শ্রীমদ্বাল্মীকীয় রামাযণে বালকাংডম্ ।
অথ সপ্তদশস্সর্গঃ ।
পুত্রত্বং তু গতে বিষ্ণৌ রাজ্ঞস্তস্য় সুমহাত্মনঃ ।
উবাচ দেবতাস্সর্বাস্স্বয়ংভূর্ভগবানিদম্ ॥ 1 ॥
সত্যসংধস্য় বীরস্য় সর্বেষান্নো হিতৈষিণঃ ।
বিষ্ণোস্সহায়ান্বলিনস্সৃজধ্বং কামরূপিণঃ ॥ 2 ॥
মায়াবিদশ্চ শূরাংশ্চ বায়ুবেগসমাংজবে ।
নযজ্ঞান্বুদ্ধিসংপন্নান্বিষ্ণুতুল্যপরাক্রমান্ ॥ 3 ॥
অসংহার্য়ানুপাযজ্ঞান্ দিব্যসংহননান্বিতান্ ।
সর্বাস্ত্রগুণসংপন্নানমৃতপ্রাশনানিব ॥ 4 ॥
অপ্সরস্সু চ মুখ্য়াসু গংধর্বাণাং তনূষু চ ।
সৃজধ্বং হরিরূপেণ পুত্রাংস্তুল্যপরাক্রমান্ ॥ 5 ॥
পূর্বমেব ময়া সৃষ্টো জাংববানৃক্ষপুংগবঃ ।
জৃংভমাণস্য় সহসা মম বক্ত্রাদজাযত ॥ 6 ॥
তে তথোক্তা ভগবতা তত্প্রতিশ্রুত্য় শাসনম্ ।
জনয়ামাসুরেবং তে পুত্রান্বানররূপিণঃ ॥ 7 ॥
ঋষযশ্চ মহাত্মানস্সিদ্ধবিদ্য়াধরোরগাঃ ।
চারণাশ্চ সুতান্বীরান্সসৃজুর্বনচারিণঃ ॥ 8 ॥
বানরেংদ্রং মহেংদ্রাভমিংদ্রো বালিনমূর্জিতম্ ।
সুগ্রীবং জনয়ামাস তপনস্তপতাং বরঃ ॥ 9 ॥
বৃহস্পতিস্ত্বজনযত্তারং নাম মহাহরিম্ ।
সর্ববানরমুখ্য়ানাং বুদ্ধিমংতমনুত্তমম্ ॥ 10 ॥
ধনদস্য় সুতশ্শ্রীমান্ বানরো গংধমাদনঃ ।
বিশ্বকর্মাত্বজনযন্নলং নাম মহাহরিম্ ॥ 11 ॥
পাবকস্য় সুতশ্শ্রীমান্ নীলোঽগ্নিসদৃশপ্রভঃ ।
তেজসা যশসা বীর্য়াদত্যরিচ্যত বানরান্ ॥ 12 ॥
রূপদ্রবিণসংপন্নাবশ্বিনৌ রূপসম্মতৌ ।
মৈংদং চ দ্বিবিদং চৈব জনয়ামাসতুস্স্বযম্ ॥ 13 ॥
বরুণো জনয়ামাস সুষেণং বানরর্ষভম্ ।
শরভং জনয়ামাস পর্জন্যস্তু মহাবলম্ ॥ 14 ॥
মারুতস্য়াত্মজশ্শ্রীমান্হনুমান্নাম বীর্যবান্ ।
বজ্রসংহননোপেতো বৈনতেযসমো জবে ॥ 15 ॥
তে সৃষ্টা বহুসাহস্রা দশগ্রীববধে রতাঃ ।
অপ্রমেযবলা বীরা বিক্রাংতাঃ কামরূপিণঃ ॥ 16 ॥
মেরুমংদরসংকাশা বপুষ্মংতো মহাবলাঃ ।
ঋক্ষবানরগোপুচ্ছাঃ ক্ষিপ্রমেবাভিজজ্ঞিরে ॥ 17 ॥
যস্য় দেবস্য় যদ্রূপং বেষো যশ্চ পরাক্রমঃ ।
অজাযত সমস্তেন তস্য় তস্য় সুতঃ পৃথক্ ॥ 18 ॥
গোলাংগূলীষু চোত্পন্নাঃ কেচিত্সম্মতবিক্রমাঃ ।
