śrīmadvālmīkīya rāmāyaṇē bālakāṇḍam ।
atha saptadaśassargaḥ ।
putratvaṃ tu gatē viṣṇau rājñastasya sumahātmanaḥ ।
uvācha dēvatāssarvāssvayambhūrbhagavānidam ॥ 1 ॥
satyasandhasya vīrasya sarvēṣānnō hitaiṣiṇaḥ ।
viṣṇōssahāyānbalinassṛjadhvaṃ kāmarūpiṇaḥ ॥ 2 ॥
māyāvidaścha śūrāṃścha vāyuvēgasamāñjavē ।
nayajñānbuddhisampannānviṣṇutulyaparākramān ॥ 3 ॥
asaṃhāryānupāyajñān divyasaṃhananānvitān ।
sarvāstraguṇasampannānamṛtaprāśanāniva ॥ 4 ॥
apsarassu cha mukhyāsu gandharvāṇāṃ tanūṣu cha ।
sṛjadhvaṃ harirūpēṇa putrāṃstulyaparākramān ॥ 5 ॥
pūrvamēva mayā sṛṣṭō jāmbavānṛkṣapuṅgavaḥ ।
jṛmbhamāṇasya sahasā mama vaktrādajāyata ॥ 6 ॥
tē tathōktā bhagavatā tatpratiśrutya śāsanam ।
janayāmāsurēvaṃ tē putrānvānararūpiṇaḥ ॥ 7 ॥
ṛṣayaścha mahātmānassiddhavidyādharōragāḥ ।
chāraṇāścha sutānvīrānsasṛjurvanachāriṇaḥ ॥ 8 ॥
vānarēndraṃ mahēndrābhamindrō vālinamūrjitam ।
sugrīvaṃ janayāmāsa tapanastapatāṃ varaḥ ॥ 9 ॥
bṛhaspatistvajanayattāraṃ nāma mahāharim ।
sarvavānaramukhyānāṃ buddhimantamanuttamam ॥ 10 ॥
dhanadasya sutaśśrīmān vānarō gandhamādanaḥ ।
viśvakarmātvajanayannalaṃ nāma mahāharim ॥ 11 ॥
pāvakasya sutaśśrīmān nīlō'gnisadṛśaprabhaḥ ।
tējasā yaśasā vīryādatyarichyata vānarān ॥ 12 ॥
rūpadraviṇasampannāvaśvinau rūpasammatau ।
maindaṃ cha dvividaṃ chaiva janayāmāsatussvayam ॥ 13 ॥
varuṇō janayāmāsa suṣēṇaṃ vānararṣabham ।
śarabhaṃ janayāmāsa parjanyastu mahābalam ॥ 14 ॥
mārutasyātmajaśśrīmānhanumānnāma vīryavān ।
vajrasaṃhananōpētō vainatēyasamō javē ॥ 15 ॥
tē sṛṣṭā bahusāhasrā daśagrīvavadhē ratāḥ ।
apramēyabalā vīrā vikrāntāḥ kāmarūpiṇaḥ ॥ 16 ॥
mērumandarasaṅkāśā vapuṣmantō mahābalāḥ ।
ṛkṣavānaragōpuchChāḥ kṣipramēvābhijajñirē ॥ 17 ॥
yasya dēvasya yadrūpaṃ vēṣō yaścha parākramaḥ ।
ajāyata samastēna tasya tasya sutaḥ pṛthak ॥ 18 ॥
gōlāṅgūlīṣu chōtpannāḥ kēchitsammatavikramāḥ ।
ṛkṣīṣu cha tathā jātā vānarāḥ kinnarīṣu cha ॥ 19 ॥
dēvā maharṣigandharvāstārkṣyā yakṣā yaśasvinaḥ ।
nāgāḥ kimpuruṣāśchaiva siddhavidyādharōragāḥ ॥ 20 ॥
bahavō janayāmāsurhṛṣṭāstatra sahasraśaḥ ।
vānarānsumahākāyānsarvānvai vanachāriṇaḥ ॥ 21 ॥
apsarassu cha mukhyāsu tathā vidyādharīṣu cha ।
nāgakanyāsu cha tathā gandharvīṇāṃ tanūṣu cha ॥ 22 ॥
kāmarūpabalōpētā yathākāmaṃ vichāriṇaḥ ।
siṃhaśārdūlasadṛśā darpēṇa cha balēna cha ॥ 23 ॥
śilāpraharaṇāssarvē sarvē pādapayōdhinaḥ ॥ 24 ॥
nakhadaṃṣṭrāyudhāssarvē sarvē sarvāstrakōvidāḥ ।
vichālayēyuśśailēndrānbhēdayēyussthirāndrumān ।
kṣōbhayēyuścha vēgēna samudraṃ saritāṃ patim ॥ 25 ॥
dārayēyuḥ kṣitiṃ padbhyāmāplavēyurmahārṇavam ।
nabhaḥsthalaṃ viśēyuścha gṛhṇīyurapi tōyadān ॥ 26 ॥
gṛhṇīyurapi mātaṅgānmattānpravrajatō vanē ।
nardamānāścha nādēna pātayēyurvihaṅgamān ॥ 27 ॥
īdṛśānāṃ prasūtāni harīṇāṃ kāmarūpiṇām ।
śataṃ śatasahasrāṇi yūthapānāṃ mahātmanām ॥ 28 ॥
tē pradhānēṣu yūthēṣu harīṇāṃ hariyūthapāḥ ।
babhūvuryūthapaśrēṣṭhā vīrāṃśchājanayan harīn ॥ 29 ॥
anyē ṛkṣavataḥ prasthānavatasthu ssahasraśaḥ ।
anyē nānāvidhānśailānbhējirē kānanāni cha ॥ 30 ॥
sūryaputraṃ cha sugrīvaṃ śakraputraṃ cha vālinam ।
bhrātarāvupatasthustē sarva ēva harīśvarāḥ ॥ 31 ॥
nalaṃ nīlaṃ hanūmantamanyāṃścha hariyūthapān ।
3 tē tārkṣyabalasampannāssarvē yuddhaviśāradāḥ ।
vicharantō'rdayandarpātsiṃhavyāghramahōragān ॥ 32 ॥
tāṃścha sarvānmahābāhurvālī vipulavikramaḥ ।
jugōpa bhujavīryēṇa ṛkṣagōpuchChavānarān ॥ 33 ॥
tairiyaṃ pṛthivī śūraissaparvatavanārṇavā ।
kīrṇā vividhasaṃsthānairnānāvyañjanalakṣaṇaiḥ ॥ 34 ॥
tairmēghabṛndāchalakūṭakalpaiḥ mahābalairvānarayūthapālaiḥ ।
babhūva bhūrbhīmaśarīrarūpai ssamāvṛtā rāmasahāyahētōḥ ॥ 35 ॥
ityārṣē śrīmadrāmāyaṇē vālmīkīya ādikāvyē bālakāṇḍē saptadaśassargaḥ ॥
