śrīmadvālmīkīya rāmāyaṇē sundarakāṇḍam ।
atha trayōviṃśassargaḥ ।
ityuktvā maithilīṃ rājā rāvaṇaḥ śatrurāvaṇaḥ ।
sandiśya cha tataḥ sarvā rākṣasīrnirjagāma ha ॥ 1 ॥
niṣkrāntē rākṣasēndrē tu punarantaḥpuraṃ gatē ।
rākṣasyō bhīmarūpāstāḥ sītāṃ samabhidudruvuḥ ॥ 2 ॥
tataḥ sītāmupāgamya rākṣasyaḥ krōdhamūrChitāḥ ।
paraṃ paruṣayā vāchā vaidēhīmidamabruvan ॥ 3 ॥
paulastyasya variṣṭhasya rāvaṇasya mahātmanaḥ ।
daśagrīvasya bhāryā tvaṃ sītē na bahumanyasē ॥ 4 ॥
tatastvēkajaṭā nāma rākṣasī vākyamabravīt ।
āmantyra krōdhātāmrākṣī sītāṃ karatalōdarīm ॥ 5 ॥
prajāpatīnāṃ ṣaṇṇāṃ tu chaturthō yaḥ prajāpatiḥ ।
mānasō brahmaṇaḥ putraḥ pulastya iti viśrutaḥ ॥ 6 ॥
pulastyasya tu tējasvī maharṣirmānasaḥ sutaḥ ।
nāmnā sa viśravā nāma prajāpatisamaprabhaḥ ॥ 7 ॥
tasya putrō viśālākṣi rāvaṇaḥ śatrurāvaṇaḥ ।
tasya tvaṃ rākṣasēndrasya bhāryā bhavitumarhasi ॥ 8 ॥
mayōktaṃ chārusarvāṅgiḥ vākyaṃ kiṃ nānumanyasē ।
tatō harijaṭā nāma rākṣasī vākyamabravīt ॥ 9 ॥
vivartya nayanē kōpānmārjārasadṛśēkṣaṇā ।
yēna dēvāstrayastriṃśaddēvarājaścha nirjitāḥ ॥ 10 ॥
tasya tvaṃ rākṣasēndrasya bhāryā bhavitumarhasi ।
tatastu praghasā nāma rākṣasī krōdhamūrChitā ॥ 11 ॥
bhartsayantī tadā ghōramidaṃ vachanamabravīt ।
vīryōtsiktasya śūrasya saṅgrāmēṣu nivartinaḥ ॥ 12 ॥
balinō vīryayuktasya bhāryātvaṃ kiṃ na lapsyasē ।
priyāṃ bahumatāṃ bhāryāṃ tyaktvā rājā mahābalaḥ ॥ 13 ॥
sarvāsāṃ cha mahābhāgāṃ tvāmupaiṣyati rāvaṇaḥ ।
samṛddhaṃ strīsahasrēṇa nānāratnōpaśōbhitam ॥ 14 ॥
antaḥpuraṃ samutsṛjya tvāmupaiṣyati rāvaṇaḥ ।
anyā tu vikaṭā nāma rākṣasī vākyamabravīt ॥ 15 ॥
asakṛddēvatā yuddhē nāgagandharvadānavāḥ ।
nirjitāḥ samarē yēna sa tē pārśvamupāgataḥ ॥ 16 ॥
tasya sarvasamṛddhasya rāvaṇasya mahātmanaḥ ।
kimadya rākṣasēndrasya bhāryātvaṃ nēchChasē'dhamē ॥ 17 ॥
tatastu durmukhī nāma rākṣasī vākyamabravīt ।
yasya sūryō na tapati bhītō yasya cha mārutaḥ ॥ 18 ॥
na vāti smāyatāpāṅgē kiṃ tvaṃ tasya na tiṣṭhasi ।
puṣpavṛṣṭiṃ cha taravō mumuchuryasya vai bhayāt ॥ 19 ॥
śailāścha subhru pānīyaṃ jaladāścha yadēchChati ।
tasya nairṛtarājasya rājarājasya bhāmini ॥ 20 ॥
kiṃ tvaṃ na kuruṣē buddhiṃ bhāryārthē rāvaṇasya hi ।
sādhu tē tattvatō dēvi kathitaṃ sādhu bhāmini ॥ 21 ॥
ityārṣē śrīmadrāmāyaṇē vālmīkīya ādikāvyē sundarakāṇḍē trayōviṃśassargaḥ ॥
