ശ്രീമദ്വാല്മീകീയ രാമായണേ ബാലകാംഡമ് ।
അഥ സപ്തദശസ്സര്ഗഃ ।
പുത്രത്വം തു ഗതേ വിഷ്ണൌ രാജ്ഞസ്തസ്യ സുമഹാത്മനഃ ।
ഉവാച ദേവതാസ്സർവാസ്സ്വയംഭൂര്ഭഗവാനിദമ് ॥ 1 ॥
സത്യസംധസ്യ വീരസ്യ സർവേഷാന്നോ ഹിതൈഷിണഃ ।
വിഷ്ണോസ്സഹായാന്ബലിനസ്സൃജധ്വം കാമരൂപിണഃ ॥ 2 ॥
മായാവിദശ്ച ശൂരാംശ്ച വായുവേഗസമാംജവേ ।
നയജ്ഞാന്ബുദ്ധിസംപന്നാന്വിഷ്ണുതുല്യപരാക്രമാന് ॥ 3 ॥
അസംഹാര്യാനുപായജ്ഞാന് ദിവ്യസംഹനനാന്വിതാന് ।
സർവാസ്ത്രഗുണസംപന്നാനമൃതപ്രാശനാനിവ ॥ 4 ॥
അപ്സരസ്സു ച മുഖ്യാസു ഗംധർവാണാം തനൂഷു ച ।
സൃജധ്വം ഹരിരൂപേണ പുത്രാംസ്തുല്യപരാക്രമാന് ॥ 5 ॥
പൂർവമേവ മയാ സൃഷ്ടോ ജാംബവാനൃക്ഷപുംഗവഃ ।
ജൃംഭമാണസ്യ സഹസാ മമ വക്ത്രാദജായത ॥ 6 ॥
തേ തഥോക്താ ഭഗവതാ തത്പ്രതിശ്രുത്യ ശാസനമ് ।
ജനയാമാസുരേവം തേ പുത്രാന്വാനരരൂപിണഃ ॥ 7 ॥
ഋഷയശ്ച മഹാത്മാനസ്സിദ്ധവിദ്യാധരോരഗാഃ ।
ചാരണാശ്ച സുതാന്വീരാന്സസൃജുർവനചാരിണഃ ॥ 8 ॥
വാനരേംദ്രം മഹേംദ്രാഭമിംദ്രോ വാലിനമൂര്ജിതമ് ।
സുഗ്രീവം ജനയാമാസ തപനസ്തപതാം വരഃ ॥ 9 ॥
ബൃഹസ്പതിസ്ത്വജനയത്താരം നാമ മഹാഹരിമ് ।
സർവവാനരമുഖ്യാനാം ബുദ്ധിമംതമനുത്തമമ് ॥ 10 ॥
ധനദസ്യ സുതശ്ശ്രീമാന് വാനരോ ഗംധമാദനഃ ।
വിശ്വകര്മാത്വജനയന്നലം നാമ മഹാഹരിമ് ॥ 11 ॥
പാവകസ്യ സുതശ്ശ്രീമാന് നീലോഽഗ്നിസദൃശപ്രഭഃ ।
തേജസാ യശസാ വീര്യാദത്യരിച്യത വാനരാന് ॥ 12 ॥
രൂപദ്രവിണസംപന്നാവശ്വിനൌ രൂപസമ്മതൌ ।
മൈംദം ച ദ്വിവിദം ചൈവ ജനയാമാസതുസ്സ്വയമ് ॥ 13 ॥
വരുണോ ജനയാമാസ സുഷേണം വാനരര്ഷഭമ് ।
ശരഭം ജനയാമാസ പര്ജന്യസ്തു മഹാബലമ് ॥ 14 ॥
മാരുതസ്യാത്മജശ്ശ്രീമാന്ഹനുമാന്നാമ വീര്യവാന് ।
വജ്രസംഹനനോപേതോ വൈനതേയസമോ ജവേ ॥ 15 ॥
തേ സൃഷ്ടാ ബഹുസാഹസ്രാ ദശഗ്രീവവധേ രതാഃ ।
അപ്രമേയബലാ വീരാ വിക്രാംതാഃ കാമരൂപിണഃ ॥ 16 ॥
മേരുമംദരസംകാശാ വപുഷ്മംതോ മഹാബലാഃ ।
ഋക്ഷവാനരഗോപുച്ഛാഃ ക്ഷിപ്രമേവാഭിജജ്ഞിരേ ॥ 17 ॥
യസ്യ ദേവസ്യ യദ്രൂപം വേഷോ യശ്ച പരാക്രമഃ ।
അജായത സമസ്തേന തസ്യ തസ്യ സുതഃ പൃഥക് ॥ 18 ॥
