ശ്രീമദ്വാല്മീകീയ രാമായണേ അരണ്യകാംഡമ് ।
അഥ ദശമസ്സര്ഗഃ ।
വാക്യമേതത്തു വൈദേഹ്യാ വ്യാഹൃതം ഭര്തൃഭക്തയാ ।
ശ്രുത്വാ ധര്മേ സ്ഥിതോ രാമഃ പ്രത്യുവാചാഥ മൈഥിലീമ് ॥ 1 ॥
ഹിതമുക്തം ത്വയാ ദേവി സ്നിഗ്ധയാ സദൃശം വചഃ ।
കുലം വ്യപദിശംത്യാ ച ധര്മജ്ഞേ ജനകാത്മജേ ॥ 2 ॥
കിംതു വക്ഷ്യാമ്യഹം ദേവി ത്വയൈവോക്തമിദം വചഃ ।
ക്ഷത്രിയൈര്ധാര്യതേ ചാപോ നാര്തശബ്ദോ ഭവേദിതി ॥ 3 ॥
തേ ചാര്താ ദംഡകാരണ്യേ മുനയസ്സംശിതവ്രതാഃ ।
മാം സീതേ സ്വയമാഗമ്യ ശരണ്യാശ്ശരണം ഗതാഃ ॥ 4 ॥
വസംതോ ധര്മനിരതാ വനേ മൂലഫലാശനാഃ ।
ന ലഭംതേ സുഖം ഭീതാ രാക്ഷസൈഃ ക്രൂരകര്മഭിഃ ॥ 5 ॥
കാലേ കാലേ ച നിരതാ നിയമൈർവിവിധൈർവനേ ।
ഭക്ഷ്യംതേ രാക്ഷസൈര്ഭീമൈര്നരമാംസോപജീവിഭിഃ ॥ 6 ॥
തേ ഭക്ഷ്യമാണാ മുനയോ ദംഡകാരണ്യവാസിനഃ ।
അസ്മാനഭ്യവപദ്യേതി മാമൂചുര്ദ്വിജസത്തമാ ॥ 7 ॥
മയാ തു വചനം ശ്രുത്വാ തേഷാമേവം മുഖാച്ച്യുതമ് ।
കൃത്വാ ചരണശുശ്രൂഷാം വാക്യമേതദുദാഹൃതമ് ॥ 8 ॥
പ്രസീദംതു ഭവംതോ മേ ഹ്രീരേഷാ ഹി മമാതുലാ ।
യദീദൃശൈരഹം വിപ്രൈരുപസ്ഥേയൈരുപസ്ഥിതഃ ॥ 9 ॥
കിം കരോമീതി ച മയാ വ്യാഹൃതം ദ്വിജസന്നിധൌ ।
സർവൈരേതൈസ്സമാഗമ്യ വാഗിയം സമുദാഹൃതാ ॥ 10 ॥
രാക്ഷസൈര്ദംഡകാരണ്യേ ബഹുഭിഃ കാമരൂപിഭിഃ ।
അര്ദിതാസ്സ്മ ദൃഢം രാമ ഭവാന്നസ്തത്ര രക്ഷതു ॥ 11 ॥
ഹോമകാലേഷു സംപ്രാപ്താഃ പർവകാലേഷു ചാനഘ ।
ധര്ഷയംതി സുദുര്ധര്ഷാ രാക്ഷസാഃ പിശിതാശനാഃ ॥ 12 ॥
രാക്ഷസൈര്ധര്ഷിതാനാം ച താപസാനാം തപസ്വിനാമ് ।
ഗതിം മൃഗയമാണാനാം ഭവാന്നഃ പരമാ ഗതിഃ ॥ 13 ॥
കാമം തപഃപ്രഭാവേന ശക്താ ഹംതും നിശാചരാന് ।
ചിരാര്ജിതം തു നേച്ഛാമസ്തപഃ ഖംഡയിതും വയമ് ॥ 14 ॥
ബഹുവിഘ്നം തപോ നിത്യം ദുശ്ചരം ചൈവ രാഘവ ।
തേന ശാപം ന മുംചാമോ ഭക്ഷ്യമാണാശ്ച രാക്ഷസൈഃ ॥ 15 ॥
തദര്ധ്യമാനാന്രക്ഷോഭിര്ദംഡകാരണ്യവാസിഭിഃ ।
രക്ഷ നസ്ത്വം സഹ ഭ്രാത്രാ ത്വന്നാഥാ ഹി വയം വനേ ॥ 16 ॥
മയാ ചൈതദ്വചശ്ശ്രുത്വാ കാര്ത്സ്ന്യേന പരിപാലനമ് ।
ഋഷീണാം ദംഡകാരണ്യേ സംശ്രുതം ജനകാത്മജേ ॥ 17 ॥
സംശ്രുത്യ ച ന ശക്ഷ്യാമി ജീവമാനഃ പ്രതിശ്രവമ് ।
മുനീനാമന്യഥാ കര്തും സത്യമിഷ്ടം ഹി മേ സദാ ॥ 18 ॥
അപ്യഹം ജീവിതം ജഹ്യാം ത്വാം വാ സീതേ സലക്ഷ്മണാമ് ।
ന തു പ്രതിജ്ഞാം സംശ്രുത്യ ബ്രാഹ്മണേഭ്യോ വിശേഷതഃ ॥ 19 ॥
തദവശ്യം മയാ കാര്യമൃഷീണാം പരിപാലനമ് ।
അനുക്തേനാപി വൈദേഹി പ്രതിജ്ഞായ തു കിം പുനഃ ॥ 20 ॥
മമ സ്നേഹാച്ച സൌഹാര്ദാദിദമുക്തംത്വയാഽനഘേ ।
പരിതുഷ്ടോഽസ്മ്യഹം സീതേ ന ഹ്യനിഷ്ടോഽനുശിഷ്യതേ ॥ 21 ॥
സദൃശം ചാനുരൂപം ച കുലസ്യ തവ ചാത്മനഃ ।
സധര്മചാരിണീ മേ ത്വം പ്രാണേഭ്യോഽപി ഗരീയസീ ॥ 22 ॥
ഇത്യേവമുക്ത്വാ വചനം മഹാത്മാ സീതാം പ്രിയാം മൈഥിലരാജപുത്രീമ് ।
രാമോ ധനുഷ്മാന്സഹ ലക്ഷ്മണേന ജഗാമ രമ്യാണി തപോവനാനി ॥ 23 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ദശമസ്സര്ഗഃ ॥
