ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ଚତୁର୍ଦଶସ୍ସର୍ଗଃ ।
ସର୍ଵେ ତେ ତ୍ଵରିତଂ ଗତ୍ଵା କିଷ୍କିଂଧାଂ ଵାଲି ପାଲିତାମ୍ ।
ଵୃକ୍ଷୈରାତ୍ମାନମାଵୃତ୍ୟ ଵ୍ୟତିଷ୍ଠନ୍ ଗହନେ ଵନେ ॥ 1 ॥
ଵିଚାର୍ୟ ସର୍ଵତୋ ଦୃଷ୍ଟିଂ କାନନେ କାନନପ୍ରିୟଃ ।
ସୁଗ୍ରୀଵୋ ଵିପୁଲଗ୍ରୀଵଃ କ୍ରୋଧମାହାରୟଦ୍ଭୃଶମ୍ ॥ 2 ॥
ତତସ୍ସ ନିନଦଂ ଘୋରଂ କୃତ୍ଵା ୟୁଦ୍ଧାୟ ଚାହ୍ଵୟତ୍ ।
ପରିଵାରୈଃ ପରିଵୃତୋ ନାଦୈର୍ଭିଂଦନ୍ନିଵାଂବରମ୍ ॥ 3 ॥
ଗର୍ଜନ୍ନିଵ ମହାମେଘୋ ଵାୟୁଵେଗପୁରସ୍ସରଃ ।
ଅଥ ବାଲାର୍କସଦୃଶୋ ଦୃପ୍ତସିଂହଗତିସ୍ତଦା ॥ 4 ॥
ଦୃଷ୍ଟ୍ଵା ରାମଂ କ୍ରିୟାଦକ୍ଷଂ ସୁଗ୍ରୀଵୋ ଵାକ୍ୟମବ୍ରଵୀତ୍ ।
ହରିଵାଗୁରୟା ଵ୍ୟାପ୍ତାଂ ତପ୍ତକାଂଚନତୋରଣାମ୍ ।
ପ୍ରାପ୍ତାଃ ସ୍ମ ଧ୍ଵଜୟଂତ୍ରାଢ୍ୟାଂ କିଷ୍କିଂଧାଂ ଵାଲିନଃ ପୁରୀମ୍ ॥ 5 ॥
ପ୍ରତିଜ୍ଞା ୟା ତ୍ଵୟା ଵୀର କୃତା ଵାଲିଵଧେ ପୁରା ।
ସଫଲାଂ କୁରୁ ତାଂ କ୍ଷିପ୍ରଂ ଲତାଂ କାଲ ଇଵାଗତଃ ॥ 6 ॥
ଏଵମୁକ୍ତସ୍ତୁ ଧର୍ମାତ୍ମା ସୁଗ୍ରୀଵେଣ ସ ରାଘଵଃ ।
ତମେଵୋଵାଚ ଵଚନଂ ସୁଗ୍ରୀଵଂ ଶତ୍ରୁସୂଦନଃ ॥ 7 ॥
କୃତାଭିଜ୍ଞାନଚିହ୍ନସ୍ତ୍ଵ ମନୟା ଗଜସାହ୍ଵୟା ।
ଲକ୍ଷ୍ମଣେନ ସମୁତ୍ପାଟ୍ୟ ୟୈଷା କଂଠେ କୃତା ତଵ ॥ 8 ॥
ଶୋଭସେଽହ୍ୟଧିକଂ ଵୀର ଲତୟା କଂଠସକ୍ତୟା ।
ଵିପରୀତ ଇଵାକାଶେ ସୂର୍ୟୋ ନକ୍ଷତ୍ରମାଲୟା ॥ 9 ॥
ଅଦ୍ୟ ଵାଲିସମୁତ୍ଥଂ ତେ ଭୟଂ ଵୈରଂ ଚ ଵାନର ।
ଏକେନାହଂ ପ୍ରମୋକ୍ଷ୍ୟାମି ବାଣମୋକ୍ଷେଣ ସଂୟୁଗେ ॥ 10 ॥
ମମ ଦର୍ଶୟ ସୁଗ୍ରୀଵ ଵୈରିଣଂ ଭ୍ରାତୃରୂପିଣମ୍ ।
ଵାଲୀ ଵିନିହତୋ ୟାଵଦ୍ଵନେ ପାଂସୁଷୁ ଵେଷ୍ଟତେ ॥ 11 ॥
