શ્રીમદ્વાલ્મીકીય રામાયણે અરણ્યકાંડમ્ ।
અથ સપ્તમસ્સર્ગઃ ।
રામસ્તુ સહિતો ભ્રાત્રા સીતયા ચ પરંતપઃ ।
સુતીક્ષ્ણસ્યાશ્રમપદં જગામ સહ તૈર્દ્વિજૈઃ ॥ 1 ॥
સ ગત્વા દીર્ઘમધ્વાનં નદીસ્તીર્ત્વા બહૂદકાઃ ।
દદર્શ વિમલં શૈલં મહામેઘમિવોન્નતમ્ ॥ 2 ॥
તત સ્તદિક્ષ્વાકુવરૌ સંતતં વિવિધૈર્દ્રુમૈઃ ।
કાનનં તૌ વિવિશતુસ્સીતયા સહ રાઘવૌ ॥ 3 ॥
પ્રવિષ્ટસ્તુ વનં ઘોરં બહુપુષ્પફલદ્રુમમ્ ।
દદર્શાશ્રમમેકાંતે ચીરમાલાપરિષ્કૃતમ્ ॥ 4 ॥
તત્ર તાપસમાસીનં મલપંકજટાધરમ્ ।
રામસ્સુતીક્ષ્ણં વિધિવત્તપોવૃદ્ધમભાષત ॥ 5 ॥
રામોઽહમસ્મિ ભગવન્ભવંતં દ્રષ્ટુમાગતઃ ।
ત્વં માભિવદ ધર્મજ્ઞ મહર્ષે સત્યવિક્રમ ॥ 6 ॥
સ નિરીક્ષ્ય તતો ધીરો રામં ધર્મભૃતાં વરમ્ ।
સમાશ્લિષ્ય ચ બાહુભ્યામિદં વચનમબ્રવીત્ ॥ 7 ॥
સ્વાગતં તે રઘુશ્રેષ્ઠ રામ સત્યભૃતાં વર ।
આશ્રમોઽયં ત્વયાક્રાંતસ્સનાથ ઇવ સાંપ્રતમ્ ॥ 8 ॥
પ્રતીક્ષમાણસ્ત્વામેવ નારોહેઽહં મહાયશઃ ।
દેવલોકમિતો વીર દેહં ત્યક્ત્વા મહીતલે ।
ચિત્રકૂટમુપાદાય રાજ્યભ્રષ્ટોઽસિ મે શ્રુતઃ ॥ 9 ॥
ઇહોપયાતઃ કાકુત્થ્સ દેવરાજશ્શતક્રતુઃ ॥ 10 ॥
ઉપાગમ્ય ચ મે દેવો મહાદેવસ્સુરેશ્વરઃ ।
સર્વાન્ લોકાંજિતાનાહ મમ પુણ્યેન કર્મણા ॥ 11 ॥
તેષુ દેવર્ષિજુષ્ટેષુ જિતેષુ તપસા મયા ।
મત્પ્રસાદાત્સભાર્યસ્ત્વં વિહરસ્વ સલક્ષ્મણઃ ॥ 12 ॥
તમુગ્રતપસાયુક્તં મહર્ષિં સત્યવાદિનમ્ ।
પ્રત્યુવાચાત્મવાન્રામો બ્રહ્માણમિવ કાશ્યપઃ ॥ 13 ॥
અહમેવાહરિષ્યામિ સર્વાન્ લોકાન્મહામુને ।
આવાસં ત્વહમિચ્છામિ પ્રદિષ્ટમિહ કાનને ॥ 14 ॥
ભવાન્સર્વત્ર કુશલસ્સર્વભૂતહિતે રતઃ ।
આખ્યાતશ્શરભંગેણ ગૌતમેન મહાત્મના ॥ 15 ॥
એવમુક્તસ્તુ રામેણ મહર્ષિર્લોકવિશ્રુતઃ ।
અબ્રવીન્મધુરં વાક્યં હર્ષેણ મહતાઽપ્લુતઃ ॥ 16 ॥
અયમેવાશ્રમો રામ ગુણવાન્રમ્યતામિહ ।
ઋષિસંઘાનુચરિતસ્સદા મૂલફલૈર્યુતઃ ॥ 17 ॥
ઇમમાશ્રમમાગમ્ય મૃગસંઘા મહાયશઃ ।
અહત્વા પ્રતિગચ્છંતિ લોભયિત્વાઽકુતોભયાઃ ॥ 18 ॥
નાન્યદ્ધોષં ભવેદત્ર મૃગેભ્યોઽન્યત્ર વિદ્ધિ વૈ ।
તચ્છૃત્વા વચનં તસ્ય મહર્ષેર્લક્ષ્મણાગ્રજઃ ॥ 19 ॥
ઉવાચ વચનં ધીરો વિકૃષ્ય સશરં ધનુઃ ।
તાનહં સુમહાભાગ મૃગસંઘાન્સમાગતાન્ ॥ 20 ॥
હન્યાં નિશિતધારેણ શરેણાશનિવર્ચસા ।
ભવાંસ્તત્રાભિષજ્યેત કિંસ્યાત્કૃચ્છ્રતરં તતઃ ॥ 21 ॥
એતસ્મિન્નાશ્રમે વાસં ચિરં તુ ન સમર્થયે ।
તમેવમુક્ત્વોપરમં રામસ્સંધ્યામુપાગમત્ ॥ 22 ॥
અન્વાસ્ય પશ્ચિમાં સ્નધ્યાં તત્ર વાસમકલ્પયત્ ।
સુતીક્ષ્ણસ્યાઽશ્રમે રમ્યે સીતયા લક્ષ્મણેન ચ ॥ 23 ॥
તમેવમુક્ત્વોપરમં રામસ્સંધ્યામુપાગમત્ ॥ 24 ॥
અન્વાસ્ય પશ્ચિમાં સંંધ્યાં તત્ર વાસમકલ્પયત્ ।
સુતીક્ષ્ણસ્યાશ્રમે રમ્યે સીતયા લક્ષ્મણેન ચ ॥ 25 ॥
તતશ્શુભં તાપસભોજ્યમન્નં સ્વયં સુતીક્ષ્ણઃ પુરુષર્ષભાભ્યામ્ ।
તાભ્યાં સુસત્કૃત્ય દદૌ મહાત્મા સંધ્યાનિવૃત્તૌ રજનીં મવેક્ષ્ય ॥ 26 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અરણ્યકાંડે સપ્તમસ્સર્ગઃ ॥
