ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ଦଶମସ୍ସର୍ଗଃ ।
ଵାକ୍ୟମେତତ୍ତୁ ଵୈଦେହ୍ୟା ଵ୍ୟାହୃତଂ ଭର୍ତୃଭକ୍ତୟା ।
ଶ୍ରୁତ୍ଵା ଧର୍ମେ ସ୍ଥିତୋ ରାମଃ ପ୍ରତ୍ୟୁଵାଚାଥ ମୈଥିଲୀମ୍ ॥ 1 ॥
ହିତମୁକ୍ତଂ ତ୍ଵୟା ଦେଵି ସ୍ନିଗ୍ଧୟା ସଦୃଶଂ ଵଚଃ ।
କୁଲଂ ଵ୍ୟପଦିଶଂତ୍ୟା ଚ ଧର୍ମଜ୍ଞେ ଜନକାତ୍ମଜେ ॥ 2 ॥
କିଂତୁ ଵକ୍ଷ୍ୟାମ୍ୟହଂ ଦେଵି ତ୍ଵୟୈଵୋକ୍ତମିଦଂ ଵଚଃ ।
କ୍ଷତ୍ରିୟୈର୍ଧାର୍ୟତେ ଚାପୋ ନାର୍ତଶବ୍ଦୋ ଭଵେଦିତି ॥ 3 ॥
ତେ ଚାର୍ତା ଦଂଡକାରଣ୍ୟେ ମୁନୟସ୍ସଂଶିତଵ୍ରତାଃ ।
ମାଂ ସୀତେ ସ୍ଵୟମାଗମ୍ୟ ଶରଣ୍ୟାଶ୍ଶରଣଂ ଗତାଃ ॥ 4 ॥
ଵସଂତୋ ଧର୍ମନିରତା ଵନେ ମୂଲଫଲାଶନାଃ ।
ନ ଲଭଂତେ ସୁଖଂ ଭୀତା ରାକ୍ଷସୈଃ କ୍ରୂରକର୍ମଭିଃ ॥ 5 ॥
କାଲେ କାଲେ ଚ ନିରତା ନିୟମୈର୍ଵିଵିଧୈର୍ଵନେ ।
ଭକ୍ଷ୍ୟଂତେ ରାକ୍ଷସୈର୍ଭୀମୈର୍ନରମାଂସୋପଜୀଵିଭିଃ ॥ 6 ॥
ତେ ଭକ୍ଷ୍ୟମାଣା ମୁନୟୋ ଦଂଡକାରଣ୍ୟଵାସିନଃ ।
ଅସ୍ମାନଭ୍ୟଵପଦ୍ୟେତି ମାମୂଚୁର୍ଦ୍ଵିଜସତ୍ତମା ॥ 7 ॥
ମୟା ତୁ ଵଚନଂ ଶ୍ରୁତ୍ଵା ତେଷାମେଵଂ ମୁଖାଚ୍ଚ୍ୟୁତମ୍ ।
କୃତ୍ଵା ଚରଣଶୁଶ୍ରୂଷାଂ ଵାକ୍ୟମେତଦୁଦାହୃତମ୍ ॥ 8 ॥
ପ୍ରସୀଦଂତୁ ଭଵଂତୋ ମେ ହ୍ରୀରେଷା ହି ମମାତୁଲା ।
ୟଦୀଦୃଶୈରହଂ ଵିପ୍ରୈରୁପସ୍ଥେୟୈରୁପସ୍ଥିତଃ ॥ 9 ॥
କିଂ କରୋମୀତି ଚ ମୟା ଵ୍ୟାହୃତଂ ଦ୍ଵିଜସନ୍ନିଧୌ ।
ସର୍ଵୈରେତୈସ୍ସମାଗମ୍ୟ ଵାଗିୟଂ ସମୁଦାହୃତା ॥ 10 ॥
ରାକ୍ଷସୈର୍ଦଂଡକାରଣ୍ୟେ ବହୁଭିଃ କାମରୂପିଭିଃ ।
ଅର୍ଦିତାସ୍ସ୍ମ ଦୃଢଂ ରାମ ଭଵାନ୍ନସ୍ତତ୍ର ରକ୍ଷତୁ ॥ 11 ॥
ହୋମକାଲେଷୁ ସଂପ୍ରାପ୍ତାଃ ପର୍ଵକାଲେଷୁ ଚାନଘ ।
ଧର୍ଷୟଂତି ସୁଦୁର୍ଧର୍ଷା ରାକ୍ଷସାଃ ପିଶିତାଶନାଃ ॥ 12 ॥
