શ્રીમદ્વાલ્મીકીય રામાયણે કિષ્કિંધાકાંડમ્ ।
અથ ચતુર્દશસ્સર્ગઃ ।
સર્વે તે ત્વરિતં ગત્વા કિષ્કિંધાં વાલિ પાલિતામ્ ।
વૃક્ષૈરાત્માનમાવૃત્ય વ્યતિષ્ઠન્ ગહને વને ॥ 1 ॥
વિચાર્ય સર્વતો દૃષ્ટિં કાનને કાનનપ્રિયઃ ।
સુગ્રીવો વિપુલગ્રીવઃ ક્રોધમાહારયદ્ભૃશમ્ ॥ 2 ॥
તતસ્સ નિનદં ઘોરં કૃત્વા યુદ્ધાય ચાહ્વયત્ ।
પરિવારૈઃ પરિવૃતો નાદૈર્ભિંદન્નિવાંબરમ્ ॥ 3 ॥
ગર્જન્નિવ મહામેઘો વાયુવેગપુરસ્સરઃ ।
અથ બાલાર્કસદૃશો દૃપ્તસિંહગતિસ્તદા ॥ 4 ॥
દૃષ્ટ્વા રામં ક્રિયાદક્ષં સુગ્રીવો વાક્યમબ્રવીત્ ।
હરિવાગુરયા વ્યાપ્તાં તપ્તકાંચનતોરણામ્ ।
પ્રાપ્તાઃ સ્મ ધ્વજયંત્રાઢ્યાં કિષ્કિંધાં વાલિનઃ પુરીમ્ ॥ 5 ॥
પ્રતિજ્ઞા યા ત્વયા વીર કૃતા વાલિવધે પુરા ।
સફલાં કુરુ તાં ક્ષિપ્રં લતાં કાલ ઇવાગતઃ ॥ 6 ॥
એવમુક્તસ્તુ ધર્માત્મા સુગ્રીવેણ સ રાઘવઃ ।
તમેવોવાચ વચનં સુગ્રીવં શત્રુસૂદનઃ ॥ 7 ॥
કૃતાભિજ્ઞાનચિહ્નસ્ત્વ મનયા ગજસાહ્વયા ।
લક્ષ્મણેન સમુત્પાટ્ય યૈષા કંઠે કૃતા તવ ॥ 8 ॥
શોભસેઽહ્યધિકં વીર લતયા કંઠસક્તયા ।
વિપરીત ઇવાકાશે સૂર્યો નક્ષત્રમાલયા ॥ 9 ॥
અદ્ય વાલિસમુત્થં તે ભયં વૈરં ચ વાનર ।
એકેનાહં પ્રમોક્ષ્યામિ બાણમોક્ષેણ સંયુગે ॥ 10 ॥
મમ દર્શય સુગ્રીવ વૈરિણં ભ્રાતૃરૂપિણમ્ ।
વાલી વિનિહતો યાવદ્વને પાંસુષુ વેષ્ટતે ॥ 11 ॥
યદિ દૃષ્ટિપથં પ્રાપ્તો જીવન્સ વિનિવર્તતે ।
તતો દોષેણ મા ગચ્છેત્સદ્યો ગર્હેચ્ચ મા ભવાન્ ॥ 12 ॥
પ્રત્યક્ષં સપ્ત તે સાલા મયા બાણેન દારિતાઃ ।
તેનાવેહિ બલેનાદ્ય વાલિનં નિહતં મયા ॥ 13 ॥
અનૃતં નોક્તપૂર્વં મે વીર કૃચ્છ્રેઽપિ તિષ્ટતા ।
ધર્મલોભપરીતેન ન ચ વક્ષ્યે કથંચન ॥ 14 ॥
સફલાં ચ કરિષ્યામિ પ્રતિજ્ઞાં જહિ સંભ્રમમ્ ।
પ્રસૂતં કલમં ક્ષેત્રે વર્ષેણેવ શતક્રતુઃ ॥ 15 ॥
તદાહ્વાનનિમિત્તં ત્વં વાલિનો હેમમાલિનઃ ।
સુગ્રીવ કુરુ તં શબ્દં નિષ્પતેદ્યેન વાનરઃ ॥ 16 ॥
જિતકાશી બલશ્લાઘી ત્વયા ચાધર્ષિતઃ પુરા ।
નિષ્પતિષ્યત્યસંગેન વાલી સ પ્રિયસંયુગઃ ॥ 17 ॥
રિપૂણાં ધર્ષિણ શૂરા મર્ષયંતિ ન સંયુગે ।
જાનંતસ્તુ સ્વકં વીર્યં સ્ત્રીસમક્ષં વિશેષતઃ ॥ 18 ॥
સ તુ રામવચશ્શ્રુત્વા સુગ્રીવો હેમપિંગલઃ ।
નનર્દ ક્રૂરનાદેન વિનિર્ભિંદન્નિવાંબરમ્ ॥ 19 ॥
તસ્ય શબ્દેન વિત્રસ્તા ગાવો યાંતિ હતપ્રભાઃ ।
રાજદોષપરામૃષ્ટાઃ કુલસ્ત્રિય ઇવાકુલાઃ ॥ 20 ॥
દ્રવંતિ ચ મૃગાશ્શીઘ્રં ભગ્ના ઇવ રણે હયાઃ ।
પતંતિ ચ ખગા ભૂમૌ ક્ષીણપુણ્યા ઇવ ગ્રહાઃ ॥ 21 ॥
તતસ્સજીમૂતગણપ્રણાદો નાદં હ્યમુંચત્ત્વરયા પ્રતીતઃ ।
સૂર્યાત્મજશ્શૌર્યવિવૃદ્ધતેજાઃ સરિત્પતિર્વાઽનિલચંચલોર્મિઃ ॥ 22 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે ચતુર્દશસ્સર્ગઃ ॥
