ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ ചതുര്ദശസ്സര്ഗഃ ।
സർവേ തേ ത്വരിതം ഗത്വാ കിഷ്കിംധാം വാലി പാലിതാമ് ।
വൃക്ഷൈരാത്മാനമാവൃത്യ വ്യതിഷ്ഠന് ഗഹനേ വനേ ॥ 1 ॥
വിചാര്യ സർവതോ ദൃഷ്ടിം കാനനേ കാനനപ്രിയഃ ।
സുഗ്രീവോ വിപുലഗ്രീവഃ ക്രോധമാഹാരയദ്ഭൃശമ് ॥ 2 ॥
തതസ്സ നിനദം ഘോരം കൃത്വാ യുദ്ധായ ചാഹ്വയത് ।
പരിവാരൈഃ പരിവൃതോ നാദൈര്ഭിംദന്നിവാംബരമ് ॥ 3 ॥
ഗര്ജന്നിവ മഹാമേഘോ വായുവേഗപുരസ്സരഃ ।
അഥ ബാലാര്കസദൃശോ ദൃപ്തസിംഹഗതിസ്തദാ ॥ 4 ॥
ദൃഷ്ട്വാ രാമം ക്രിയാദക്ഷം സുഗ്രീവോ വാക്യമബ്രവീത് ।
ഹരിവാഗുരയാ വ്യാപ്താം തപ്തകാംചനതോരണാമ് ।
പ്രാപ്താഃ സ്മ ധ്വജയംത്രാഢ്യാം കിഷ്കിംധാം വാലിനഃ പുരീമ് ॥ 5 ॥
പ്രതിജ്ഞാ യാ ത്വയാ വീര കൃതാ വാലിവധേ പുരാ ।
സഫലാം കുരു താം ക്ഷിപ്രം ലതാം കാല ഇവാഗതഃ ॥ 6 ॥
ഏവമുക്തസ്തു ധര്മാത്മാ സുഗ്രീവേണ സ രാഘവഃ ।
തമേവോവാച വചനം സുഗ്രീവം ശത്രുസൂദനഃ ॥ 7 ॥
കൃതാഭിജ്ഞാനചിഹ്നസ്ത്വ മനയാ ഗജസാഹ്വയാ ।
ലക്ഷ്മണേന സമുത്പാട്യ യൈഷാ കംഠേ കൃതാ തവ ॥ 8 ॥
ശോഭസേഽഹ്യധികം വീര ലതയാ കംഠസക്തയാ ।
വിപരീത ഇവാകാശേ സൂര്യോ നക്ഷത്രമാലയാ ॥ 9 ॥
അദ്യ വാലിസമുത്ഥം തേ ഭയം വൈരം ച വാനര ।
ഏകേനാഹം പ്രമോക്ഷ്യാമി ബാണമോക്ഷേണ സംയുഗേ ॥ 10 ॥
മമ ദര്ശയ സുഗ്രീവ വൈരിണം ഭ്രാതൃരൂപിണമ് ।
വാലീ വിനിഹതോ യാവദ്വനേ പാംസുഷു വേഷ്ടതേ ॥ 11 ॥
യദി ദൃഷ്ടിപഥം പ്രാപ്തോ ജീവന്സ വിനിവര്തതേ ।
തതോ ദോഷേണ മാ ഗച്ഛേത്സദ്യോ ഗര്ഹേച്ച മാ ഭവാന് ॥ 12 ॥
പ്രത്യക്ഷം സപ്ത തേ സാലാ മയാ ബാണേന ദാരിതാഃ ।
തേനാവേഹി ബലേനാദ്യ വാലിനം നിഹതം മയാ ॥ 13 ॥
അനൃതം നോക്തപൂർവം മേ വീര കൃച്ഛ്രേഽപി തിഷ്ടതാ ।
ധര്മലോഭപരീതേന ന ച വക്ഷ്യേ കഥംചന ॥ 14 ॥
സഫലാം ച കരിഷ്യാമി പ്രതിജ്ഞാം ജഹി സംഭ്രമമ് ।
പ്രസൂതം കലമം ക്ഷേത്രേ വര്ഷേണേവ ശതക്രതുഃ ॥ 15 ॥
തദാഹ്വാനനിമിത്തം ത്വം വാലിനോ ഹേമമാലിനഃ ।
സുഗ്രീവ കുരു തം ശബ്ദം നിഷ്പതേദ്യേന വാനരഃ ॥ 16 ॥
ജിതകാശീ ബലശ്ലാഘീ ത്വയാ ചാധര്ഷിതഃ പുരാ ।
നിഷ്പതിഷ്യത്യസംഗേന വാലീ സ പ്രിയസംയുഗഃ ॥ 17 ॥
രിപൂണാം ധര്ഷിണ ശൂരാ മര്ഷയംതി ന സംയുഗേ ।
ജാനംതസ്തു സ്വകം വീര്യം സ്ത്രീസമക്ഷം വിശേഷതഃ ॥ 18 ॥
സ തു രാമവചശ്ശ്രുത്വാ സുഗ്രീവോ ഹേമപിംഗലഃ ।
നനര്ദ ക്രൂരനാദേന വിനിര്ഭിംദന്നിവാംബരമ് ॥ 19 ॥
തസ്യ ശബ്ദേന വിത്രസ്താ ഗാവോ യാംതി ഹതപ്രഭാഃ ।
രാജദോഷപരാമൃഷ്ടാഃ കുലസ്ത്രിയ ഇവാകുലാഃ ॥ 20 ॥
ദ്രവംതി ച മൃഗാശ്ശീഘ്രം ഭഗ്നാ ഇവ രണേ ഹയാഃ ।
പതംതി ച ഖഗാ ഭൂമൌ ക്ഷീണപുണ്യാ ഇവ ഗ്രഹാഃ ॥ 21 ॥
തതസ്സജീമൂതഗണപ്രണാദോ നാദം ഹ്യമുംചത്ത്വരയാ പ്രതീതഃ ।
സൂര്യാത്മജശ്ശൌര്യവിവൃദ്ധതേജാഃ സരിത്പതിർവാഽനിലചംചലോര്മിഃ ॥ 22 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ ചതുര്ദശസ്സര്ഗഃ ॥