ୟଦି ଦୃଷ୍ଟିପଥଂ ପ୍ରାପ୍ତୋ ଜୀଵନ୍ସ ଵିନିଵର୍ତତେ ।
ତତୋ ଦୋଷେଣ ମା ଗଚ୍ଛେତ୍ସଦ୍ୟୋ ଗର୍ହେଚ୍ଚ ମା ଭଵାନ୍ ॥ 12 ॥
ପ୍ରତ୍ୟକ୍ଷଂ ସପ୍ତ ତେ ସାଲା ମୟା ବାଣେନ ଦାରିତାଃ ।
ତେନାଵେହି ବଲେନାଦ୍ୟ ଵାଲିନଂ ନିହତଂ ମୟା ॥ 13 ॥
ଅନୃତଂ ନୋକ୍ତପୂର୍ଵଂ ମେ ଵୀର କୃଚ୍ଛ୍ରେଽପି ତିଷ୍ଟତା ।
ଧର୍ମଲୋଭପରୀତେନ ନ ଚ ଵକ୍ଷ୍ୟେ କଥଂଚନ ॥ 14 ॥
ସଫଲାଂ ଚ କରିଷ୍ୟାମି ପ୍ରତିଜ୍ଞାଂ ଜହି ସଂଭ୍ରମମ୍ ।
ପ୍ରସୂତଂ କଲମଂ କ୍ଷେତ୍ରେ ଵର୍ଷେଣେଵ ଶତକ୍ରତୁଃ ॥ 15 ॥
ତଦାହ୍ଵାନନିମିତ୍ତଂ ତ୍ଵଂ ଵାଲିନୋ ହେମମାଲିନଃ ।
ସୁଗ୍ରୀଵ କୁରୁ ତଂ ଶବ୍ଦଂ ନିଷ୍ପତେଦ୍ୟେନ ଵାନରଃ ॥ 16 ॥
ଜିତକାଶୀ ବଲଶ୍ଲାଘୀ ତ୍ଵୟା ଚାଧର୍ଷିତଃ ପୁରା ।
ନିଷ୍ପତିଷ୍ୟତ୍ୟସଂଗେନ ଵାଲୀ ସ ପ୍ରିୟସଂୟୁଗଃ ॥ 17 ॥
ରିପୂଣାଂ ଧର୍ଷିଣ ଶୂରା ମର୍ଷୟଂତି ନ ସଂୟୁଗେ ।
ଜାନଂତସ୍ତୁ ସ୍ଵକଂ ଵୀର୍ୟଂ ସ୍ତ୍ରୀସମକ୍ଷଂ ଵିଶେଷତଃ ॥ 18 ॥
ସ ତୁ ରାମଵଚଶ୍ଶ୍ରୁତ୍ଵା ସୁଗ୍ରୀଵୋ ହେମପିଂଗଲଃ ।
ନନର୍ଦ କ୍ରୂରନାଦେନ ଵିନିର୍ଭିଂଦନ୍ନିଵାଂବରମ୍ ॥ 19 ॥
ତସ୍ୟ ଶବ୍ଦେନ ଵିତ୍ରସ୍ତା ଗାଵୋ ୟାଂତି ହତପ୍ରଭାଃ ।
ରାଜଦୋଷପରାମୃଷ୍ଟାଃ କୁଲସ୍ତ୍ରିୟ ଇଵାକୁଲାଃ ॥ 20 ॥
ଦ୍ରଵଂତି ଚ ମୃଗାଶ୍ଶୀଘ୍ରଂ ଭଗ୍ନା ଇଵ ରଣେ ହୟାଃ ।
ପତଂତି ଚ ଖଗା ଭୂମୌ କ୍ଷୀଣପୁଣ୍ୟା ଇଵ ଗ୍ରହାଃ ॥ 21 ॥
ତତସ୍ସଜୀମୂତଗଣପ୍ରଣାଦୋ ନାଦଂ ହ୍ୟମୁଂଚତ୍ତ୍ଵରୟା ପ୍ରତୀତଃ ।
ସୂର୍ୟାତ୍ମଜଶ୍ଶୌର୍ୟଵିଵୃଦ୍ଧତେଜାଃ ସରିତ୍ପତିର୍ଵାଽନିଲଚଂଚଲୋର୍ମିଃ ॥ 22 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ଚତୁର୍ଦଶସ୍ସର୍ଗଃ ॥
