śrīmadvālmīkīya rāmāyaṇē araṇyakāṇḍam ।
atha saptamassargaḥ ।
rāmastu sahitō bhrātrā sītayā cha parantapaḥ ।
sutīkṣṇasyāśramapadaṃ jagāma saha tairdvijaiḥ ॥ 1 ॥
sa gatvā dīrghamadhvānaṃ nadīstīrtvā bahūdakāḥ ।
dadarśa vimalaṃ śailaṃ mahāmēghamivōnnatam ॥ 2 ॥
tata stadikṣvākuvarau santataṃ vividhairdrumaiḥ ।
kānanaṃ tau viviśatussītayā saha rāghavau ॥ 3 ॥
praviṣṭastu vanaṃ ghōraṃ bahupuṣpaphaladrumam ।
dadarśāśramamēkāntē chīramālāpariṣkṛtam ॥ 4 ॥
tatra tāpasamāsīnaṃ malapaṅkajaṭādharam ।
rāmassutīkṣṇaṃ vidhivattapōvṛddhamabhāṣata ॥ 5 ॥
rāmō'hamasmi bhagavanbhavantaṃ draṣṭumāgataḥ ।
tvaṃ mābhivada dharmajña maharṣē satyavikrama ॥ 6 ॥
sa nirīkṣya tatō dhīrō rāmaṃ dharmabhṛtāṃ varam ।
samāśliṣya cha bāhubhyāmidaṃ vachanamabravīt ॥ 7 ॥
svāgataṃ tē raghuśrēṣṭha rāma satyabhṛtāṃ vara ।
āśramō'yaṃ tvayākrāntassanātha iva sāmpratam ॥ 8 ॥
pratīkṣamāṇastvāmēva nārōhē'haṃ mahāyaśaḥ ।
dēvalōkamitō vīra dēhaṃ tyaktvā mahītalē ।
chitrakūṭamupādāya rājyabhraṣṭō'si mē śrutaḥ ॥ 9 ॥
ihōpayātaḥ kākutthsa dēvarājaśśatakratuḥ ॥ 10 ॥
upāgamya cha mē dēvō mahādēvassurēśvaraḥ ।
sarvān lōkāñjitānāha mama puṇyēna karmaṇā ॥ 11 ॥
tēṣu dēvarṣijuṣṭēṣu jitēṣu tapasā mayā ।
matprasādātsabhāryastvaṃ viharasva salakṣmaṇaḥ ॥ 12 ॥
tamugratapasāyuktaṃ maharṣiṃ satyavādinam ।
pratyuvāchātmavānrāmō brahmāṇamiva kāśyapaḥ ॥ 13 ॥
ahamēvāhariṣyāmi sarvān lōkānmahāmunē ।
āvāsaṃ tvahamichChāmi pradiṣṭamiha kānanē ॥ 14 ॥
bhavānsarvatra kuśalassarvabhūtahitē rataḥ ।
ākhyātaśśarabhaṅgēṇa gautamēna mahātmanā ॥ 15 ॥
ēvamuktastu rāmēṇa maharṣirlōkaviśrutaḥ ।
abravīnmadhuraṃ vākyaṃ harṣēṇa mahatā'plutaḥ ॥ 16 ॥
ayamēvāśramō rāma guṇavānramyatāmiha ।
ṛṣisaṅghānucharitassadā mūlaphalairyutaḥ ॥ 17 ॥
imamāśramamāgamya mṛgasaṅghā mahāyaśaḥ ।
ahatvā pratigachChanti lōbhayitvā'kutōbhayāḥ ॥ 18 ॥
nānyaddhōṣaṃ bhavēdatra mṛgēbhyō'nyatra viddhi vai ।
tachChṛtvā vachanaṃ tasya maharṣērlakṣmaṇāgrajaḥ ॥ 19 ॥
uvācha vachanaṃ dhīrō vikṛṣya saśaraṃ dhanuḥ ।
tānahaṃ sumahābhāga mṛgasaṅghānsamāgatān ॥ 20 ॥
hanyāṃ niśitadhārēṇa śarēṇāśanivarchasā ।
bhavāṃstatrābhiṣajyēta kiṃsyātkṛchChrataraṃ tataḥ ॥ 21 ॥
ētasminnāśramē vāsaṃ chiraṃ tu na samarthayē ।
tamēvamuktvōparamaṃ rāmassandhyāmupāgamat ॥ 22 ॥
anvāsya paśchimāṃ snadhyāṃ tatra vāsamakalpayat ।
sutīkṣṇasyā'śramē ramyē sītayā lakṣmaṇēna cha ॥ 23 ॥
tamēvamuktvōparamaṃ rāmassandhyāmupāgamat ॥ 24 ॥
anvāsya paśchimāṃ sanndhyāṃ tatra vāsamakalpayat ।
sutīkṣṇasyāśramē ramyē sītayā lakṣmaṇēna cha ॥ 25 ॥
tataśśubhaṃ tāpasabhōjyamannaṃ svayaṃ sutīkṣṇaḥ puruṣarṣabhābhyām ।
tābhyāṃ susatkṛtya dadau mahātmā sandhyānivṛttau rajanīṃ mavēkṣya ॥ 26 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē saptamassargaḥ ॥
