ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ෂෂ්ඨස්සර්ගඃ ।
පුනරේවාබ්රවීත්ප්රීතෝ රාඝවං රඝුනංදනම් ।
අයමාඛ්යාති මේ රාම සචිවෝ මංත්රිසත්තමඃ ॥ 1 ॥
හනුමාන්යන්නිමිත්තං ත්වං නිර්ජනං වනමාගතඃ ।
ලක්ෂ්මණේන සහ භ්රාත්රා වසතශ්ච වනේ තව ॥ 2 ॥
රක්ෂසාऽපහෘතා භාර්යා මෛථිලී ජනකාත්මජා ।
ත්වයා වියුක්තා රුදතී ලක්ෂ්මණේන ච ධීමතා ॥ 3 ॥
අංතරප්රේප්සුනා තේන හත්වා ගෘධ්රං ජටායුෂම් ॥ 4 ॥
භාර්යාවියෝගජං දුඃඛං න චිරාත්ත්වං විමෝක්ෂ්යසේ ।
අහං තාමානයිෂ්යාමි නෂ්ටාං වේදශ්රුතීමිව ॥ 5 ॥
රසාතලේ වා වර්තංතීං වර්තංතී වා නභස්ථලේ අහමානීය දාස්යාමි තව භාර්යාමරිංදම ॥ 6 ॥
ඉදං තථ්යං මම වචස්ත්වමවේහි ච රාඝව ।
න ශක්යා සා ජරයිතුං සේංද්රෛරපි ස්සුරාසුරෛඃ ॥ 7 ॥
තව භාර්යා මහාබාහෝ භක්ෂ්යං විෂකෘතං යථා ।
ත්යජ ශෝකං මහාබාහෝ තාං කාංතාමානයාමි තේ ॥ 8 ॥
අනුමානාත්තු ජානාමි මෛථිලී සා න සංශයඃ ।
හ්රියමාණා මයා දෘෂ්ටා රක්ෂසා ක්රූරකර්මණා ॥ 9 ॥
ක්රෝශංතී රාම රාමේති ලක්ෂ්මණේති ච විස්වරම් ।
ස්ඵුරංතී රාවණස්යාංකේ පන්නගේංද්රවධූර්යථා ॥ 10 ॥
ආත්මනා පංචමං මාං හි දෘෂ්ට්වා ශෛලතටේ ස්ථිතම් ।
උත්තරීයං තයා ත්යක්තං ශුභාන්යාභරණානි ච ॥ 11 ॥
තාන්යස්මාභිගෘහීතානි නිහිතානි ච රාඝව ।
ආනයිෂ්යාම්යහං තානි ප්රත්යභිජ්ඤාතුමර්හසි ॥ 12 ॥
තමබ්රවීත්තතෝ රාමස්සුග්රීවං ප්රියවාදිනම් ।
ආනයස්ව සඛේ ශීඝ්රං කිමර්ථං ප්රවිලංබසේ ॥ 13 ॥
ඒවමුක්තස්තු සුග්රීවශ්ශෛලස්ය ගහනාං ගුහාම් ।
ප්රවිවේශ තතශශීඝ්රං රාඝවප්රියකාම්යයා ॥ 14 ॥
උත්තරීයං ගෘහීත්වා තු ශුභාන්යාභරණානි ච ।
ඉදං පශ්යේති රාමාය දර්ශයාමාස වානරඃ ॥ 15 ॥
තතෝ ගෘහීත්වා වාසස්තු ශ්ශුභාන්යාභරණානි ච ।
අභවද්බාෂ්පසංරුද්ධෝ නීහාරේණේව චංද්රමාඃ ॥ 16 ॥
සීතාස්නේහප්රවෘත්තේන ස තු බාෂ්පේණ දූෂිතඃ ।
හා ප්රියේති රුදංධෛර්යමුත්සෘජ්ය න්යපතත්ක්ෂිතෞ ॥ 17 ॥
හෘදි කෘත්වා තු බහුශස්තමලංකාරමුත්තමම් ।
නිශශ්වාස භෘශං සර්පෝ බිලස්ථ ඉව රෝෂිතඃ ॥ 18 ॥
අවිච්ඡින්නාශ්රුවේගස්තු සෞමිත්රිං වීක්ෂ්ය පාර්ශ්වතඃ ।
පරිදේවයිතුං දීනං රාමස්සමුපචක්රමේ ॥ 19 ॥
පශ්ය ලක්ෂ්මණ වෛදේහ්යා සංත්යක්තං හ්රියමාණයා ।
උත්තරීයමිදං භූමෞ ශරීරාද්භූෂණානි ච ॥ 20 ॥
ශාද්වලින්යාං ධ්රුවං භූමෞ සීතයා හ්රියමාණයා ।
උත්සෘෂ්ටං භූෂණමිදං තථාරූපං හි දෘශ්යතේ ॥ 21 ॥
ඒවමුක්තස්තු රාමේණ ලක්ෂ්මණෝ වාක්යමබ්රවීත් ।
නාහං ජානාමි කේයූරේ නාහං ජානාමි කුංඩලේ ॥ 22 ॥
නූපුරේ ත්වභිජානාමි නිත්යං පාදාභිවංදනාත් ।
තතස්තු රාඝවෝ වාක්යං සුග්රීවමිදමබ්රවීත් ॥ 23 ॥
බ්රූහි සුග්රීව කං දේශං හ්රියංතී ලක්ෂිතා ත්වයා ।
රක්ෂසා රෞද්රරූපේණ මම ප්රාණෛඃ ප්රියා ප්රියා ॥ 24 ॥
ක්ව වා වසති තද්රක්ෂෝ මහද්ව්යසනදං මම ।
යන්නිමිත්තමහං සර්වාන්නාශයිෂ්යාමි රාක්ෂසාන් ॥ 25 ॥
හරතා මෛථිලීං යේන මාං ච රෝෂයතා භෘශම් ।
ආත්මනෝ ජීවිතාංතාය මෘත්යුද්වාරමපාවෘතම් ॥ 26 ॥
මම දයිතතරා හෘතා වනාංතා ද්රජනිචරේණ විමථ්ය යේන සා ।
කථය මම රිපුං තමද්ය වෛ ප්ලවගපතේ යමසාදනං නයාමි ॥ 27 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ෂෂ්ඨස්සර්ගඃ ॥
