ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ସପ୍ତଦଶସ୍ସର୍ଗଃ ।
ପୁତ୍ରତ୍ଵଂ ତୁ ଗତେ ଵିଷ୍ଣୌ ରାଜ୍ଞସ୍ତସ୍ୟ ସୁମହାତ୍ମନଃ ।
ଉଵାଚ ଦେଵତାସ୍ସର୍ଵାସ୍ସ୍ଵୟଂଭୂର୍ଭଗଵାନିଦମ୍ ॥ 1 ॥
ସତ୍ୟସଂଧସ୍ୟ ଵୀରସ୍ୟ ସର୍ଵେଷାନ୍ନୋ ହିତୈଷିଣଃ ।
ଵିଷ୍ଣୋସ୍ସହାୟାନ୍ବଲିନସ୍ସୃଜଧ୍ଵଂ କାମରୂପିଣଃ ॥ 2 ॥
ମାୟାଵିଦଶ୍ଚ ଶୂରାଂଶ୍ଚ ଵାୟୁଵେଗସମାଂଜଵେ ।
ନୟଜ୍ଞାନ୍ବୁଦ୍ଧିସଂପନ୍ନାନ୍ଵିଷ୍ଣୁତୁଲ୍ୟପରାକ୍ରମାନ୍ ॥ 3 ॥
ଅସଂହାର୍ୟାନୁପାୟଜ୍ଞାନ୍ ଦିଵ୍ୟସଂହନନାନ୍ଵିତାନ୍ ।
ସର୍ଵାସ୍ତ୍ରଗୁଣସଂପନ୍ନାନମୃତପ୍ରାଶନାନିଵ ॥ 4 ॥
ଅପ୍ସରସ୍ସୁ ଚ ମୁଖ୍ୟାସୁ ଗଂଧର୍ଵାଣାଂ ତନୂଷୁ ଚ ।
ସୃଜଧ୍ଵଂ ହରିରୂପେଣ ପୁତ୍ରାଂସ୍ତୁଲ୍ୟପରାକ୍ରମାନ୍ ॥ 5 ॥
ପୂର୍ଵମେଵ ମୟା ସୃଷ୍ଟୋ ଜାଂବଵାନୃକ୍ଷପୁଂଗଵଃ ।
ଜୃଂଭମାଣସ୍ୟ ସହସା ମମ ଵକ୍ତ୍ରାଦଜାୟତ ॥ 6 ॥
ତେ ତଥୋକ୍ତା ଭଗଵତା ତତ୍ପ୍ରତିଶ୍ରୁତ୍ୟ ଶାସନମ୍ ।
ଜନୟାମାସୁରେଵଂ ତେ ପୁତ୍ରାନ୍ଵାନରରୂପିଣଃ ॥ 7 ॥
ଋଷୟଶ୍ଚ ମହାତ୍ମାନସ୍ସିଦ୍ଧଵିଦ୍ୟାଧରୋରଗାଃ ।
ଚାରଣାଶ୍ଚ ସୁତାନ୍ଵୀରାନ୍ସସୃଜୁର୍ଵନଚାରିଣଃ ॥ 8 ॥
ଵାନରେଂଦ୍ରଂ ମହେଂଦ୍ରାଭମିଂଦ୍ରୋ ଵାଲିନମୂର୍ଜିତମ୍ ।
ସୁଗ୍ରୀଵଂ ଜନୟାମାସ ତପନସ୍ତପତାଂ ଵରଃ ॥ 9 ॥
ବୃହସ୍ପତିସ୍ତ୍ଵଜନୟତ୍ତାରଂ ନାମ ମହାହରିମ୍ ।
ସର୍ଵଵାନରମୁଖ୍ୟାନାଂ ବୁଦ୍ଧିମଂତମନୁତ୍ତମମ୍ ॥ 10 ॥
ଧନଦସ୍ୟ ସୁତଶ୍ଶ୍ରୀମାନ୍ ଵାନରୋ ଗଂଧମାଦନଃ ।
ଵିଶ୍ଵକର୍ମାତ୍ଵଜନୟନ୍ନଲଂ ନାମ ମହାହରିମ୍ ॥ 11 ॥
ପାଵକସ୍ୟ ସୁତଶ୍ଶ୍ରୀମାନ୍ ନୀଲୋଽଗ୍ନିସଦୃଶପ୍ରଭଃ ।
