ශ්රීමද්වාල්මීකීය රාමායණේ අරණ්යකාංඩම් ।
අථ දශමස්සර්ගඃ ।
වාක්යමේතත්තු වෛදේහ්යා ව්යාහෘතං භර්තෘභක්තයා ।
ශ්රුත්වා ධර්මේ ස්ථිතෝ රාමඃ ප්රත්යුවාචාථ මෛථිලීම් ॥ 1 ॥
හිතමුක්තං ත්වයා දේවි ස්නිග්ධයා සදෘශං වචඃ ।
කුලං ව්යපදිශංත්යා ච ධර්මජ්ඤේ ජනකාත්මජේ ॥ 2 ॥
කිංතු වක්ෂ්යාම්යහං දේවි ත්වයෛවෝක්තමිදං වචඃ ।
ක්ෂත්රියෛර්ධාර්යතේ චාපෝ නාර්තශබ්දෝ භවේදිති ॥ 3 ॥
තේ චාර්තා දංඩකාරණ්යේ මුනයස්සංශිතව්රතාඃ ।
මාං සීතේ ස්වයමාගම්ය ශරණ්යාශ්ශරණං ගතාඃ ॥ 4 ॥
වසංතෝ ධර්මනිරතා වනේ මූලඵලාශනාඃ ।
න ලභංතේ සුඛං භීතා රාක්ෂසෛඃ ක්රූරකර්මභිඃ ॥ 5 ॥
කාලේ කාලේ ච නිරතා නියමෛර්විවිධෛර්වනේ ।
භක්ෂ්යංතේ රාක්ෂසෛර්භීමෛර්නරමාංසෝපජීවිභිඃ ॥ 6 ॥
තේ භක්ෂ්යමාණා මුනයෝ දංඩකාරණ්යවාසිනඃ ।
අස්මානභ්යවපද්යේති මාමූචුර්ද්විජසත්තමා ॥ 7 ॥
මයා තු වචනං ශ්රුත්වා තේෂාමේවං මුඛාච්ච්යුතම් ।
කෘත්වා චරණශුශ්රූෂාං වාක්යමේතදුදාහෘතම් ॥ 8 ॥
ප්රසීදංතු භවංතෝ මේ හ්රීරේෂා හි මමාතුලා ।
යදීදෘශෛරහං විප්රෛරුපස්ථේයෛරුපස්ථිතඃ ॥ 9 ॥
කිං කරෝමීති ච මයා ව්යාහෘතං ද්විජසන්නිධෞ ।
සර්වෛරේතෛස්සමාගම්ය වාගියං සමුදාහෘතා ॥ 10 ॥
රාක්ෂසෛර්දංඩකාරණ්යේ බහුභිඃ කාමරූපිභිඃ ।
අර්දිතාස්ස්ම දෘඪං රාම භවාන්නස්තත්ර රක්ෂතු ॥ 11 ॥
හෝමකාලේෂු සංප්රාප්තාඃ පර්වකාලේෂු චානඝ ।
ධර්ෂයංති සුදුර්ධර්ෂා රාක්ෂසාඃ පිශිතාශනාඃ ॥ 12 ॥
රාක්ෂසෛර්ධර්ෂිතානාං ච තාපසානාං තපස්විනාම් ।
ගතිං මෘගයමාණානාං භවාන්නඃ පරමා ගතිඃ ॥ 13 ॥
කාමං තපඃප්රභාවේන ශක්තා හංතුං නිශාචරාන් ।
චිරාර්ජිතං තු නේච්ඡාමස්තපඃ ඛංඩයිතුං වයම් ॥ 14 ॥
බහුවිඝ්නං තපෝ නිත්යං දුශ්චරං චෛව රාඝව ।
තේන ශාපං න මුංචාමෝ භක්ෂ්යමාණාශ්ච රාක්ෂසෛඃ ॥ 15 ॥
තදර්ධ්යමානාන්රක්ෂෝභිර්දංඩකාරණ්යවාසිභිඃ ।
රක්ෂ නස්ත්වං සහ භ්රාත්රා ත්වන්නාථා හි වයං වනේ ॥ 16 ॥
මයා චෛතද්වචශ්ශ්රුත්වා කාර්ත්ස්න්යේන පරිපාලනම් ।
ඍෂීණාං දංඩකාරණ්යේ සංශ්රුතං ජනකාත්මජේ ॥ 17 ॥
සංශ්රුත්ය ච න ශක්ෂ්යාමි ජීවමානඃ ප්රතිශ්රවම් ।
මුනීනාමන්යථා කර්තුං සත්යමිෂ්ටං හි මේ සදා ॥ 18 ॥
අප්යහං ජීවිතං ජහ්යාං ත්වාං වා සීතේ සලක්ෂ්මණාම් ।
න තු ප්රතිජ්ඤාං සංශ්රුත්ය බ්රාහ්මණේභ්යෝ විශේෂතඃ ॥ 19 ॥
තදවශ්යං මයා කාර්යමෘෂීණාං පරිපාලනම් ।
අනුක්තේනාපි වෛදේහි ප්රතිජ්ඤාය තු කිං පුනඃ ॥ 20 ॥
මම ස්නේහාච්ච සෞහාර්දාදිදමුක්තංත්වයාऽනඝේ ।
පරිතුෂ්ටෝऽස්ම්යහං සීතේ න හ්යනිෂ්ටෝऽනුශිෂ්යතේ ॥ 21 ॥
සදෘශං චානුරූපං ච කුලස්ය තව චාත්මනඃ ।
සධර්මචාරිණී මේ ත්වං ප්රාණේභ්යෝऽපි ගරීයසී ॥ 22 ॥
ඉත්යේවමුක්ත්වා වචනං මහාත්මා සීතාං ප්රියාං මෛථිලරාජපුත්රීම් ।
රාමෝ ධනුෂ්මාන්සහ ලක්ෂ්මණේන ජගාම රම්යාණි තපෝවනානි ॥ 23 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ දශමස්සර්ගඃ ॥
