ශ්රීමද්වාල්මීකීය රාමායණේ අරණ්යකාංඩම් ।
අථ සප්තමස්සර්ගඃ ।
රාමස්තු සහිතෝ භ්රාත්රා සීතයා ච පරංතපඃ ।
සුතීක්ෂ්ණස්යාශ්රමපදං ජගාම සහ තෛර්ද්විජෛඃ ॥ 1 ॥
ස ගත්වා දීර්ඝමධ්වානං නදීස්තීර්ත්වා බහූදකාඃ ।
දදර්ශ විමලං ශෛලං මහාමේඝමිවෝන්නතම් ॥ 2 ॥
තත ස්තදික්ෂ්වාකුවරෞ සංතතං විවිධෛර්ද්රුමෛඃ ।
කානනං තෞ විවිශතුස්සීතයා සහ රාඝවෞ ॥ 3 ॥
ප්රවිෂ්ටස්තු වනං ඝෝරං බහුපුෂ්පඵලද්රුමම් ।
දදර්ශාශ්රමමේකාංතේ චීරමාලාපරිෂ්කෘතම් ॥ 4 ॥
තත්ර තාපසමාසීනං මලපංකජටාධරම් ।
රාමස්සුතීක්ෂ්ණං විධිවත්තපෝවෘද්ධමභාෂත ॥ 5 ॥
රාමෝऽහමස්මි භගවන්භවංතං ද්රෂ්ටුමාගතඃ ।
ත්වං මාභිවද ධර්මජ්ඤ මහර්ෂේ සත්යවික්රම ॥ 6 ॥
ස නිරීක්ෂ්ය තතෝ ධීරෝ රාමං ධර්මභෘතාං වරම් ।
සමාශ්ලිෂ්ය ච බාහුභ්යාමිදං වචනමබ්රවීත් ॥ 7 ॥
ස්වාගතං තේ රඝුශ්රේෂ්ඨ රාම සත්යභෘතාං වර ।
ආශ්රමෝऽයං ත්වයාක්රාංතස්සනාථ ඉව සාංප්රතම් ॥ 8 ॥
ප්රතීක්ෂමාණස්ත්වාමේව නාරෝහේऽහං මහායශඃ ।
දේවලෝකමිතෝ වීර දේහං ත්යක්ත්වා මහීතලේ ।
චිත්රකූටමුපාදාය රාජ්යභ්රෂ්ටෝऽසි මේ ශ්රුතඃ ॥ 9 ॥
ඉහෝපයාතඃ කාකුත්ථ්ස දේවරාජශ්ශතක්රතුඃ ॥ 10 ॥
උපාගම්ය ච මේ දේවෝ මහාදේවස්සුරේශ්වරඃ ।
සර්වාන් ලෝකාංජිතානාහ මම පුණ්යේන කර්මණා ॥ 11 ॥
තේෂු දේවර්ෂිජුෂ්ටේෂු ජිතේෂු තපසා මයා ।
මත්ප්රසාදාත්සභාර්යස්ත්වං විහරස්ව සලක්ෂ්මණඃ ॥ 12 ॥
තමුග්රතපසායුක්තං මහර්ෂිං සත්යවාදිනම් ।
ප්රත්යුවාචාත්මවාන්රාමෝ බ්රහ්මාණමිව කාශ්යපඃ ॥ 13 ॥
අහමේවාහරිෂ්යාමි සර්වාන් ලෝකාන්මහාමුනේ ।
ආවාසං ත්වහමිච්ඡාමි ප්රදිෂ්ටමිහ කානනේ ॥ 14 ॥
භවාන්සර්වත්ර කුශලස්සර්වභූතහිතේ රතඃ ।
ආඛ්යාතශ්ශරභංගේණ ගෞතමේන මහාත්මනා ॥ 15 ॥
ඒවමුක්තස්තු රාමේණ මහර්ෂිර්ලෝකවිශ්රුතඃ ।
අබ්රවීන්මධුරං වාක්යං හර්ෂේණ මහතාऽප්ලුතඃ ॥ 16 ॥
අයමේවාශ්රමෝ රාම ගුණවාන්රම්යතාමිහ ।
ඍෂිසංඝානුචරිතස්සදා මූලඵලෛර්යුතඃ ॥ 17 ॥
ඉමමාශ්රමමාගම්ය මෘගසංඝා මහායශඃ ।
අහත්වා ප්රතිගච්ඡංති ලෝභයිත්වාऽකුතෝභයාඃ ॥ 18 ॥
නාන්යද්ධෝෂං භවේදත්ර මෘගේභ්යෝऽන්යත්ර විද්ධි වෛ ।
තච්ඡෘත්වා වචනං තස්ය මහර්ෂේර්ලක්ෂ්මණාග්රජඃ ॥ 19 ॥
උවාච වචනං ධීරෝ විකෘෂ්ය සශරං ධනුඃ ।
තානහං සුමහාභාග මෘගසංඝාන්සමාගතාන් ॥ 20 ॥
හන්යාං නිශිතධාරේණ ශරේණාශනිවර්චසා ।
භවාංස්තත්රාභිෂජ්යේත කිංස්යාත්කෘච්ඡ්රතරං තතඃ ॥ 21 ॥
ඒතස්මින්නාශ්රමේ වාසං චිරං තු න සමර්ථයේ ।
තමේවමුක්ත්වෝපරමං රාමස්සංධ්යාමුපාගමත් ॥ 22 ॥
අන්වාස්ය පශ්චිමාං ස්නධ්යාං තත්ර වාසමකල්පයත් ।
සුතීක්ෂ්ණස්යාऽශ්රමේ රම්යේ සීතයා ලක්ෂ්මණේන ච ॥ 23 ॥
තමේවමුක්ත්වෝපරමං රාමස්සංධ්යාමුපාගමත් ॥ 24 ॥
අන්වාස්ය පශ්චිමාං සංංධ්යාං තත්ර වාසමකල්පයත් ।
සුතීක්ෂ්ණස්යාශ්රමේ රම්යේ සීතයා ලක්ෂ්මණේන ච ॥ 25 ॥
තතශ්ශුභං තාපසභෝජ්යමන්නං ස්වයං සුතීක්ෂ්ණඃ පුරුෂර්ෂභාභ්යාම් ।
තාභ්යාං සුසත්කෘත්ය දදෞ මහාත්මා සංධ්යානිවෘත්තෞ රජනීං මවේක්ෂ්ය ॥ 26 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ සප්තමස්සර්ගඃ ॥