ତେଜସା ୟଶସା ଵୀର୍ୟାଦତ୍ୟରିଚ୍ୟତ ଵାନରାନ୍ ॥ 12 ॥
ରୂପଦ୍ରଵିଣସଂପନ୍ନାଵଶ୍ଵିନୌ ରୂପସମ୍ମତୌ ।
ମୈଂଦଂ ଚ ଦ୍ଵିଵିଦଂ ଚୈଵ ଜନୟାମାସତୁସ୍ସ୍ଵୟମ୍ ॥ 13 ॥
ଵରୁଣୋ ଜନୟାମାସ ସୁଷେଣଂ ଵାନରର୍ଷଭମ୍ ।
ଶରଭଂ ଜନୟାମାସ ପର୍ଜନ୍ୟସ୍ତୁ ମହାବଲମ୍ ॥ 14 ॥
ମାରୁତସ୍ୟାତ୍ମଜଶ୍ଶ୍ରୀମାନ୍ହନୁମାନ୍ନାମ ଵୀର୍ୟଵାନ୍ ।
ଵଜ୍ରସଂହନନୋପେତୋ ଵୈନତେୟସମୋ ଜଵେ ॥ 15 ॥
ତେ ସୃଷ୍ଟା ବହୁସାହସ୍ରା ଦଶଗ୍ରୀଵଵଧେ ରତାଃ ।
ଅପ୍ରମେୟବଲା ଵୀରା ଵିକ୍ରାଂତାଃ କାମରୂପିଣଃ ॥ 16 ॥
ମେରୁମଂଦରସଂକାଶା ଵପୁଷ୍ମଂତୋ ମହାବଲାଃ ।
ଋକ୍ଷଵାନରଗୋପୁଚ୍ଛାଃ କ୍ଷିପ୍ରମେଵାଭିଜଜ୍ଞିରେ ॥ 17 ॥
ୟସ୍ୟ ଦେଵସ୍ୟ ୟଦ୍ରୂପଂ ଵେଷୋ ୟଶ୍ଚ ପରାକ୍ରମଃ ।
ଅଜାୟତ ସମସ୍ତେନ ତସ୍ୟ ତସ୍ୟ ସୁତଃ ପୃଥକ୍ ॥ 18 ॥
ଗୋଲାଂଗୂଲୀଷୁ ଚୋତ୍ପନ୍ନାଃ କେଚିତ୍ସମ୍ମତଵିକ୍ରମାଃ ।
ଋକ୍ଷୀଷୁ ଚ ତଥା ଜାତା ଵାନରାଃ କିନ୍ନରୀଷୁ ଚ ॥ 19 ॥
ଦେଵା ମହର୍ଷିଗଂଧର୍ଵାସ୍ତାର୍କ୍ଷ୍ୟା ୟକ୍ଷା ୟଶସ୍ଵିନଃ ।
ନାଗାଃ କିଂପୁରୁଷାଶ୍ଚୈଵ ସିଦ୍ଧଵିଦ୍ୟାଧରୋରଗାଃ ॥ 20 ॥
ବହଵୋ ଜନୟାମାସୁର୍ହୃଷ୍ଟାସ୍ତତ୍ର ସହସ୍ରଶଃ ।
ଵାନରାନ୍ସୁମହାକାୟାନ୍ସର୍ଵାନ୍ଵୈ ଵନଚାରିଣଃ ॥ 21 ॥
ଅପ୍ସରସ୍ସୁ ଚ ମୁଖ୍ୟାସୁ ତଥା ଵିଦ୍ୟାଧରୀଷୁ ଚ ।
ନାଗକନ୍ୟାସୁ ଚ ତଥା ଗଂଧର୍ଵୀଣାଂ ତନୂଷୁ ଚ ॥ 22 ॥
କାମରୂପବଲୋପେତା ୟଥାକାମଂ ଵିଚାରିଣଃ ।
ସିଂହଶାର୍ଦୂଲସଦୃଶା ଦର୍ପେଣ ଚ ବଲେନ ଚ ॥ 23 ॥
ଶିଲାପ୍ରହରଣାସ୍ସର୍ଵେ ସର୍ଵେ ପାଦପୟୋଧିନଃ ॥ 24 ॥
ନଖଦଂଷ୍ଟ୍ରାୟୁଧାସ୍ସର୍ଵେ ସର୍ଵେ ସର୍ଵାସ୍ତ୍ରକୋଵିଦାଃ ।
ଵିଚାଲୟେୟୁଶ୍ଶୈଲେଂଦ୍ରାନ୍ଭେଦୟେୟୁସ୍ସ୍ଥିରାଂଦ୍ରୁମାନ୍ ।
