શ્રીમદ્વાલ્મીકીય રામાયણે કિષ્કિંધાકાંડમ્ ।
અથ ષષ્ઠસ્સર્ગઃ ।
પુનરેવાબ્રવીત્પ્રીતો રાઘવં રઘુનંદનમ્ ।
અયમાખ્યાતિ મે રામ સચિવો મંત્રિસત્તમઃ ॥ 1 ॥
હનુમાન્યન્નિમિત્તં ત્વં નિર્જનં વનમાગતઃ ।
લક્ષ્મણેન સહ ભ્રાત્રા વસતશ્ચ વને તવ ॥ 2 ॥
રક્ષસાઽપહૃતા ભાર્યા મૈથિલી જનકાત્મજા ।
ત્વયા વિયુક્તા રુદતી લક્ષ્મણેન ચ ધીમતા ॥ 3 ॥
અંતરપ્રેપ્સુના તેન હત્વા ગૃધ્રં જટાયુષમ્ ॥ 4 ॥
ભાર્યાવિયોગજં દુઃખં ન ચિરાત્ત્વં વિમોક્ષ્યસે ।
અહં તામાનયિષ્યામિ નષ્ટાં વેદશ્રુતીમિવ ॥ 5 ॥
રસાતલે વા વર્તંતીં વર્તંતી વા નભસ્થલે અહમાનીય દાસ્યામિ તવ ભાર્યામરિંદમ ॥ 6 ॥
ઇદં તથ્યં મમ વચસ્ત્વમવેહિ ચ રાઘવ ।
ન શક્યા સા જરયિતું સેંદ્રૈરપિ સ્સુરાસુરૈઃ ॥ 7 ॥
તવ ભાર્યા મહાબાહો ભક્ષ્યં વિષકૃતં યથા ।
ત્યજ શોકં મહાબાહો તાં કાંતામાનયામિ તે ॥ 8 ॥
અનુમાનાત્તુ જાનામિ મૈથિલી સા ન સંશયઃ ।
હ્રિયમાણા મયા દૃષ્ટા રક્ષસા ક્રૂરકર્મણા ॥ 9 ॥
ક્રોશંતી રામ રામેતિ લક્ષ્મણેતિ ચ વિસ્વરમ્ ।
સ્ફુરંતી રાવણસ્યાંકે પન્નગેંદ્રવધૂર્યથા ॥ 10 ॥
આત્મના પંચમં માં હિ દૃષ્ટ્વા શૈલતટે સ્થિતમ્ ।
ઉત્તરીયં તયા ત્યક્તં શુભાન્યાભરણાનિ ચ ॥ 11 ॥
તાન્યસ્માભિગૃહીતાનિ નિહિતાનિ ચ રાઘવ ।
આનયિષ્યામ્યહં તાનિ પ્રત્યભિજ્ઞાતુમર્હસિ ॥ 12 ॥
તમબ્રવીત્તતો રામસ્સુગ્રીવં પ્રિયવાદિનમ્ ।
આનયસ્વ સખે શીઘ્રં કિમર્થં પ્રવિલંબસે ॥ 13 ॥
એવમુક્તસ્તુ સુગ્રીવશ્શૈલસ્ય ગહનાં ગુહામ્ ।
પ્રવિવેશ તતશશીઘ્રં રાઘવપ્રિયકામ્યયા ॥ 14 ॥
ઉત્તરીયં ગૃહીત્વા તુ શુભાન્યાભરણાનિ ચ ।
ઇદં પશ્યેતિ રામાય દર્શયામાસ વાનરઃ ॥ 15 ॥
તતો ગૃહીત્વા વાસસ્તુ શ્શુભાન્યાભરણાનિ ચ ।
અભવદ્બાષ્પસંરુદ્ધો નીહારેણેવ ચંદ્રમાઃ ॥ 16 ॥
સીતાસ્નેહપ્રવૃત્તેન સ તુ બાષ્પેણ દૂષિતઃ ।
હા પ્રિયેતિ રુદંધૈર્યમુત્સૃજ્ય ન્યપતત્ક્ષિતૌ ॥ 17 ॥
હૃદિ કૃત્વા તુ બહુશસ્તમલંકારમુત્તમમ્ ।
નિશશ્વાસ ભૃશં સર્પો બિલસ્થ ઇવ રોષિતઃ ॥ 18 ॥
અવિચ્છિન્નાશ્રુવેગસ્તુ સૌમિત્રિં વીક્ષ્ય પાર્શ્વતઃ ।
પરિદેવયિતું દીનં રામસ્સમુપચક્રમે ॥ 19 ॥
પશ્ય લક્ષ્મણ વૈદેહ્યા સંત્યક્તં હ્રિયમાણયા ।
ઉત્તરીયમિદં ભૂમૌ શરીરાદ્ભૂષણાનિ ચ ॥ 20 ॥
શાદ્વલિન્યાં ધ્રુવં ભૂમૌ સીતયા હ્રિયમાણયા ।
ઉત્સૃષ્ટં ભૂષણમિદં તથારૂપં હિ દૃશ્યતે ॥ 21 ॥
એવમુક્તસ્તુ રામેણ લક્ષ્મણો વાક્યમબ્રવીત્ ।
નાહં જાનામિ કેયૂરે નાહં જાનામિ કુંડલે ॥ 22 ॥
નૂપુરે ત્વભિજાનામિ નિત્યં પાદાભિવંદનાત્ ।
તતસ્તુ રાઘવો વાક્યં સુગ્રીવમિદમબ્રવીત્ ॥ 23 ॥
બ્રૂહિ સુગ્રીવ કં દેશં હ્રિયંતી લક્ષિતા ત્વયા ।
રક્ષસા રૌદ્રરૂપેણ મમ પ્રાણૈઃ પ્રિયા પ્રિયા ॥ 24 ॥
ક્વ વા વસતિ તદ્રક્ષો મહદ્વ્યસનદં મમ ।
યન્નિમિત્તમહં સર્વાન્નાશયિષ્યામિ રાક્ષસાન્ ॥ 25 ॥
હરતા મૈથિલીં યેન માં ચ રોષયતા ભૃશમ્ ।
આત્મનો જીવિતાંતાય મૃત્યુદ્વારમપાવૃતમ્ ॥ 26 ॥
મમ દયિતતરા હૃતા વનાંતા દ્રજનિચરેણ વિમથ્ય યેન સા ।
કથય મમ રિપું તમદ્ય વૈ પ્લવગપતે યમસાદનં નયામિ ॥ 27 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે ષષ્ઠસ્સર્ગઃ ॥
