ශ්රීමද්වාල්මීකීය රාමායණේ සුංදරකාංඩම් ।
අථ ත්රයෝවිංශස්සර්ගඃ ।
ඉත්යුක්ත්වා මෛථිලීං රාජා රාවණඃ ශත්රුරාවණඃ ।
සංදිශ්ය ච තතඃ සර්වා රාක්ෂසීර්නිර්ජගාම හ ॥ 1 ॥
නිෂ්ක්රාංතේ රාක්ෂසේංද්රේ තු පුනරංතඃපුරං ගතේ ।
රාක්ෂස්යෝ භීමරූපාස්තාඃ සීතාං සමභිදුද්රුවුඃ ॥ 2 ॥
තතඃ සීතාමුපාගම්ය රාක්ෂස්යඃ ක්රෝධමූර්ඡිතාඃ ।
පරං පරුෂයා වාචා වෛදේහීමිදමබ්රුවන් ॥ 3 ॥
පෞලස්ත්යස්ය වරිෂ්ඨස්ය රාවණස්ය මහාත්මනඃ ।
දශග්රීවස්ය භාර්යා ත්වං සීතේ න බහුමන්යසේ ॥ 4 ॥
තතස්ත්වේකජටා නාම රාක්ෂසී වාක්යමබ්රවීත් ।
ආමංත්ය්ර ක්රෝධාතාම්රාක්ෂී සීතාං කරතලෝදරීම් ॥ 5 ॥
ප්රජාපතීනාං ෂණ්ණාං තු චතුර්ථෝ යඃ ප්රජාපතිඃ ।
මානසෝ බ්රහ්මණඃ පුත්රඃ පුලස්ත්ය ඉති විශ්රුතඃ ॥ 6 ॥
පුලස්ත්යස්ය තු තේජස්වී මහර්ෂිර්මානසඃ සුතඃ ।
නාම්නා ස විශ්රවා නාම ප්රජාපතිසමප්රභඃ ॥ 7 ॥
තස්ය පුත්රෝ විශාලාක්ෂි රාවණඃ ශත්රුරාවණඃ ।
තස්ය ත්වං රාක්ෂසේංද්රස්ය භාර්යා භවිතුමර්හසි ॥ 8 ॥
මයෝක්තං චාරුසර්වාංගිඃ වාක්යං කිං නානුමන්යසේ ।
තතෝ හරිජටා නාම රාක්ෂසී වාක්යමබ්රවීත් ॥ 9 ॥
විවර්ත්ය නයනේ කෝපාන්මාර්ජාරසදෘශේක්ෂණා ।
යේන දේවාස්ත්රයස්ත්රිංශද්දේවරාජශ්ච නිර්ජිතාඃ ॥ 10 ॥
තස්ය ත්වං රාක්ෂසේංද්රස්ය භාර්යා භවිතුමර්හසි ।
තතස්තු ප්රඝසා නාම රාක්ෂසී ක්රෝධමූර්ඡිතා ॥ 11 ॥
භර්ත්සයංතී තදා ඝෝරමිදං වචනමබ්රවීත් ।
වීර්යෝත්සික්තස්ය ශූරස්ය සංග්රාමේෂු නිවර්තිනඃ ॥ 12 ॥
බලිනෝ වීර්යයුක්තස්ය භාර්යාත්වං කිං න ලප්ස්යසේ ।
ප්රියාං බහුමතාං භාර්යාං ත්යක්ත්වා රාජා මහාබලඃ ॥ 13 ॥
සර්වාසාං ච මහාභාගාං ත්වාමුපෛෂ්යති රාවණඃ ।
සමෘද්ධං ස්ත්රීසහස්රේණ නානාරත්නෝපශෝභිතම් ॥ 14 ॥
අංතඃපුරං සමුත්සෘජ්ය ත්වාමුපෛෂ්යති රාවණඃ ।
අන්යා තු විකටා නාම රාක්ෂසී වාක්යමබ්රවීත් ॥ 15 ॥
අසකෘද්දේවතා යුද්ධේ නාගගංධර්වදානවාඃ ।
නිර්ජිතාඃ සමරේ යේන ස තේ පාර්ශ්වමුපාගතඃ ॥ 16 ॥
තස්ය සර්වසමෘද්ධස්ය රාවණස්ය මහාත්මනඃ ।
කිමද්ය රාක්ෂසේංද්රස්ය භාර්යාත්වං නේච්ඡසේऽධමේ ॥ 17 ॥
තතස්තු දුර්මුඛී නාම රාක්ෂසී වාක්යමබ්රවීත් ।
යස්ය සූර්යෝ න තපති භීතෝ යස්ය ච මාරුතඃ ॥ 18 ॥
න වාති ස්මායතාපාංගේ කිං ත්වං තස්ය න තිෂ්ඨසි ।
පුෂ්පවෘෂ්ටිං ච තරවෝ මුමුචුර්යස්ය වෛ භයාත් ॥ 19 ॥
ශෛලාශ්ච සුභ්රු පානීයං ජලදාශ්ච යදේච්ඡති ।
තස්ය නෛරෘතරාජස්ය රාජරාජස්ය භාමිනි ॥ 20 ॥
කිං ත්වං න කුරුෂේ බුද්ධිං භාර්යාර්ථේ රාවණස්ය හි ।
සාධු තේ තත්ත්වතෝ දේවි කථිතං සාධු භාමිනි ॥ 21 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ත්රයෝවිංශස්සර්ගඃ ॥
