ශ්රීමද්වාල්මීකීය රාමායණේ කිෂ්කිංධාකාංඩම් ।
අථ චතුර්දශස්සර්ගඃ ।
සර්වේ තේ ත්වරිතං ගත්වා කිෂ්කිංධාං වාලි පාලිතාම් ।
වෘක්ෂෛරාත්මානමාවෘත්ය ව්යතිෂ්ඨන් ගහනේ වනේ ॥ 1 ॥
විචාර්ය සර්වතෝ දෘෂ්ටිං කානනේ කානනප්රියඃ ।
සුග්රීවෝ විපුලග්රීවඃ ක්රෝධමාහාරයද්භෘශම් ॥ 2 ॥
තතස්ස නිනදං ඝෝරං කෘත්වා යුද්ධාය චාහ්වයත් ।
පරිවාරෛඃ පරිවෘතෝ නාදෛර්භිංදන්නිවාංබරම් ॥ 3 ॥
ගර්ජන්නිව මහාමේඝෝ වායුවේගපුරස්සරඃ ।
අථ බාලාර්කසදෘශෝ දෘප්තසිංහගතිස්තදා ॥ 4 ॥
දෘෂ්ට්වා රාමං ක්රියාදක්ෂං සුග්රීවෝ වාක්යමබ්රවීත් ।
හරිවාගුරයා ව්යාප්තාං තප්තකාංචනතෝරණාම් ।
ප්රාප්තාඃ ස්ම ධ්වජයංත්රාඪ්යාං කිෂ්කිංධාං වාලිනඃ පුරීම් ॥ 5 ॥
ප්රතිජ්ඤා යා ත්වයා වීර කෘතා වාලිවධේ පුරා ।
සඵලාං කුරු තාං ක්ෂිප්රං ලතාං කාල ඉවාගතඃ ॥ 6 ॥
ඒවමුක්තස්තු ධර්මාත්මා සුග්රීවේණ ස රාඝවඃ ।
තමේවෝවාච වචනං සුග්රීවං ශත්රුසූදනඃ ॥ 7 ॥
කෘතාභිජ්ඤානචිහ්නස්ත්ව මනයා ගජසාහ්වයා ।
ලක්ෂ්මණේන සමුත්පාට්ය යෛෂා කංඨේ කෘතා තව ॥ 8 ॥
ශෝභසේऽහ්යධිකං වීර ලතයා කංඨසක්තයා ।
විපරීත ඉවාකාශේ සූර්යෝ නක්ෂත්රමාලයා ॥ 9 ॥
අද්ය වාලිසමුත්ථං තේ භයං වෛරං ච වානර ।
ඒකේනාහං ප්රමෝක්ෂ්යාමි බාණමෝක්ෂේණ සංයුගේ ॥ 10 ॥
මම දර්ශය සුග්රීව වෛරිණං භ්රාතෘරූපිණම් ।
වාලී විනිහතෝ යාවද්වනේ පාංසුෂු වේෂ්ටතේ ॥ 11 ॥
යදි දෘෂ්ටිපථං ප්රාප්තෝ ජීවන්ස විනිවර්තතේ ।
තතෝ දෝෂේණ මා ගච්ඡේත්සද්යෝ ගර්හේච්ච මා භවාන් ॥ 12 ॥
ප්රත්යක්ෂං සප්ත තේ සාලා මයා බාණේන දාරිතාඃ ।
තේනාවේහි බලේනාද්ය වාලිනං නිහතං මයා ॥ 13 ॥
අනෘතං නෝක්තපූර්වං මේ වීර කෘච්ඡ්රේऽපි තිෂ්ටතා ।
ධර්මලෝභපරීතේන න ච වක්ෂ්යේ කථංචන ॥ 14 ॥
සඵලාං ච කරිෂ්යාමි ප්රතිජ්ඤාං ජහි සංභ්රමම් ।
ප්රසූතං කලමං ක්ෂේත්රේ වර්ෂේණේව ශතක්රතුඃ ॥ 15 ॥
තදාහ්වානනිමිත්තං ත්වං වාලිනෝ හේමමාලිනඃ ।
සුග්රීව කුරු තං ශබ්දං නිෂ්පතේද්යේන වානරඃ ॥ 16 ॥
ජිතකාශී බලශ්ලාඝී ත්වයා චාධර්ෂිතඃ පුරා ।
නිෂ්පතිෂ්යත්යසංගේන වාලී ස ප්රියසංයුගඃ ॥ 17 ॥
රිපූණාං ධර්ෂිණ ශූරා මර්ෂයංති න සංයුගේ ।
ජානංතස්තු ස්වකං වීර්යං ස්ත්රීසමක්ෂං විශේෂතඃ ॥ 18 ॥
ස තු රාමවචශ්ශ්රුත්වා සුග්රීවෝ හේමපිංගලඃ ।
නනර්ද ක්රූරනාදේන විනිර්භිංදන්නිවාංබරම් ॥ 19 ॥
තස්ය ශබ්දේන විත්රස්තා ගාවෝ යාංති හතප්රභාඃ ।
රාජදෝෂපරාමෘෂ්ටාඃ කුලස්ත්රිය ඉවාකුලාඃ ॥ 20 ॥
ද්රවංති ච මෘගාශ්ශීඝ්රං භග්නා ඉව රණේ හයාඃ ।
පතංති ච ඛගා භූමෞ ක්ෂීණපුණ්යා ඉව ග්රහාඃ ॥ 21 ॥
තතස්සජීමූතගණප්රණාදෝ නාදං හ්යමුංචත්ත්වරයා ප්රතීතඃ ।
සූර්යාත්මජශ්ශෞර්යවිවෘද්ධතේජාඃ සරිත්පතිර්වාऽනිලචංචලෝර්මිඃ ॥ 22 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ චතුර්දශස්සර්ගඃ ॥
