śrīmadvālmīkīya rāmāyaṇē araṇyakāṇḍam ।
atha daśamassargaḥ ।
vākyamētattu vaidēhyā vyāhṛtaṃ bhartṛbhaktayā ।
śrutvā dharmē sthitō rāmaḥ pratyuvāchātha maithilīm ॥ 1 ॥
hitamuktaṃ tvayā dēvi snigdhayā sadṛśaṃ vachaḥ ।
kulaṃ vyapadiśantyā cha dharmajñē janakātmajē ॥ 2 ॥
kintu vakṣyāmyahaṃ dēvi tvayaivōktamidaṃ vachaḥ ।
kṣatriyairdhāryatē chāpō nārtaśabdō bhavēditi ॥ 3 ॥
tē chārtā daṇḍakāraṇyē munayassaṃśitavratāḥ ।
māṃ sītē svayamāgamya śaraṇyāśśaraṇaṃ gatāḥ ॥ 4 ॥
vasantō dharmaniratā vanē mūlaphalāśanāḥ ।
na labhantē sukhaṃ bhītā rākṣasaiḥ krūrakarmabhiḥ ॥ 5 ॥
kālē kālē cha niratā niyamairvividhairvanē ।
bhakṣyantē rākṣasairbhīmairnaramāṃsōpajīvibhiḥ ॥ 6 ॥
tē bhakṣyamāṇā munayō daṇḍakāraṇyavāsinaḥ ।
asmānabhyavapadyēti māmūchurdvijasattamā ॥ 7 ॥
mayā tu vachanaṃ śrutvā tēṣāmēvaṃ mukhāchchyutam ।
kṛtvā charaṇaśuśrūṣāṃ vākyamētadudāhṛtam ॥ 8 ॥
prasīdantu bhavantō mē hrīrēṣā hi mamātulā ।
yadīdṛśairahaṃ viprairupasthēyairupasthitaḥ ॥ 9 ॥
kiṃ karōmīti cha mayā vyāhṛtaṃ dvijasannidhau ।
sarvairētaissamāgamya vāgiyaṃ samudāhṛtā ॥ 10 ॥
rākṣasairdaṇḍakāraṇyē bahubhiḥ kāmarūpibhiḥ ।
arditāssma dṛḍhaṃ rāma bhavānnastatra rakṣatu ॥ 11 ॥
hōmakālēṣu samprāptāḥ parvakālēṣu chānagha ।
dharṣayanti sudurdharṣā rākṣasāḥ piśitāśanāḥ ॥ 12 ॥
rākṣasairdharṣitānāṃ cha tāpasānāṃ tapasvinām ।
gatiṃ mṛgayamāṇānāṃ bhavānnaḥ paramā gatiḥ ॥ 13 ॥
kāmaṃ tapaḥprabhāvēna śaktā hantuṃ niśācharān ।
chirārjitaṃ tu nēchChāmastapaḥ khaṇḍayituṃ vayam ॥ 14 ॥
bahuvighnaṃ tapō nityaṃ duścharaṃ chaiva rāghava ।
tēna śāpaṃ na muñchāmō bhakṣyamāṇāścha rākṣasaiḥ ॥ 15 ॥
tadardhyamānānrakṣōbhirdaṇḍakāraṇyavāsibhiḥ ।
rakṣa nastvaṃ saha bhrātrā tvannāthā hi vayaṃ vanē ॥ 16 ॥
mayā chaitadvachaśśrutvā kārtsnyēna paripālanam ।
ṛṣīṇāṃ daṇḍakāraṇyē saṃśrutaṃ janakātmajē ॥ 17 ॥
saṃśrutya cha na śakṣyāmi jīvamānaḥ pratiśravam ।
munīnāmanyathā kartuṃ satyamiṣṭaṃ hi mē sadā ॥ 18 ॥
apyahaṃ jīvitaṃ jahyāṃ tvāṃ vā sītē salakṣmaṇām ।
na tu pratijñāṃ saṃśrutya brāhmaṇēbhyō viśēṣataḥ ॥ 19 ॥
tadavaśyaṃ mayā kāryamṛṣīṇāṃ paripālanam ।
anuktēnāpi vaidēhi pratijñāya tu kiṃ punaḥ ॥ 20 ॥
mama snēhāchcha sauhārdādidamuktantvayā'naghē ।
parituṣṭō'smyahaṃ sītē na hyaniṣṭō'nuśiṣyatē ॥ 21 ॥
sadṛśaṃ chānurūpaṃ cha kulasya tava chātmanaḥ ।
sadharmachāriṇī mē tvaṃ prāṇēbhyō'pi garīyasī ॥ 22 ॥
ityēvamuktvā vachanaṃ mahātmā sītāṃ priyāṃ maithilarājaputrīm ।
rāmō dhanuṣmānsaha lakṣmaṇēna jagāma ramyāṇi tapōvanāni ॥ 23 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē daśamassargaḥ ॥
