்மப³லம் மஹத் ।
பஶ்ய ப்³ரஹ்மப³லம் தி³வ்யம் மம க்ஷத்ரியபாம்ஸன ॥ 4 ॥
தஸ்யாஸ்த்ரம் கா³தி⁴புத்ரஸ்ய கோ⁴ரமாக்³னேயமுத்³யதம் ।
ப்³ரஹ்மத³ண்டே³ன தச்சா²ந்தமக்³னேர்வேக³ இவாம்ப⁴ஸா ॥ 5 ॥
வாருணம் சைவ ரௌத்³ரம் ச ஐந்த்³ரம் பாஶுபதம் ததா² ।
ஐஷீகம் சாபி சிக்ஷேப குபிதோ கா³தி⁴னந்த³ன: ॥ 6 ॥
மானவம் மோஹனம் சைவ கா³ந்த⁴ர்வம் ஸ்வாபனம் ததா² ।
ஜ்ரும்ப⁴ணம் மாத³னம் சைவ ஸந்தாபனவிலாபனே ॥ 7 ॥
ஶோஷணம் தா³ரணம் சைவ வஜ்ரமஸ்த்ரம் ஸுது³ர்ஜயம் ।
ப்³ரஹ்மபாஶம் காலபாஶம் வாருணம் பாஶமேவ ச ॥ 8 ॥
பைனாகாஸ்த்ரம் ச த³யிதம் ஶுஷ்கார்த்³ரே அஶனீ உபே⁴ ।
த³ண்டா³ஸ்த்ரமத² பைஶாசம் க்ரௌஞ்சமஸ்த்ரம் ததை²வ ச ॥ 9 ॥
த⁴ர்மசக்ரம் காலசக்ரம் விஷ்ணுசக்ரம் ததை²வ ச ।
வாயவ்யம் மத²னம் சைவ அஸ்த்ரம் ஹயஶிரஸ்ததா² ॥ 1௦ ॥
ஶக்தித்³வயம் ச சிக்ஷேப கங்காலம் முஸலம் ததா² ।
56௦ வைத்³யாத⁴ரம் மஹாஸ்த்ரம் ச காலாஸ்த்ரமத² தா³ருணம் ॥ 11 ॥
த்ரிஶூலமஸ்த்ரம் கோ⁴ரம் ச காபாலமத² கங்கணம் ।
ஏதான்யஸ்த்ராணி சிக்ஷேப ஸர்வாணி ரகு⁴னந்த³ன ॥ 12 ॥
வஸிஷ்டே² ஜபதாம் ஶ்ரேஷ்டே² தத³த்³பு⁴தமிவாப⁴வத் ।
தானி ஸர்வாணி த³ண்டே³ன க்³ரஸதே ப்³ரஹ்மணஸ்ஸுத: ॥ 13 ॥
தேஷு ஶாந்தேஷு ப்³ரஹ்மாஸ்த்ரம் க்ஷிப்தவான் கா³தி⁴னந்த³ன: ।
தத³ஸ்த்ரமுத்³யதம் த்³ருஷ்ட்வா தே³வாஸ்ஸாக்³னிபுரோக³மா: ॥ 14 ॥
தே³வர்ஷயஶ்ச ஸம்ப்⁴ராந்தாக³ந்த⁴ர்வாஸ்ஸமஹோரகா³: ।
த்ரைலோக்யமாஸீத்ஸந்தப்தம் ப்³ரஹ்மாஸ்த்ரே ஸமுதீ³ரிதே ॥ 15 ॥
தத³ப்யஸ்த்ரம் மஹாகோ⁴ரம் ப்³ரஹ்மம் ப்³ராஹ்மேண தேஜஸா ।
வஸிஷ்டோ² க்³ரஸதே ஸர்வம் ப்³ரஹ்மத³ண்டே³ன ராக⁴வ ॥ 16 ॥
ப்³ரஹ்மாஸ்த்ரம் க்³ரஸமானஸ்ய வஸிஷ்ட²ஸ்ய மஹாத்மன: ।
த்ரைலோக்யமோஹனம் ரௌத்³ரம் ரூபமாஸீத்ஸுதா³ருணம் ॥ 17 ॥
ரோமகூபேஷு ஸர்வேஷு வஸிஷ்ட²ஸ்ய மஹாத்மன: ।
மரீச்ய இவ நிஷ்பேதுரக்³னேர்தூ⁴மாகுலார்சிஷ: ॥ 18 ॥
ப்ராஜ்வலத்³ப்³ரஹ்மத³ண்ட³ஶ்ச வஸிஷ்ட²ஸ்ய கரோத்³யத: ।
விதூ⁴ம இவ காலாக்³னிர்யமத³ண்ட³ இவாபர: ॥ 19 ॥
ததோஸ்துவன் முனிக³ணா வஸிஷ்ட²ம் ஜபதாம் வரம் ।
அமோக⁴ம் தே ப³லம் ப்³ரஹ்மன் தேஜோ தா⁴ரய தேஜஸா ॥ 2௦ ॥
நிக்³ருஹீதஸ்த்வயா ப்³ரஹ்மன் விஶ்வாமித்ரோ மஹாதபா: ।
ப்ரஸீத³ ஜபதாம் ஶ்ரேஷ்ட² லோகாஸ்ஸந்து க³தவ்யதா²: ॥ 21 ॥
ஏவமுக்தோ மஹாதேஜாஶ்ஶமம் சக்ரே மஹாதபா: ।
விஶ்வாமித்ரோபி நிக்ருதோ வினிஶ்வஸ்யேத³மப்³ரவீத் ॥ 22 ॥
தி⁴க்³ப³லம் க்ஷத்ரியப³லம் ப்³ரஹ்மதேஜோ ப³லம் ப³லம் ।
ஏகேன ப்³ரஹ்மத³ண்டே³ன ஸர்வாஸ்த்ராணி ஹதானி மே ॥ 23 ॥
ததே³தத்ஸமவேக்ஷ்யாஹம் ப்ரஸன்னேந்த்³ரியமானஸ: ।
தபோ மஹத்ஸமாஸ்தா²ஸ்யே யத்³வை ப்³ரஹ்மத்வகாரணம் ॥ 24 ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே பா³லகாண்டே³ ஷட்பஞ்சாஶஸ்ஸர்க:³ ॥
