ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ ഷഷ്ഠസ്സര്ഗഃ ।
പുനരേവാബ്രവീത്പ്രീതോ രാഘവം രഘുനംദനമ് ।
അയമാഖ്യാതി മേ രാമ സചിവോ മംത്രിസത്തമഃ ॥ 1 ॥
ഹനുമാന്യന്നിമിത്തം ത്വം നിര്ജനം വനമാഗതഃ ।
ലക്ഷ്മണേന സഹ ഭ്രാത്രാ വസതശ്ച വനേ തവ ॥ 2 ॥
രക്ഷസാഽപഹൃതാ ഭാര്യാ മൈഥിലീ ജനകാത്മജാ ।
ത്വയാ വിയുക്താ രുദതീ ലക്ഷ്മണേന ച ധീമതാ ॥ 3 ॥
അംതരപ്രേപ്സുനാ തേന ഹത്വാ ഗൃധ്രം ജടായുഷമ് ॥ 4 ॥
ഭാര്യാവിയോഗജം ദുഃഖം ന ചിരാത്ത്വം വിമോക്ഷ്യസേ ।
അഹം താമാനയിഷ്യാമി നഷ്ടാം വേദശ്രുതീമിവ ॥ 5 ॥
രസാതലേ വാ വര്തംതീം വര്തംതീ വാ നഭസ്ഥലേ അഹമാനീയ ദാസ്യാമി തവ ഭാര്യാമരിംദമ ॥ 6 ॥
ഇദം തഥ്യം മമ വചസ്ത്വമവേഹി ച രാഘവ ।
ന ശക്യാ സാ ജരയിതും സേംദ്രൈരപി സ്സുരാസുരൈഃ ॥ 7 ॥
തവ ഭാര്യാ മഹാബാഹോ ഭക്ഷ്യം വിഷകൃതം യഥാ ।
ത്യജ ശോകം മഹാബാഹോ താം കാംതാമാനയാമി തേ ॥ 8 ॥
അനുമാനാത്തു ജാനാമി മൈഥിലീ സാ ന സംശയഃ ।
ഹ്രിയമാണാ മയാ ദൃഷ്ടാ രക്ഷസാ ക്രൂരകര്മണാ ॥ 9 ॥
ക്രോശംതീ രാമ രാമേതി ലക്ഷ്മണേതി ച വിസ്വരമ് ।
സ്ഫുരംതീ രാവണസ്യാംകേ പന്നഗേംദ്രവധൂര്യഥാ ॥ 10 ॥
ആത്മനാ പംചമം മാം ഹി ദൃഷ്ട്വാ ശൈലതടേ സ്ഥിതമ് ।
ഉത്തരീയം തയാ ത്യക്തം ശുഭാന്യാഭരണാനി ച ॥ 11 ॥
താന്യസ്മാഭിഗൃഹീതാനി നിഹിതാനി ച രാഘവ ।
ആനയിഷ്യാമ്യഹം താനി പ്രത്യഭിജ്ഞാതുമര്ഹസി ॥ 12 ॥
തമബ്രവീത്തതോ രാമസ്സുഗ്രീവം പ്രിയവാദിനമ് ।
ആനയസ്വ സഖേ ശീഘ്രം കിമര്ഥം പ്രവിലംബസേ ॥ 13 ॥
ഏവമുക്തസ്തു സുഗ്രീവശ്ശൈലസ്യ ഗഹനാം ഗുഹാമ് ।
പ്രവിവേശ തതശശീഘ്രം രാഘവപ്രിയകാമ്യയാ ॥ 14 ॥
ഉത്തരീയം ഗൃഹീത്വാ തു ശുഭാന്യാഭരണാനി ച ।
ഇദം പശ്യേതി രാമായ ദര്ശയാമാസ വാനരഃ ॥ 15 ॥
തതോ ഗൃഹീത്വാ വാസസ്തു ശ്ശുഭാന്യാഭരണാനി ച ।
അഭവദ്ബാഷ്പസംരുദ്ധോ നീഹാരേണേവ ചംദ്രമാഃ ॥ 16 ॥
സീതാസ്നേഹപ്രവൃത്തേന സ തു ബാഷ്പേണ ദൂഷിതഃ ।
ഹാ പ്രിയേതി രുദംധൈര്യമുത്സൃജ്യ ന്യപതത്ക്ഷിതൌ ॥ 17 ॥
ഹൃദി കൃത്വാ തു ബഹുശസ്തമലംകാരമുത്തമമ് ।
നിശശ്വാസ ഭൃശം സര്പോ ബിലസ്ഥ ഇവ രോഷിതഃ ॥ 18 ॥
അവിച്ഛിന്നാശ്രുവേഗസ്തു സൌമിത്രിം വീക്ഷ്യ പാര്ശ്വതഃ ।
പരിദേവയിതും ദീനം രാമസ്സമുപചക്രമേ ॥ 19 ॥
പശ്യ ലക്ഷ്മണ വൈദേഹ്യാ സംത്യക്തം ഹ്രിയമാണയാ ।
ഉത്തരീയമിദം ഭൂമൌ ശരീരാദ്ഭൂഷണാനി ച ॥ 20 ॥
ശാദ്വലിന്യാം ധ്രുവം ഭൂമൌ സീതയാ ഹ്രിയമാണയാ ।
ഉത്സൃഷ്ടം ഭൂഷണമിദം തഥാരൂപം ഹി ദൃശ്യതേ ॥ 21 ॥
ഏവമുക്തസ്തു രാമേണ ലക്ഷ്മണോ വാക്യമബ്രവീത് ।
നാഹം ജാനാമി കേയൂരേ നാഹം ജാനാമി കുംഡലേ ॥ 22 ॥
നൂപുരേ ത്വഭിജാനാമി നിത്യം പാദാഭിവംദനാത് ।
തതസ്തു രാഘവോ വാക്യം സുഗ്രീവമിദമബ്രവീത് ॥ 23 ॥
ബ്രൂഹി സുഗ്രീവ കം ദേശം ഹ്രിയംതീ ലക്ഷിതാ ത്വയാ ।
രക്ഷസാ രൌദ്രരൂപേണ മമ പ്രാണൈഃ പ്രിയാ പ്രിയാ ॥ 24 ॥
ക്വ വാ വസതി തദ്രക്ഷോ മഹദ്വ്യസനദം മമ ।
യന്നിമിത്തമഹം സർവാന്നാശയിഷ്യാമി രാക്ഷസാന് ॥ 25 ॥
ഹരതാ മൈഥിലീം യേന മാം ച രോഷയതാ ഭൃശമ് ।
ആത്മനോ ജീവിതാംതായ മൃത്യുദ്വാരമപാവൃതമ് ॥ 26 ॥
മമ ദയിതതരാ ഹൃതാ വനാംതാ ദ്രജനിചരേണ വിമഥ്യ യേന സാ ।
കഥയ മമ രിപും തമദ്യ വൈ പ്ലവഗപതേ യമസാദനം നയാമി ॥ 27 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ ഷഷ്ഠസ്സര്ഗഃ ॥