ରାକ୍ଷସୈର୍ଧର୍ଷିତାନାଂ ଚ ତାପସାନାଂ ତପସ୍ଵିନାମ୍ ।
ଗତିଂ ମୃଗୟମାଣାନାଂ ଭଵାନ୍ନଃ ପରମା ଗତିଃ ॥ 13 ॥
କାମଂ ତପଃପ୍ରଭାଵେନ ଶକ୍ତା ହଂତୁଂ ନିଶାଚରାନ୍ ।
ଚିରାର୍ଜିତଂ ତୁ ନେଚ୍ଛାମସ୍ତପଃ ଖଂଡୟିତୁଂ ଵୟମ୍ ॥ 14 ॥
ବହୁଵିଘ୍ନଂ ତପୋ ନିତ୍ୟଂ ଦୁଶ୍ଚରଂ ଚୈଵ ରାଘଵ ।
ତେନ ଶାପଂ ନ ମୁଂଚାମୋ ଭକ୍ଷ୍ୟମାଣାଶ୍ଚ ରାକ୍ଷସୈଃ ॥ 15 ॥
ତଦର୍ଧ୍ୟମାନାନ୍ରକ୍ଷୋଭିର୍ଦଂଡକାରଣ୍ୟଵାସିଭିଃ ।
ରକ୍ଷ ନସ୍ତ୍ଵଂ ସହ ଭ୍ରାତ୍ରା ତ୍ଵନ୍ନାଥା ହି ଵୟଂ ଵନେ ॥ 16 ॥
ମୟା ଚୈତଦ୍ଵଚଶ୍ଶ୍ରୁତ୍ଵା କାର୍ତ୍ସ୍ନ୍ୟେନ ପରିପାଲନମ୍ ।
ଋଷୀଣାଂ ଦଂଡକାରଣ୍ୟେ ସଂଶ୍ରୁତଂ ଜନକାତ୍ମଜେ ॥ 17 ॥
ସଂଶ୍ରୁତ୍ୟ ଚ ନ ଶକ୍ଷ୍ୟାମି ଜୀଵମାନଃ ପ୍ରତିଶ୍ରଵମ୍ ।
ମୁନୀନାମନ୍ୟଥା କର୍ତୁଂ ସତ୍ୟମିଷ୍ଟଂ ହି ମେ ସଦା ॥ 18 ॥
ଅପ୍ୟହଂ ଜୀଵିତଂ ଜହ୍ୟାଂ ତ୍ଵାଂ ଵା ସୀତେ ସଲକ୍ଷ୍ମଣାମ୍ ।
ନ ତୁ ପ୍ରତିଜ୍ଞାଂ ସଂଶ୍ରୁତ୍ୟ ବ୍ରାହ୍ମଣେଭ୍ୟୋ ଵିଶେଷତଃ ॥ 19 ॥
ତଦଵଶ୍ୟଂ ମୟା କାର୍ୟମୃଷୀଣାଂ ପରିପାଲନମ୍ ।
ଅନୁକ୍ତେନାପି ଵୈଦେହି ପ୍ରତିଜ୍ଞାୟ ତୁ କିଂ ପୁନଃ ॥ 20 ॥
ମମ ସ୍ନେହାଚ୍ଚ ସୌହାର୍ଦାଦିଦମୁକ୍ତଂତ୍ଵୟାଽନଘେ ।
ପରିତୁଷ୍ଟୋଽସ୍ମ୍ୟହଂ ସୀତେ ନ ହ୍ୟନିଷ୍ଟୋଽନୁଶିଷ୍ୟତେ ॥ 21 ॥
ସଦୃଶଂ ଚାନୁରୂପଂ ଚ କୁଲସ୍ୟ ତଵ ଚାତ୍ମନଃ ।
ସଧର୍ମଚାରିଣୀ ମେ ତ୍ଵଂ ପ୍ରାଣେଭ୍ୟୋଽପି ଗରୀୟସୀ ॥ 22 ॥
ଇତ୍ୟେଵମୁକ୍ତ୍ଵା ଵଚନଂ ମହାତ୍ମା ସୀତାଂ ପ୍ରିୟାଂ ମୈଥିଲରାଜପୁତ୍ରୀମ୍ ।
ରାମୋ ଧନୁଷ୍ମାନ୍ସହ ଲକ୍ଷ୍ମଣେନ ଜଗାମ ରମ୍ୟାଣି ତପୋଵନାନି ॥ 23 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ଦଶମସ୍ସର୍ଗଃ ॥
