ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ଷଷ୍ଠସ୍ସର୍ଗଃ ।
ପୁନରେଵାବ୍ରଵୀତ୍ପ୍ରୀତୋ ରାଘଵଂ ରଘୁନଂଦନମ୍ ।
ଅୟମାଖ୍ୟାତି ମେ ରାମ ସଚିଵୋ ମଂତ୍ରିସତ୍ତମଃ ॥ 1 ॥
ହନୁମାନ୍ୟନ୍ନିମିତ୍ତଂ ତ୍ଵଂ ନିର୍ଜନଂ ଵନମାଗତଃ ।
ଲକ୍ଷ୍ମଣେନ ସହ ଭ୍ରାତ୍ରା ଵସତଶ୍ଚ ଵନେ ତଵ ॥ 2 ॥
ରକ୍ଷସାଽପହୃତା ଭାର୍ୟା ମୈଥିଲୀ ଜନକାତ୍ମଜା ।
ତ୍ଵୟା ଵିୟୁକ୍ତା ରୁଦତୀ ଲକ୍ଷ୍ମଣେନ ଚ ଧୀମତା ॥ 3 ॥
ଅଂତରପ୍ରେପ୍ସୁନା ତେନ ହତ୍ଵା ଗୃଧ୍ରଂ ଜଟାୟୁଷମ୍ ॥ 4 ॥
ଭାର୍ୟାଵିୟୋଗଜଂ ଦୁଃଖଂ ନ ଚିରାତ୍ତ୍ଵଂ ଵିମୋକ୍ଷ୍ୟସେ ।
ଅହଂ ତାମାନୟିଷ୍ୟାମି ନଷ୍ଟାଂ ଵେଦଶ୍ରୁତୀମିଵ ॥ 5 ॥
ରସାତଲେ ଵା ଵର୍ତଂତୀଂ ଵର୍ତଂତୀ ଵା ନଭସ୍ଥଲେ ଅହମାନୀୟ ଦାସ୍ୟାମି ତଵ ଭାର୍ୟାମରିଂଦମ ॥ 6 ॥
ଇଦଂ ତଥ୍ୟଂ ମମ ଵଚସ୍ତ୍ଵମଵେହି ଚ ରାଘଵ ।
ନ ଶକ୍ୟା ସା ଜରୟିତୁଂ ସେଂଦ୍ରୈରପି ସ୍ସୁରାସୁରୈଃ ॥ 7 ॥
ତଵ ଭାର୍ୟା ମହାବାହୋ ଭକ୍ଷ୍ୟଂ ଵିଷକୃତଂ ୟଥା ।
ତ୍ୟଜ ଶୋକଂ ମହାବାହୋ ତାଂ କାଂତାମାନୟାମି ତେ ॥ 8 ॥
ଅନୁମାନାତ୍ତୁ ଜାନାମି ମୈଥିଲୀ ସା ନ ସଂଶୟଃ ।
ହ୍ରିୟମାଣା ମୟା ଦୃଷ୍ଟା ରକ୍ଷସା କ୍ରୂରକର୍ମଣା ॥ 9 ॥
କ୍ରୋଶଂତୀ ରାମ ରାମେତି ଲକ୍ଷ୍ମଣେତି ଚ ଵିସ୍ଵରମ୍ ।
ସ୍ଫୁରଂତୀ ରାଵଣସ୍ୟାଂକେ ପନ୍ନଗେଂଦ୍ରଵଧୂର୍ୟଥା ॥ 10 ॥
ଆତ୍ମନା ପଂଚମଂ ମାଂ ହି ଦୃଷ୍ଟ୍ଵା ଶୈଲତଟେ ସ୍ଥିତମ୍ ।
ଉତ୍ତରୀୟଂ ତୟା ତ୍ୟକ୍ତଂ ଶୁଭାନ୍ୟାଭରଣାନି ଚ ॥ 11 ॥
ତାନ୍ୟସ୍ମାଭିଗୃହୀତାନି ନିହିତାନି ଚ ରାଘଵ ।
ଆନୟିଷ୍ୟାମ୍ୟହଂ ତାନି ପ୍ରତ୍ୟଭିଜ୍ଞାତୁମର୍ହସି ॥ 12 ॥
ତମବ୍ରଵୀତ୍ତତୋ ରାମସ୍ସୁଗ୍ରୀଵଂ ପ୍ରିୟଵାଦିନମ୍ ।
ଆନୟସ୍ଵ ସଖେ ଶୀଘ୍ରଂ କିମର୍ଥଂ ପ୍ରଵିଲଂବସେ ॥ 13 ॥
ଏଵମୁକ୍ତସ୍ତୁ ସୁଗ୍ରୀଵଶ୍ଶୈଲସ୍ୟ ଗହନାଂ ଗୁହାମ୍ ।
ପ୍ରଵିଵେଶ ତତଶଶୀଘ୍ରଂ ରାଘଵପ୍ରିୟକାମ୍ୟୟା ॥ 14 ॥
