શ્રીમદ્વાલ્મીકીય રામાયણે અરણ્યકાંડમ્ ।
અથ દશમસ્સર્ગઃ ।
વાક્યમેતત્તુ વૈદેહ્યા વ્યાહૃતં ભર્તૃભક્તયા ।
શ્રુત્વા ધર્મે સ્થિતો રામઃ પ્રત્યુવાચાથ મૈથિલીમ્ ॥ 1 ॥
હિતમુક્તં ત્વયા દેવિ સ્નિગ્ધયા સદૃશં વચઃ ।
કુલં વ્યપદિશંત્યા ચ ધર્મજ્ઞે જનકાત્મજે ॥ 2 ॥
કિંતુ વક્ષ્યામ્યહં દેવિ ત્વયૈવોક્તમિદં વચઃ ।
ક્ષત્રિયૈર્ધાર્યતે ચાપો નાર્તશબ્દો ભવેદિતિ ॥ 3 ॥
તે ચાર્તા દંડકારણ્યે મુનયસ્સંશિતવ્રતાઃ ।
માં સીતે સ્વયમાગમ્ય શરણ્યાશ્શરણં ગતાઃ ॥ 4 ॥
વસંતો ધર્મનિરતા વને મૂલફલાશનાઃ ।
ન લભંતે સુખં ભીતા રાક્ષસૈઃ ક્રૂરકર્મભિઃ ॥ 5 ॥
કાલે કાલે ચ નિરતા નિયમૈર્વિવિધૈર્વને ।
ભક્ષ્યંતે રાક્ષસૈર્ભીમૈર્નરમાંસોપજીવિભિઃ ॥ 6 ॥
તે ભક્ષ્યમાણા મુનયો દંડકારણ્યવાસિનઃ ।
અસ્માનભ્યવપદ્યેતિ મામૂચુર્દ્વિજસત્તમા ॥ 7 ॥
મયા તુ વચનં શ્રુત્વા તેષામેવં મુખાચ્ચ્યુતમ્ ।
કૃત્વા ચરણશુશ્રૂષાં વાક્યમેતદુદાહૃતમ્ ॥ 8 ॥
પ્રસીદંતુ ભવંતો મે હ્રીરેષા હિ મમાતુલા ।
યદીદૃશૈરહં વિપ્રૈરુપસ્થેયૈરુપસ્થિતઃ ॥ 9 ॥
કિં કરોમીતિ ચ મયા વ્યાહૃતં દ્વિજસન્નિધૌ ।
સર્વૈરેતૈસ્સમાગમ્ય વાગિયં સમુદાહૃતા ॥ 10 ॥
રાક્ષસૈર્દંડકારણ્યે બહુભિઃ કામરૂપિભિઃ ।
અર્દિતાસ્સ્મ દૃઢં રામ ભવાન્નસ્તત્ર રક્ષતુ ॥ 11 ॥
હોમકાલેષુ સંપ્રાપ્તાઃ પર્વકાલેષુ ચાનઘ ।
ધર્ષયંતિ સુદુર્ધર્ષા રાક્ષસાઃ પિશિતાશનાઃ ॥ 12 ॥
રાક્ષસૈર્ધર્ષિતાનાં ચ તાપસાનાં તપસ્વિનામ્ ।
ગતિં મૃગયમાણાનાં ભવાન્નઃ પરમા ગતિઃ ॥ 13 ॥
કામં તપઃપ્રભાવેન શક્તા હંતું નિશાચરાન્ ।
ચિરાર્જિતં તુ નેચ્છામસ્તપઃ ખંડયિતું વયમ્ ॥ 14 ॥
બહુવિઘ્નં તપો નિત્યં દુશ્ચરં ચૈવ રાઘવ ।
તેન શાપં ન મુંચામો ભક્ષ્યમાણાશ્ચ રાક્ષસૈઃ ॥ 15 ॥
તદર્ધ્યમાનાન્રક્ષોભિર્દંડકારણ્યવાસિભિઃ ।
રક્ષ નસ્ત્વં સહ ભ્રાત્રા ત્વન્નાથા હિ વયં વને ॥ 16 ॥
મયા ચૈતદ્વચશ્શ્રુત્વા કાર્ત્સ્ન્યેન પરિપાલનમ્ ।
ઋષીણાં દંડકારણ્યે સંશ્રુતં જનકાત્મજે ॥ 17 ॥
સંશ્રુત્ય ચ ન શક્ષ્યામિ જીવમાનઃ પ્રતિશ્રવમ્ ।
મુનીનામન્યથા કર્તું સત્યમિષ્ટં હિ મે સદા ॥ 18 ॥
અપ્યહં જીવિતં જહ્યાં ત્વાં વા સીતે સલક્ષ્મણામ્ ।
ન તુ પ્રતિજ્ઞાં સંશ્રુત્ય બ્રાહ્મણેભ્યો વિશેષતઃ ॥ 19 ॥
તદવશ્યં મયા કાર્યમૃષીણાં પરિપાલનમ્ ।
અનુક્તેનાપિ વૈદેહિ પ્રતિજ્ઞાય તુ કિં પુનઃ ॥ 20 ॥
મમ સ્નેહાચ્ચ સૌહાર્દાદિદમુક્તંત્વયાઽનઘે ।
પરિતુષ્ટોઽસ્મ્યહં સીતે ન હ્યનિષ્ટોઽનુશિષ્યતે ॥ 21 ॥
સદૃશં ચાનુરૂપં ચ કુલસ્ય તવ ચાત્મનઃ ।
સધર્મચારિણી મે ત્વં પ્રાણેભ્યોઽપિ ગરીયસી ॥ 22 ॥
ઇત્યેવમુક્ત્વા વચનં મહાત્મા સીતાં પ્રિયાં મૈથિલરાજપુત્રીમ્ ।
રામો ધનુષ્માન્સહ લક્ષ્મણેન જગામ રમ્યાણિ તપોવનાનિ ॥ 23 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અરણ્યકાંડે દશમસ્સર્ગઃ ॥
