ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ସପ୍ତମସ୍ସର୍ଗଃ ।
ରାମସ୍ତୁ ସହିତୋ ଭ୍ରାତ୍ରା ସୀତୟା ଚ ପରଂତପଃ ।
ସୁତୀକ୍ଷ୍ଣସ୍ୟାଶ୍ରମପଦଂ ଜଗାମ ସହ ତୈର୍ଦ୍ଵିଜୈଃ ॥ 1 ॥
ସ ଗତ୍ଵା ଦୀର୍ଘମଧ୍ଵାନଂ ନଦୀସ୍ତୀର୍ତ୍ଵା ବହୂଦକାଃ ।
ଦଦର୍ଶ ଵିମଲଂ ଶୈଲଂ ମହାମେଘମିଵୋନ୍ନତମ୍ ॥ 2 ॥
ତତ ସ୍ତଦିକ୍ଷ୍ଵାକୁଵରୌ ସଂତତଂ ଵିଵିଧୈର୍ଦ୍ରୁମୈଃ ।
କାନନଂ ତୌ ଵିଵିଶତୁସ୍ସୀତୟା ସହ ରାଘଵୌ ॥ 3 ॥
ପ୍ରଵିଷ୍ଟସ୍ତୁ ଵନଂ ଘୋରଂ ବହୁପୁଷ୍ପଫଲଦ୍ରୁମମ୍ ।
ଦଦର୍ଶାଶ୍ରମମେକାଂତେ ଚୀରମାଲାପରିଷ୍କୃତମ୍ ॥ 4 ॥
ତତ୍ର ତାପସମାସୀନଂ ମଲପଂକଜଟାଧରମ୍ ।
ରାମସ୍ସୁତୀକ୍ଷ୍ଣଂ ଵିଧିଵତ୍ତପୋଵୃଦ୍ଧମଭାଷତ ॥ 5 ॥
ରାମୋଽହମସ୍ମି ଭଗଵନ୍ଭଵଂତଂ ଦ୍ରଷ୍ଟୁମାଗତଃ ।
ତ୍ଵଂ ମାଭିଵଦ ଧର୍ମଜ୍ଞ ମହର୍ଷେ ସତ୍ୟଵିକ୍ରମ ॥ 6 ॥
ସ ନିରୀକ୍ଷ୍ୟ ତତୋ ଧୀରୋ ରାମଂ ଧର୍ମଭୃତାଂ ଵରମ୍ ।
ସମାଶ୍ଲିଷ୍ୟ ଚ ବାହୁଭ୍ୟାମିଦଂ ଵଚନମବ୍ରଵୀତ୍ ॥ 7 ॥
ସ୍ଵାଗତଂ ତେ ରଘୁଶ୍ରେଷ୍ଠ ରାମ ସତ୍ୟଭୃତାଂ ଵର ।
ଆଶ୍ରମୋଽୟଂ ତ୍ଵୟାକ୍ରାଂତସ୍ସନାଥ ଇଵ ସାଂପ୍ରତମ୍ ॥ 8 ॥
ପ୍ରତୀକ୍ଷମାଣସ୍ତ୍ଵାମେଵ ନାରୋହେଽହଂ ମହାୟଶଃ ।
ଦେଵଲୋକମିତୋ ଵୀର ଦେହଂ ତ୍ୟକ୍ତ୍ଵା ମହୀତଲେ ।
ଚିତ୍ରକୂଟମୁପାଦାୟ ରାଜ୍ୟଭ୍ରଷ୍ଟୋଽସି ମେ ଶ୍ରୁତଃ ॥ 9 ॥
ଇହୋପୟାତଃ କାକୁତ୍ଥ୍ସ ଦେଵରାଜଶ୍ଶତକ୍ରତୁଃ ॥ 10 ॥
ଉପାଗମ୍ୟ ଚ ମେ ଦେଵୋ ମହାଦେଵସ୍ସୁରେଶ୍ଵରଃ ।
ସର୍ଵାନ୍ ଲୋକାଂଜିତାନାହ ମମ ପୁଣ୍ୟେନ କର୍ମଣା ॥ 11 ॥
ତେଷୁ ଦେଵର୍ଷିଜୁଷ୍ଟେଷୁ ଜିତେଷୁ ତପସା ମୟା ।
ମତ୍ପ୍ରସାଦାତ୍ସଭାର୍ୟସ୍ତ୍ଵଂ ଵିହରସ୍ଵ ସଲକ୍ଷ୍ମଣଃ ॥ 12 ॥
ତମୁଗ୍ରତପସାୟୁକ୍ତଂ ମହର୍ଷିଂ ସତ୍ୟଵାଦିନମ୍ ।
ପ୍ରତ୍ୟୁଵାଚାତ୍ମଵାନ୍ରାମୋ ବ୍ରହ୍ମାଣମିଵ କାଶ୍ୟପଃ ॥ 13 ॥