ଉତ୍ତରୀୟଂ ଗୃହୀତ୍ଵା ତୁ ଶୁଭାନ୍ୟାଭରଣାନି ଚ ।
ଇଦଂ ପଶ୍ୟେତି ରାମାୟ ଦର୍ଶୟାମାସ ଵାନରଃ ॥ 15 ॥
ତତୋ ଗୃହୀତ୍ଵା ଵାସସ୍ତୁ ଶ୍ଶୁଭାନ୍ୟାଭରଣାନି ଚ ।
ଅଭଵଦ୍ବାଷ୍ପସଂରୁଦ୍ଧୋ ନୀହାରେଣେଵ ଚଂଦ୍ରମାଃ ॥ 16 ॥
ସୀତାସ୍ନେହପ୍ରଵୃତ୍ତେନ ସ ତୁ ବାଷ୍ପେଣ ଦୂଷିତଃ ।
ହା ପ୍ରିୟେତି ରୁଦଂଧୈର୍ୟମୁତ୍ସୃଜ୍ୟ ନ୍ୟପତତ୍କ୍ଷିତୌ ॥ 17 ॥
ହୃଦି କୃତ୍ଵା ତୁ ବହୁଶସ୍ତମଲଂକାରମୁତ୍ତମମ୍ ।
ନିଶଶ୍ଵାସ ଭୃଶଂ ସର୍ପୋ ବିଲସ୍ଥ ଇଵ ରୋଷିତଃ ॥ 18 ॥
ଅଵିଚ୍ଛିନ୍ନାଶ୍ରୁଵେଗସ୍ତୁ ସୌମିତ୍ରିଂ ଵୀକ୍ଷ୍ୟ ପାର୍ଶ୍ଵତଃ ।
ପରିଦେଵୟିତୁଂ ଦୀନଂ ରାମସ୍ସମୁପଚକ୍ରମେ ॥ 19 ॥
ପଶ୍ୟ ଲକ୍ଷ୍ମଣ ଵୈଦେହ୍ୟା ସଂତ୍ୟକ୍ତଂ ହ୍ରିୟମାଣୟା ।
ଉତ୍ତରୀୟମିଦଂ ଭୂମୌ ଶରୀରାଦ୍ଭୂଷଣାନି ଚ ॥ 20 ॥
ଶାଦ୍ଵଲିନ୍ୟାଂ ଧ୍ରୁଵଂ ଭୂମୌ ସୀତୟା ହ୍ରିୟମାଣୟା ।
ଉତ୍ସୃଷ୍ଟଂ ଭୂଷଣମିଦଂ ତଥାରୂପଂ ହି ଦୃଶ୍ୟତେ ॥ 21 ॥
ଏଵମୁକ୍ତସ୍ତୁ ରାମେଣ ଲକ୍ଷ୍ମଣୋ ଵାକ୍ୟମବ୍ରଵୀତ୍ ।
ନାହଂ ଜାନାମି କେୟୂରେ ନାହଂ ଜାନାମି କୁଂଡଲେ ॥ 22 ॥
ନୂପୁରେ ତ୍ଵଭିଜାନାମି ନିତ୍ୟଂ ପାଦାଭିଵଂଦନାତ୍ ।
ତତସ୍ତୁ ରାଘଵୋ ଵାକ୍ୟଂ ସୁଗ୍ରୀଵମିଦମବ୍ରଵୀତ୍ ॥ 23 ॥
ବ୍ରୂହି ସୁଗ୍ରୀଵ କଂ ଦେଶଂ ହ୍ରିୟଂତୀ ଲକ୍ଷିତା ତ୍ଵୟା ।
ରକ୍ଷସା ରୌଦ୍ରରୂପେଣ ମମ ପ୍ରାଣୈଃ ପ୍ରିୟା ପ୍ରିୟା ॥ 24 ॥
କ୍ଵ ଵା ଵସତି ତଦ୍ରକ୍ଷୋ ମହଦ୍ଵ୍ୟସନଦଂ ମମ ।
ୟନ୍ନିମିତ୍ତମହଂ ସର୍ଵାନ୍ନାଶୟିଷ୍ୟାମି ରାକ୍ଷସାନ୍ ॥ 25 ॥
ହରତା ମୈଥିଲୀଂ ୟେନ ମାଂ ଚ ରୋଷୟତା ଭୃଶମ୍ ।
ଆତ୍ମନୋ ଜୀଵିତାଂତାୟ ମୃତ୍ୟୁଦ୍ଵାରମପାଵୃତମ୍ ॥ 26 ॥
ମମ ଦୟିତତରା ହୃତା ଵନାଂତା ଦ୍ରଜନିଚରେଣ ଵିମଥ୍ୟ ୟେନ ସା ।
କଥୟ ମମ ରିପୁଂ ତମଦ୍ୟ ଵୈ ପ୍ଲଵଗପତେ ୟମସାଦନଂ ନୟାମି ॥ 27 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ଷଷ୍ଠସ୍ସର୍ଗଃ ॥
