śrīmadvālmīkīya rāmāyaṇē bālakāṇḍam ।
atha ṣaṭpañchāśassargaḥ ।
ēvamuktō vasiṣṭhēna viśvāmitrō mahābalaḥ ।
āgnēyamastramutkṣipya tiṣṭha tiṣṭhēti chābravīt ॥ 1 ॥
brahmadaṇḍaṃ samutkṣipya kāladaṇḍamivā'param ।
vasiṣṭhō bhagavān krōdhādidaṃ vachanamabravīt ॥ 2 ॥
kṣatrabandhō sthitōsmyēṣa yadbalaṃ tadvidarśaya ।
nāśayāmyadya tē darpaṃ śastrasya tava gādhija ॥ 3 ॥
kva cha tē kṣatriyabalaṃ kva cha brahmabalaṃ mahat ।
paśya brahmabalaṃ divyaṃ mama kṣatriyapāṃsana ॥ 4 ॥
tasyāstraṃ gādhiputrasya ghōramāgnēyamudyatam ।
brahmadaṇḍēna tachChāntamagnērvēga ivāmbhasā ॥ 5 ॥
vāruṇaṃ chaiva raudraṃ cha aindraṃ pāśupataṃ tathā ।
aiṣīkaṃ chāpi chikṣēpa kupitō gādhinandanaḥ ॥ 6 ॥
mānavaṃ mōhanaṃ chaiva gāndharvaṃ svāpanaṃ tathā ।
jṛmbhaṇaṃ mādanaṃ chaiva santāpanavilāpanē ॥ 7 ॥
śōṣaṇaṃ dāraṇaṃ chaiva vajramastraṃ sudurjayam ।
brahmapāśaṃ kālapāśaṃ vāruṇaṃ pāśamēva cha ॥ 8 ॥
painākāstraṃ cha dayitaṃ śuṣkārdrē aśanī ubhē ।
daṇḍāstramatha paiśāchaṃ krauñchamastraṃ tathaiva cha ॥ 9 ॥
dharmachakraṃ kālachakraṃ viṣṇuchakraṃ tathaiva cha ।
vāyavyaṃ mathanaṃ chaiva astraṃ hayaśirastathā ॥ 10 ॥
śaktidvayaṃ cha chikṣēpa kaṅkālaṃ musalaṃ tathā ।
560 vaidyādharaṃ mahāstraṃ cha kālāstramatha dāruṇam ॥ 11 ॥
triśūlamastraṃ ghōraṃ cha kāpālamatha kaṅkaṇam ।
ētānyastrāṇi chikṣēpa sarvāṇi raghunandana ॥ 12 ॥
vasiṣṭhē japatāṃ śrēṣṭhē tadadbhutamivābhavat ।
tāni sarvāṇi daṇḍēna grasatē brahmaṇassutaḥ ॥ 13 ॥
tēṣu śāntēṣu brahmāstraṃ kṣiptavān gādhinandanaḥ ।
tadastramudyataṃ dṛṣṭvā dēvāssāgnipurōgamāḥ ॥ 14 ॥
dēvarṣayaścha sambhrāntāgandharvāssamahōragāḥ ।
trailōkyamāsītsantaptaṃ brahmāstrē samudīritē ॥ 15 ॥
tadapyastraṃ mahāghōraṃ brahmaṃ brāhmēṇa tējasā ।
vasiṣṭhō grasatē sarvaṃ brahmadaṇḍēna rāghava ॥ 16 ॥
brahmāstraṃ grasamānasya vasiṣṭhasya mahātmanaḥ ।
trailōkyamōhanaṃ raudraṃ rūpamāsītsudāruṇam ॥ 17 ॥
rōmakūpēṣu sarvēṣu vasiṣṭhasya mahātmanaḥ ।
marīchya iva niṣpēturagnērdhūmākulārchiṣaḥ ॥ 18 ॥
prājvaladbrahmadaṇḍaścha vasiṣṭhasya karōdyataḥ ।
vidhūma iva kālāgniryamadaṇḍa ivāparaḥ ॥ 19 ॥
tatō'stuvan munigaṇā vasiṣṭhaṃ japatāṃ varam ।
amōghaṃ tē balaṃ brahman tējō dhāraya tējasā ॥ 20 ॥
nigṛhītastvayā brahman viśvāmitrō mahātapāḥ ।
prasīda japatāṃ śrēṣṭha lōkāssantu gatavyathāḥ ॥ 21 ॥
ēvamuktō mahātējāśśamaṃ chakrē mahātapāḥ ।
viśvāmitrō'pi nikṛtō viniśvasyēdamabravīt ॥ 22 ॥
dhigbalaṃ kṣatriyabalaṃ brahmatējō balaṃ balam ।
ēkēna brahmadaṇḍēna sarvāstrāṇi hatāni mē ॥ 23 ॥
tadētatsamavēkṣyāhaṃ prasannēndriyamānasaḥ ।
tapō mahatsamāsthāsyē yadvai brahmatvakāraṇam ॥ 24 ॥
ityārṣē śrīmadrāmāyaṇē vālmīkīya ādikāvyē bālakāṇḍē ṣaṭpañchāśassargaḥ ॥
