ශ්රීමද්වාල්මීකීය රාමායණේ අයෝධ්යාකාංඩම් ।
අථ සප්තාධිකශතතමස්සර්ගඃ ।
පුනරේවං බ්රුවාණං තං භරතං ලක්ෂ්මණාග්රජඃ ।
ප්රත්යුවාච තත ශ්ශ්රීමාන් ජ්ඤාතිමධ්යේऽභිසත්කෘතඃ ॥ 1 ॥
උපපන්නමිදං වාක්යං යත්ත්වමේවමභාෂථාඃ ।
ජාතඃ පුත්රෝ දශරථාත්කෛකේය්යාං රාජසත්තමාත් ॥ 2 ॥
පුරා භ්රාතඃ පිතා න ස්ස මාතරං තේ සමුද්වහන් ।
මාතාමහේ සමාශ්රෞෂීද්රාජ්යශුල්කමනුත්තමම් ॥ 3 ॥
දෛවාසුරේ ච සංග්රාමේ ජනන්යෛ තව පාර්ථිවඃ ।
සංප්රහෘෂ්ටෝ දදෞ රාජා වරමාරාධිතඃ ප්රභුඃ ॥ 4 ॥
තතස්සා සංප්රතිශ්රාව්ය තව මාතා යශස්විනී ।
අයාචත නරශ්රේෂ්ඨං ද්වෞ වරෞ වරවර්ණිනී ॥ 5 ॥
තව රාජ්යං නරව්යාඝ්ර මම ප්රව්රාජනං තථා ।
තෞ ච රාජා තදා තස්යෛ නියුක්තඃ ප්රදදෞ වරෞ ॥ 6 ॥
තතඃ සා සංප්රතිශ්රාව්ය තව මාතා යශස්විනී ।
අයාචත නරශ්රේෂ්ඨං ද්වෞ වරෞ වරවර්ණිනී ॥ 7 ॥
තව රාජ්යං නරව්යාඝ්ර මම ප්රව්රාජනං තථා ।
තච්ච රාජා තදා තස්යෛ නියුක්තඃ ප්රදදෞ වරෞ ॥ 8 ॥
තේන පිත්රාऽහමප්යත්ර නියුක්තඃ පුරුෂර්ෂභ ।
චතුර්දශ වනේ වාසං වර්ෂාණි වරදානිකම් ॥ 9 ॥
සෝऽහං වනමිදං ප්රාප්තෝ නිර්ජනං ලක්ෂ්මණාන්විතඃ ।
සීතයා චාප්රතිද්වංද්ව ස්සත්යවාදේ ස්ථිතඃ පිතුඃ ॥ 10 ॥
භවානපි තථේත්යේව පිතරං සත්යවාදිනම් ।
කර්තුමර්හති රාජේංද්ර ක්ෂිප්රමේවාභිෂේචනාත් ॥ 11 ॥
ඍණාන්මෝචය රාජානං මත්කෘතේ භරත ප්රභුම් ।
පිතරං චාපි ධර්මජ්ඤං මාතරං චාභිනංදය ॥ 12 ॥
ශ්රූයතේ ධීමතා තාත ශ්රුතිර්ගීතා යශස්විනා ।
ගයේන යජමානේන ගයේෂ්වේව පිතॄන් ප්රති ॥ 13 ॥
පුන්නාම්නෝ නරකාද් යස්මාත් පිතරං ත්රායතේ සුතඃ ।
තස්මාත් පුත්ර ඉති ප්රෝක්තඃ පිතॄන් යඃ පාති සර්වතඃ ॥ 14 ॥
ඒෂ්ටව්යා බහවඃ පුත්රා ගුණවංතෝ බහුශ්රුතාඃ ।
තේෂාං වෛ සමවේතානාමපි කශ්චිද්ගයාං ව්රජේත් ॥ 15 ॥
ඒවං රාජර්ෂය ස්සර්වේ ප්රතීතා රාජනංදන ।
තස්මාත්රාහි නරශ්රේෂ්ඨ පිතරං නරකාත්ප්රභෝ ॥ 16 ॥
අයෝධ්යාං ගච්ඡ භරත ප්රකෘතීරනුරංජය ।
ශත්රුඝ්නසහිතෝ වීර සහ සර්වෛර්ද්විජාතිභිඃ ॥ 17 ॥
ප්රවේක්ෂ්යේ දංඩකාරණ්යමහමප්යවිලංබයන් ।
ආභ්යාංතු සහිතෝ රාජන් වෛදේහ්යා ලක්ෂ්මණේන ච ॥ 18 ॥
ත්වං රාජා භරත භව ස්වයං නරාණාං වන්යානාමහමපි රාජරාණ්මෘගාණාම් ।
ගච්ඡ ත්වං පුරවරමද්ය සංප්රහෘෂ්ටස්සංහෘෂ්ටස්ත්වහමපි දංඩකාන්ප්රවේක්ෂ්යේ ॥ 19 ॥
ඡායාං තේ දිනකරභාඃ ප්රබාධමානාං වර්ෂත්රං භරත කරෝතු මූර්ධ්නි ශීතාම් ।
ඒතේෂාමහමපි කානනද්රුමාණාං ඡායාං තාමතිශයිනීං සුඛී ශ්රයිෂ්යේ ॥ 20 ॥
ශත්රුඝ්නඃ කුශලමතිස්තු තේ සහායස්සෞමිත්රිර්මම විදිතඃ ප්රධානමිත්රම් ।
චත්වාරස්තනයවරා වයං නරේංද්රං සත්යස්ථං භරත චරාම මා විෂීද ॥ 21 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ සප්තාධිකශතතමස්සර්ගඃ ॥