ഗോലാംഗൂലീഷു ചോത്പന്നാഃ കേചിത്സമ്മതവിക്രമാഃ ।
ഋക്ഷീഷു ച തഥാ ജാതാ വാനരാഃ കിന്നരീഷു ച ॥ 19 ॥
ദേവാ മഹര്ഷിഗംധർവാസ്താര്ക്ഷ്യാ യക്ഷാ യശസ്വിനഃ ।
നാഗാഃ കിംപുരുഷാശ്ചൈവ സിദ്ധവിദ്യാധരോരഗാഃ ॥ 20 ॥
ബഹവോ ജനയാമാസുര്ഹൃഷ്ടാസ്തത്ര സഹസ്രശഃ ।
വാനരാന്സുമഹാകായാന്സർവാന്വൈ വനചാരിണഃ ॥ 21 ॥
അപ്സരസ്സു ച മുഖ്യാസു തഥാ വിദ്യാധരീഷു ച ।
നാഗകന്യാസു ച തഥാ ഗംധർവീണാം തനൂഷു ച ॥ 22 ॥
കാമരൂപബലോപേതാ യഥാകാമം വിചാരിണഃ ।
സിംഹശാര്ദൂലസദൃശാ ദര്പേണ ച ബലേന ച ॥ 23 ॥
ശിലാപ്രഹരണാസ്സർവേ സർവേ പാദപയോധിനഃ ॥ 24 ॥
നഖദംഷ്ട്രായുധാസ്സർവേ സർവേ സർവാസ്ത്രകോവിദാഃ ।
വിചാലയേയുശ്ശൈലേംദ്രാന്ഭേദയേയുസ്സ്ഥിരാംദ്രുമാന് ।
ക്ഷോഭയേയുശ്ച വേഗേന സമുദ്രം സരിതാം പതിമ് ॥ 25 ॥
ദാരയേയുഃ ക്ഷിതിം പദ്ഭ്യാമാപ്ലവേയുര്മഹാര്ണവമ് ।
നഭഃസ്ഥലം വിശേയുശ്ച ഗൃഹ്ണീയുരപി തോയദാന് ॥ 26 ॥
ഗൃഹ്ണീയുരപി മാതംഗാന്മത്താന്പ്രവ്രജതോ വനേ ।
നര്ദമാനാശ്ച നാദേന പാതയേയുർവിഹംഗമാന് ॥ 27 ॥
ഈദൃശാനാം പ്രസൂതാനി ഹരീണാം കാമരൂപിണാമ് ।
ശതം ശതസഹസ്രാണി യൂഥപാനാം മഹാത്മനാമ് ॥ 28 ॥
തേ പ്രധാനേഷു യൂഥേഷു ഹരീണാം ഹരിയൂഥപാഃ ।
ബഭൂവുര്യൂഥപശ്രേഷ്ഠാ വീരാംശ്ചാജനയന് ഹരീന് ॥ 29 ॥
അന്യേ ഋക്ഷവതഃ പ്രസ്ഥാനവതസ്ഥു സ്സഹസ്രശഃ ।
അന്യേ നാനാവിധാന്ശൈലാന്ഭേജിരേ കാനനാനി ച ॥ 30 ॥
സൂര്യപുത്രം ച സുഗ്രീവം ശക്രപുത്രം ച വാലിനമ് ।
ഭ്രാതരാവുപതസ്ഥുസ്തേ സർവ ഏവ ഹരീശ്വരാഃ ॥ 31 ॥
നലം നീലം ഹനൂമംതമന്യാംശ്ച ഹരിയൂഥപാന് ।
3 തേ താര്ക്ഷ്യബലസംപന്നാസ്സർവേ യുദ്ധവിശാരദാഃ ।
വിചരംതോഽര്ദയംദര്പാത്സിംഹവ്യാഘ്രമഹോരഗാന് ॥ 32 ॥
താംശ്ച സർവാന്മഹാബാഹുർവാലീ വിപുലവിക്രമഃ ।
ജുഗോപ ഭുജവീര്യേണ ഋക്ഷഗോപുച്ഛവാനരാന് ॥ 33 ॥
തൈരിയം പൃഥിവീ ശൂരൈസ്സപർവതവനാര്ണവാ ।
കീര്ണാ വിവിധസംസ്ഥാനൈര്നാനാവ്യംജനലക്ഷണൈഃ ॥ 34 ॥
തൈര്മേഘബൃംദാചലകൂടകല്പൈഃ മഹാബലൈർവാനരയൂഥപാലൈഃ ।
ബഭൂവ ഭൂര്ഭീമശരീരരൂപൈ സ്സമാവൃതാ രാമസഹായഹേതോഃ ॥ 35 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ സപ്തദശസ്സര്ഗഃ ॥