କ୍ଷୋଭୟେୟୁଶ୍ଚ ଵେଗେନ ସମୁଦ୍ରଂ ସରିତାଂ ପତିମ୍ ॥ 25 ॥
ଦାରୟେୟୁଃ କ୍ଷିତିଂ ପଦ୍ଭ୍ୟାମାପ୍ଲଵେୟୁର୍ମହାର୍ଣଵମ୍ ।
ନଭଃସ୍ଥଲଂ ଵିଶେୟୁଶ୍ଚ ଗୃହ୍ଣୀୟୁରପି ତୋୟଦାନ୍ ॥ 26 ॥
ଗୃହ୍ଣୀୟୁରପି ମାତଂଗାନ୍ମତ୍ତାନ୍ପ୍ରଵ୍ରଜତୋ ଵନେ ।
ନର୍ଦମାନାଶ୍ଚ ନାଦେନ ପାତୟେୟୁର୍ଵିହଂଗମାନ୍ ॥ 27 ॥
ଈଦୃଶାନାଂ ପ୍ରସୂତାନି ହରୀଣାଂ କାମରୂପିଣାମ୍ ।
ଶତଂ ଶତସହସ୍ରାଣି ୟୂଥପାନାଂ ମହାତ୍ମନାମ୍ ॥ 28 ॥
ତେ ପ୍ରଧାନେଷୁ ୟୂଥେଷୁ ହରୀଣାଂ ହରିୟୂଥପାଃ ।
ବଭୂଵୁର୍ୟୂଥପଶ୍ରେଷ୍ଠା ଵୀରାଂଶ୍ଚାଜନୟନ୍ ହରୀନ୍ ॥ 29 ॥
ଅନ୍ୟେ ଋକ୍ଷଵତଃ ପ୍ରସ୍ଥାନଵତସ୍ଥୁ ସ୍ସହସ୍ରଶଃ ।
ଅନ୍ୟେ ନାନାଵିଧାନ୍ଶୈଲାନ୍ଭେଜିରେ କାନନାନି ଚ ॥ 30 ॥
ସୂର୍ୟପୁତ୍ରଂ ଚ ସୁଗ୍ରୀଵଂ ଶକ୍ରପୁତ୍ରଂ ଚ ଵାଲିନମ୍ ।
ଭ୍ରାତରାଵୁପତସ୍ଥୁସ୍ତେ ସର୍ଵ ଏଵ ହରୀଶ୍ଵରାଃ ॥ 31 ॥
ନଲଂ ନୀଲଂ ହନୂମଂତମନ୍ୟାଂଶ୍ଚ ହରିୟୂଥପାନ୍ ।
3 ତେ ତାର୍କ୍ଷ୍ୟବଲସଂପନ୍ନାସ୍ସର୍ଵେ ୟୁଦ୍ଧଵିଶାରଦାଃ ।
ଵିଚରଂତୋଽର୍ଦୟଂଦର୍ପାତ୍ସିଂହଵ୍ୟାଘ୍ରମହୋରଗାନ୍ ॥ 32 ॥
ତାଂଶ୍ଚ ସର୍ଵାନ୍ମହାବାହୁର୍ଵାଲୀ ଵିପୁଲଵିକ୍ରମଃ ।
ଜୁଗୋପ ଭୁଜଵୀର୍ୟେଣ ଋକ୍ଷଗୋପୁଚ୍ଛଵାନରାନ୍ ॥ 33 ॥
ତୈରିୟଂ ପୃଥିଵୀ ଶୂରୈସ୍ସପର୍ଵତଵନାର୍ଣଵା ।
କୀର୍ଣା ଵିଵିଧସଂସ୍ଥାନୈର୍ନାନାଵ୍ୟଂଜନଲକ୍ଷଣୈଃ ॥ 34 ॥
ତୈର୍ମେଘବୃଂଦାଚଲକୂଟକଲ୍ପୈଃ ମହାବଲୈର୍ଵାନରୟୂଥପାଲୈଃ ।
ବଭୂଵ ଭୂର୍ଭୀମଶରୀରରୂପୈ ସ୍ସମାଵୃତା ରାମସହାୟହେତୋଃ ॥ 35 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ସପ୍ତଦଶସ୍ସର୍ଗଃ ॥
