śrīmadvālmīkīya rāmāyaṇē kiṣkindhākāṇḍam ।
atha ṣaṣṭhassargaḥ ।
punarēvābravītprītō rāghavaṃ raghunandanam ।
ayamākhyāti mē rāma sachivō mantrisattamaḥ ॥ 1 ॥
hanumānyannimittaṃ tvaṃ nirjanaṃ vanamāgataḥ ।
lakṣmaṇēna saha bhrātrā vasataścha vanē tava ॥ 2 ॥
rakṣasā'pahṛtā bhāryā maithilī janakātmajā ।
tvayā viyuktā rudatī lakṣmaṇēna cha dhīmatā ॥ 3 ॥
antaraprēpsunā tēna hatvā gṛdhraṃ jaṭāyuṣam ॥ 4 ॥
bhāryāviyōgajaṃ duḥkhaṃ na chirāttvaṃ vimōkṣyasē ।
ahaṃ tāmānayiṣyāmi naṣṭāṃ vēdaśrutīmiva ॥ 5 ॥
rasātalē vā vartantīṃ vartantī vā nabhasthalē ahamānīya dāsyāmi tava bhāryāmarindama ॥ 6 ॥
idaṃ tathyaṃ mama vachastvamavēhi cha rāghava ।
na śakyā sā jarayituṃ sēndrairapi ssurāsuraiḥ ॥ 7 ॥
tava bhāryā mahābāhō bhakṣyaṃ viṣakṛtaṃ yathā ।
tyaja śōkaṃ mahābāhō tāṃ kāntāmānayāmi tē ॥ 8 ॥
anumānāttu jānāmi maithilī sā na saṃśayaḥ ।
hriyamāṇā mayā dṛṣṭā rakṣasā krūrakarmaṇā ॥ 9 ॥
krōśantī rāma rāmēti lakṣmaṇēti cha visvaram ।
sphurantī rāvaṇasyāṅkē pannagēndravadhūryathā ॥ 10 ॥
ātmanā pañchamaṃ māṃ hi dṛṣṭvā śailataṭē sthitam ।
uttarīyaṃ tayā tyaktaṃ śubhānyābharaṇāni cha ॥ 11 ॥
tānyasmābhigṛhītāni nihitāni cha rāghava ।
ānayiṣyāmyahaṃ tāni pratyabhijñātumarhasi ॥ 12 ॥
tamabravīttatō rāmassugrīvaṃ priyavādinam ।
ānayasva sakhē śīghraṃ kimarthaṃ pravilambasē ॥ 13 ॥
ēvamuktastu sugrīvaśśailasya gahanāṃ guhām ।
pravivēśa tataśaśīghraṃ rāghavapriyakāmyayā ॥ 14 ॥
uttarīyaṃ gṛhītvā tu śubhānyābharaṇāni cha ।
idaṃ paśyēti rāmāya darśayāmāsa vānaraḥ ॥ 15 ॥
tatō gṛhītvā vāsastu śśubhānyābharaṇāni cha ।
abhavadbāṣpasaṃruddhō nīhārēṇēva chandramāḥ ॥ 16 ॥
sītāsnēhapravṛttēna sa tu bāṣpēṇa dūṣitaḥ ।
hā priyēti rudandhairyamutsṛjya nyapatatkṣitau ॥ 17 ॥
hṛdi kṛtvā tu bahuśastamalaṅkāramuttamam ।
niśaśvāsa bhṛśaṃ sarpō bilastha iva rōṣitaḥ ॥ 18 ॥
avichChinnāśruvēgastu saumitriṃ vīkṣya pārśvataḥ ।
paridēvayituṃ dīnaṃ rāmassamupachakramē ॥ 19 ॥
paśya lakṣmaṇa vaidēhyā santyaktaṃ hriyamāṇayā ।
uttarīyamidaṃ bhūmau śarīrādbhūṣaṇāni cha ॥ 20 ॥
śādvalinyāṃ dhruvaṃ bhūmau sītayā hriyamāṇayā ।
utsṛṣṭaṃ bhūṣaṇamidaṃ tathārūpaṃ hi dṛśyatē ॥ 21 ॥
ēvamuktastu rāmēṇa lakṣmaṇō vākyamabravīt ।
nāhaṃ jānāmi kēyūrē nāhaṃ jānāmi kuṇḍalē ॥ 22 ॥
nūpurē tvabhijānāmi nityaṃ pādābhivandanāt ।
tatastu rāghavō vākyaṃ sugrīvamidamabravīt ॥ 23 ॥
brūhi sugrīva kaṃ dēśaṃ hriyantī lakṣitā tvayā ।
rakṣasā raudrarūpēṇa mama prāṇaiḥ priyā priyā ॥ 24 ॥
kva vā vasati tadrakṣō mahadvyasanadaṃ mama ।
yannimittamahaṃ sarvānnāśayiṣyāmi rākṣasān ॥ 25 ॥
haratā maithilīṃ yēna māṃ cha rōṣayatā bhṛśam ।
ātmanō jīvitāntāya mṛtyudvāramapāvṛtam ॥ 26 ॥
mama dayitatarā hṛtā vanāntā drajanicharēṇa vimathya yēna sā ।
kathaya mama ripuṃ tamadya vai plavagapatē yamasādanaṃ nayāmi ॥ 27 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē ṣaṣṭhassargaḥ ॥
