শ্রীমদ্বাল্মীকীয় রামাযণে কিষ্কিংধাকাংডম্ ।
অথ চতুর্দশস্সর্গঃ ।
সর্বে তে ত্বরিতং গত্বা কিষ্কিংধাং বালি পালিতাম্ ।
বৃক্ষৈরাত্মানমাবৃত্য় ব্যতিষ্ঠন্ গহনে বনে ॥ 1 ॥
বিচার্য় সর্বতো দৃষ্টিং কাননে কাননপ্রিয়ঃ ।
সুগ্রীবো বিপুলগ্রীবঃ ক্রোধমাহারযদ্ভৃশম্ ॥ 2 ॥
ততস্স নিনদং ঘোরং কৃত্বা যুদ্ধায় চাহ্বযত্ ।
পরিবারৈঃ পরিবৃতো নাদৈর্ভিংদন্নিবাংবরম্ ॥ 3 ॥
গর্জন্নিব মহামেঘো বায়ুবেগপুরস্সরঃ ।
অথ বালার্কসদৃশো দৃপ্তসিংহগতিস্তদা ॥ 4 ॥
দৃষ্ট্বা রামং ক্রিয়াদক্ষং সুগ্রীবো বাক্যমব্রবীত্ ।
হরিবাগুরয়া ব্য়াপ্তাং তপ্তকাংচনতোরণাম্ ।
প্রাপ্তাঃ স্ম ধ্বজয়ংত্রাঢ্য়াং কিষ্কিংধাং বালিনঃ পুরীম্ ॥ 5 ॥
প্রতিজ্ঞা যা ত্বয়া বীর কৃতা বালিবধে পুরা ।
সফলাং কুরু তাং ক্ষিপ্রং লতাং কাল ইবাগতঃ ॥ 6 ॥
এবমুক্তস্তু ধর্মাত্মা সুগ্রীবেণ স রাঘবঃ ।
তমেবোবাচ বচনং সুগ্রীবং শত্রুসূদনঃ ॥ 7 ॥
কৃতাভিজ্ঞানচিহ্নস্ত্ব মনয়া গজসাহ্বয়া ।
লক্ষ্মণেন সমুত্পাট্য় যৈষা কংঠে কৃতা তব ॥ 8 ॥
শোভসেঽহ্যধিকং বীর লতয়া কংঠসক্তয়া ।
বিপরীত ইবাকাশে সূর্য়ো নক্ষত্রমালয়া ॥ 9 ॥
অদ্য় বালিসমুত্থং তে ভয়ং বৈরং চ বানর ।
একেনাহং প্রমোক্ষ্য়ামি বাণমোক্ষেণ সংয়ুগে ॥ 10 ॥
মম দর্শয় সুগ্রীব বৈরিণং ভ্রাতৃরূপিণম্ ।
বালী বিনিহতো যাবদ্বনে পাংসুষু বেষ্টতে ॥ 11 ॥
যদি দৃষ্টিপথং প্রাপ্তো জীবন্স বিনিবর্ততে ।
ততো দোষেণ মা গচ্ছেত্সদ্য়ো গর্হেচ্চ মা ভবান্ ॥ 12 ॥
প্রত্যক্ষং সপ্ত তে সালা ময়া বাণেন দারিতাঃ ।
তেনাবেহি বলেনাদ্য় বালিনং নিহতং ময়া ॥ 13 ॥
অনৃতং নোক্তপূর্বং মে বীর কৃচ্ছ্রেঽপি তিষ্টতা ।
ধর্মলোভপরীতেন ন চ বক্ষ্য়ে কথংচন ॥ 14 ॥
সফলাং চ করিষ্য়ামি প্রতিজ্ঞাং জহি সংভ্রমম্ ।
প্রসূতং কলমং ক্ষেত্রে বর্ষেণেব শতক্রতুঃ ॥ 15 ॥
তদাহ্বাননিমিত্তং ত্বং বালিনো হেমমালিনঃ ।
সুগ্রীব কুরু তং শব্দং নিষ্পতেদ্য়েন বানরঃ ॥ 16 ॥
জিতকাশী বলশ্লাঘী ত্বয়া চাধর্ষিতঃ পুরা ।
নিষ্পতিষ্যত্যসংগেন বালী স প্রিযসংয়ুগঃ ॥ 17 ॥
রিপূণাং ধর্ষিণ শূরা মর্ষয়ংতি ন সংয়ুগে ।
জানংতস্তু স্বকং বীর্য়ং স্ত্রীসমক্ষং বিশেষতঃ ॥ 18 ॥
স তু রামবচশ্শ্রুত্বা সুগ্রীবো হেমপিংগলঃ ।
ননর্দ ক্রূরনাদেন বিনির্ভিংদন্নিবাংবরম্ ॥ 19 ॥
তস্য় শব্দেন বিত্রস্তা গাবো যাংতি হতপ্রভাঃ ।
রাজদোষপরামৃষ্টাঃ কুলস্ত্রিয় ইবাকুলাঃ ॥ 20 ॥
দ্রবংতি চ মৃগাশ্শীঘ্রং ভগ্না ইব রণে হয়াঃ ।
পতংতি চ খগা ভূমৌ ক্ষীণপুণ্য়া ইব গ্রহাঃ ॥ 21 ॥
ততস্সজীমূতগণপ্রণাদো নাদং হ্যমুংচত্ত্বরয়া প্রতীতঃ ।
সূর্য়াত্মজশ্শৌর্যবিবৃদ্ধতেজাঃ সরিত্পতির্বাঽনিলচংচলোর্মিঃ ॥ 22 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে কিষ্কিংধাকাংডে চতুর্দশস্সর্গঃ ॥
