śrīmadvālmīkīya rāmāyaṇē kiṣkindhākāṇḍam ।
atha chaturdaśassargaḥ ।
sarvē tē tvaritaṃ gatvā kiṣkindhāṃ vāli pālitām ।
vṛkṣairātmānamāvṛtya vyatiṣṭhan gahanē vanē ॥ 1 ॥
vichārya sarvatō dṛṣṭiṃ kānanē kānanapriyaḥ ।
sugrīvō vipulagrīvaḥ krōdhamāhārayadbhṛśam ॥ 2 ॥
tatassa ninadaṃ ghōraṃ kṛtvā yuddhāya chāhvayat ।
parivāraiḥ parivṛtō nādairbhindannivāmbaram ॥ 3 ॥
garjanniva mahāmēghō vāyuvēgapurassaraḥ ।
atha bālārkasadṛśō dṛptasiṃhagatistadā ॥ 4 ॥
dṛṣṭvā rāmaṃ kriyādakṣaṃ sugrīvō vākyamabravīt ।
harivāgurayā vyāptāṃ taptakāñchanatōraṇām ।
prāptāḥ sma dhvajayantrāḍhyāṃ kiṣkindhāṃ vālinaḥ purīm ॥ 5 ॥
pratijñā yā tvayā vīra kṛtā vālivadhē purā ।
saphalāṃ kuru tāṃ kṣipraṃ latāṃ kāla ivāgataḥ ॥ 6 ॥
ēvamuktastu dharmātmā sugrīvēṇa sa rāghavaḥ ।
tamēvōvācha vachanaṃ sugrīvaṃ śatrusūdanaḥ ॥ 7 ॥
kṛtābhijñānachihnastva manayā gajasāhvayā ।
lakṣmaṇēna samutpāṭya yaiṣā kaṇṭhē kṛtā tava ॥ 8 ॥
śōbhasē'hyadhikaṃ vīra latayā kaṇṭhasaktayā ।
viparīta ivākāśē sūryō nakṣatramālayā ॥ 9 ॥
adya vālisamutthaṃ tē bhayaṃ vairaṃ cha vānara ।
ēkēnāhaṃ pramōkṣyāmi bāṇamōkṣēṇa saṃyugē ॥ 10 ॥
mama darśaya sugrīva vairiṇaṃ bhrātṛrūpiṇam ।
vālī vinihatō yāvadvanē pāṃsuṣu vēṣṭatē ॥ 11 ॥
yadi dṛṣṭipathaṃ prāptō jīvansa vinivartatē ।
tatō dōṣēṇa mā gachChētsadyō garhēchcha mā bhavān ॥ 12 ॥
pratyakṣaṃ sapta tē sālā mayā bāṇēna dāritāḥ ।
tēnāvēhi balēnādya vālinaṃ nihataṃ mayā ॥ 13 ॥
anṛtaṃ nōktapūrvaṃ mē vīra kṛchChrē'pi tiṣṭatā ।
dharmalōbhaparītēna na cha vakṣyē kathañchana ॥ 14 ॥
saphalāṃ cha kariṣyāmi pratijñāṃ jahi sambhramam ।
prasūtaṃ kalamaṃ kṣētrē varṣēṇēva śatakratuḥ ॥ 15 ॥
tadāhvānanimittaṃ tvaṃ vālinō hēmamālinaḥ ।
sugrīva kuru taṃ śabdaṃ niṣpatēdyēna vānaraḥ ॥ 16 ॥
jitakāśī balaślāghī tvayā chādharṣitaḥ purā ।
niṣpatiṣyatyasaṅgēna vālī sa priyasaṃyugaḥ ॥ 17 ॥
ripūṇāṃ dharṣiṇa śūrā marṣayanti na saṃyugē ।
jānantastu svakaṃ vīryaṃ strīsamakṣaṃ viśēṣataḥ ॥ 18 ॥
sa tu rāmavachaśśrutvā sugrīvō hēmapiṅgalaḥ ।
nanarda krūranādēna vinirbhindannivāmbaram ॥ 19 ॥
tasya śabdēna vitrastā gāvō yānti hataprabhāḥ ।
rājadōṣaparāmṛṣṭāḥ kulastriya ivākulāḥ ॥ 20 ॥
dravanti cha mṛgāśśīghraṃ bhagnā iva raṇē hayāḥ ।
patanti cha khagā bhūmau kṣīṇapuṇyā iva grahāḥ ॥ 21 ॥
tatassajīmūtagaṇapraṇādō nādaṃ hyamuñchattvarayā pratītaḥ ।
sūryātmajaśśauryavivṛddhatējāḥ saritpatirvā'nilachañchalōrmiḥ ॥ 22 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē chaturdaśassargaḥ ॥