ঋক্ষীষু চ তথা জাতা বানরাঃ কিন্নরীষু চ ॥ 19 ॥
দেবা মহর্ষিগংধর্বাস্তার্ক্ষ্য়া যক্ষা যশস্বিনঃ ।
নাগাঃ কিংপুরুষাশ্চৈব সিদ্ধবিদ্য়াধরোরগাঃ ॥ 20 ॥
বহবো জনয়ামাসুর্হৃষ্টাস্তত্র সহস্রশঃ ।
বানরান্সুমহাকায়ান্সর্বান্বৈ বনচারিণঃ ॥ 21 ॥
অপ্সরস্সু চ মুখ্য়াসু তথা বিদ্য়াধরীষু চ ।
নাগকন্য়াসু চ তথা গংধর্বীণাং তনূষু চ ॥ 22 ॥
কামরূপবলোপেতা যথাকামং বিচারিণঃ ।
সিংহশার্দূলসদৃশা দর্পেণ চ বলেন চ ॥ 23 ॥
শিলাপ্রহরণাস্সর্বে সর্বে পাদপয়োধিনঃ ॥ 24 ॥
নখদংষ্ট্রায়ুধাস্সর্বে সর্বে সর্বাস্ত্রকোবিদাঃ ।
বিচালয়েয়ুশ্শৈলেংদ্রান্ভেদয়েয়ুস্স্থিরাংদ্রুমান্ ।
ক্ষোভয়েয়ুশ্চ বেগেন সমুদ্রং সরিতাং পতিম্ ॥ 25 ॥
দারয়েয়ুঃ ক্ষিতিং পদ্ভ্য়ামাপ্লবেয়ুর্মহার্ণবম্ ।
নভঃস্থলং বিশেয়ুশ্চ গৃহ্ণীয়ুরপি তোযদান্ ॥ 26 ॥
গৃহ্ণীয়ুরপি মাতংগান্মত্তান্প্রব্রজতো বনে ।
নর্দমানাশ্চ নাদেন পাতয়েয়ুর্বিহংগমান্ ॥ 27 ॥
ঈদৃশানাং প্রসূতানি হরীণাং কামরূপিণাম্ ।
শতং শতসহস্রাণি যূথপানাং মহাত্মনাম্ ॥ 28 ॥
তে প্রধানেষু যূথেষু হরীণাং হরিয়ূথপাঃ ।
বভূবুর্য়ূথপশ্রেষ্ঠা বীরাংশ্চাজনযন্ হরীন্ ॥ 29 ॥
অন্য়ে ঋক্ষবতঃ প্রস্থানবতস্থু স্সহস্রশঃ ।
অন্য়ে নানাবিধান্শৈলান্ভেজিরে কাননানি চ ॥ 30 ॥
সূর্যপুত্রং চ সুগ্রীবং শক্রপুত্রং চ বালিনম্ ।
ভ্রাতরাবুপতস্থুস্তে সর্ব এব হরীশ্বরাঃ ॥ 31 ॥
নলং নীলং হনূমংতমন্য়াংশ্চ হরিয়ূথপান্ ।
3 তে তার্ক্ষ্যবলসংপন্নাস্সর্বে যুদ্ধবিশারদাঃ ।
বিচরংতোঽর্দয়ংদর্পাত্সিংহব্য়াঘ্রমহোরগান্ ॥ 32 ॥
তাংশ্চ সর্বান্মহাবাহুর্বালী বিপুলবিক্রমঃ ।
জুগোপ ভুজবীর্য়েণ ঋক্ষগোপুচ্ছবানরান্ ॥ 33 ॥
তৈরিয়ং পৃথিবী শূরৈস্সপর্বতবনার্ণবা ।
কীর্ণা বিবিধসংস্থানৈর্নানাব্য়ংজনলক্ষণৈঃ ॥ 34 ॥
তৈর্মেঘবৃংদাচলকূটকল্পৈঃ মহাবলৈর্বানরয়ূথপালৈঃ ।
বভূব ভূর্ভীমশরীররূপৈ স্সমাবৃতা রামসহাযহেতোঃ ॥ 35 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে সপ্তদশস্সর্গঃ ॥