ଅହମେଵାହରିଷ୍ୟାମି ସର୍ଵାନ୍ ଲୋକାନ୍ମହାମୁନେ ।
ଆଵାସଂ ତ୍ଵହମିଚ୍ଛାମି ପ୍ରଦିଷ୍ଟମିହ କାନନେ ॥ 14 ॥
ଭଵାନ୍ସର୍ଵତ୍ର କୁଶଲସ୍ସର୍ଵଭୂତହିତେ ରତଃ ।
ଆଖ୍ୟାତଶ୍ଶରଭଂଗେଣ ଗୌତମେନ ମହାତ୍ମନା ॥ 15 ॥
ଏଵମୁକ୍ତସ୍ତୁ ରାମେଣ ମହର୍ଷିର୍ଲୋକଵିଶ୍ରୁତଃ ।
ଅବ୍ରଵୀନ୍ମଧୁରଂ ଵାକ୍ୟଂ ହର୍ଷେଣ ମହତାଽପ୍ଲୁତଃ ॥ 16 ॥
ଅୟମେଵାଶ୍ରମୋ ରାମ ଗୁଣଵାନ୍ରମ୍ୟତାମିହ ।
ଋଷିସଂଘାନୁଚରିତସ୍ସଦା ମୂଲଫଲୈର୍ୟୁତଃ ॥ 17 ॥
ଇମମାଶ୍ରମମାଗମ୍ୟ ମୃଗସଂଘା ମହାୟଶଃ ।
ଅହତ୍ଵା ପ୍ରତିଗଚ୍ଛଂତି ଲୋଭୟିତ୍ଵାଽକୁତୋଭୟାଃ ॥ 18 ॥
ନାନ୍ୟଦ୍ଧୋଷଂ ଭଵେଦତ୍ର ମୃଗେଭ୍ୟୋଽନ୍ୟତ୍ର ଵିଦ୍ଧି ଵୈ ।
ତଚ୍ଛୃତ୍ଵା ଵଚନଂ ତସ୍ୟ ମହର୍ଷେର୍ଲକ୍ଷ୍ମଣାଗ୍ରଜଃ ॥ 19 ॥
ଉଵାଚ ଵଚନଂ ଧୀରୋ ଵିକୃଷ୍ୟ ସଶରଂ ଧନୁଃ ।
ତାନହଂ ସୁମହାଭାଗ ମୃଗସଂଘାନ୍ସମାଗତାନ୍ ॥ 20 ॥
ହନ୍ୟାଂ ନିଶିତଧାରେଣ ଶରେଣାଶନିଵର୍ଚସା ।
ଭଵାଂସ୍ତତ୍ରାଭିଷଜ୍ୟେତ କିଂସ୍ୟାତ୍କୃଚ୍ଛ୍ରତରଂ ତତଃ ॥ 21 ॥
ଏତସ୍ମିନ୍ନାଶ୍ରମେ ଵାସଂ ଚିରଂ ତୁ ନ ସମର୍ଥୟେ ।
ତମେଵମୁକ୍ତ୍ଵୋପରମଂ ରାମସ୍ସଂଧ୍ୟାମୁପାଗମତ୍ ॥ 22 ॥
ଅନ୍ଵାସ୍ୟ ପଶ୍ଚିମାଂ ସ୍ନଧ୍ୟାଂ ତତ୍ର ଵାସମକଲ୍ପୟତ୍ ।
ସୁତୀକ୍ଷ୍ଣସ୍ୟାଽଶ୍ରମେ ରମ୍ୟେ ସୀତୟା ଲକ୍ଷ୍ମଣେନ ଚ ॥ 23 ॥
ତମେଵମୁକ୍ତ୍ଵୋପରମଂ ରାମସ୍ସଂଧ୍ୟାମୁପାଗମତ୍ ॥ 24 ॥
ଅନ୍ଵାସ୍ୟ ପଶ୍ଚିମାଂ ସଂଂଧ୍ୟାଂ ତତ୍ର ଵାସମକଲ୍ପୟତ୍ ।
ସୁତୀକ୍ଷ୍ଣସ୍ୟାଶ୍ରମେ ରମ୍ୟେ ସୀତୟା ଲକ୍ଷ୍ମଣେନ ଚ ॥ 25 ॥
ତତଶ୍ଶୁଭଂ ତାପସଭୋଜ୍ୟମନ୍ନଂ ସ୍ଵୟଂ ସୁତୀକ୍ଷ୍ଣଃ ପୁରୁଷର୍ଷଭାଭ୍ୟାମ୍ ।
ତାଭ୍ୟାଂ ସୁସତ୍କୃତ୍ୟ ଦଦୌ ମହାତ୍ମା ସଂଧ୍ୟାନିଵୃତ୍ତୌ ରଜନୀଂ ମଵେକ୍ଷ୍ୟ ॥ 26 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ସପ୍ତମସ୍ସର୍ଗଃ ॥
