ശ്രീമദ്വാല്മീകീയ രാമായണേ അരണ്യകാംഡമ് ।
അഥ സപ്തമസ്സര്ഗഃ ।
രാമസ്തു സഹിതോ ഭ്രാത്രാ സീതയാ ച പരംതപഃ ।
സുതീക്ഷ്ണസ്യാശ്രമപദം ജഗാമ സഹ തൈര്ദ്വിജൈഃ ॥ 1 ॥
സ ഗത്വാ ദീര്ഘമധ്വാനം നദീസ്തീര്ത്വാ ബഹൂദകാഃ ।
ദദര്ശ വിമലം ശൈലം മഹാമേഘമിവോന്നതമ് ॥ 2 ॥
തത സ്തദിക്ഷ്വാകുവരൌ സംതതം വിവിധൈര്ദ്രുമൈഃ ।
കാനനം തൌ വിവിശതുസ്സീതയാ സഹ രാഘവൌ ॥ 3 ॥
പ്രവിഷ്ടസ്തു വനം ഘോരം ബഹുപുഷ്പഫലദ്രുമമ് ।
ദദര്ശാശ്രമമേകാംതേ ചീരമാലാപരിഷ്കൃതമ് ॥ 4 ॥
തത്ര താപസമാസീനം മലപംകജടാധരമ് ।
രാമസ്സുതീക്ഷ്ണം വിധിവത്തപോവൃദ്ധമഭാഷത ॥ 5 ॥
രാമോഽഹമസ്മി ഭഗവന്ഭവംതം ദ്രഷ്ടുമാഗതഃ ।
ത്വം മാഭിവദ ധര്മജ്ഞ മഹര്ഷേ സത്യവിക്രമ ॥ 6 ॥
സ നിരീക്ഷ്യ തതോ ധീരോ രാമം ധര്മഭൃതാം വരമ് ।
സമാശ്ലിഷ്യ ച ബാഹുഭ്യാമിദം വചനമബ്രവീത് ॥ 7 ॥
സ്വാഗതം തേ രഘുശ്രേഷ്ഠ രാമ സത്യഭൃതാം വര ।
ആശ്രമോഽയം ത്വയാക്രാംതസ്സനാഥ ഇവ സാംപ്രതമ് ॥ 8 ॥
പ്രതീക്ഷമാണസ്ത്വാമേവ നാരോഹേഽഹം മഹായശഃ ।
ദേവലോകമിതോ വീര ദേഹം ത്യക്ത്വാ മഹീതലേ ।
ചിത്രകൂടമുപാദായ രാജ്യഭ്രഷ്ടോഽസി മേ ശ്രുതഃ ॥ 9 ॥
ഇഹോപയാതഃ കാകുത്ഥ്സ ദേവരാജശ്ശതക്രതുഃ ॥ 10 ॥
ഉപാഗമ്യ ച മേ ദേവോ മഹാദേവസ്സുരേശ്വരഃ ।
സർവാന് ലോകാംജിതാനാഹ മമ പുണ്യേന കര്മണാ ॥ 11 ॥
തേഷു ദേവര്ഷിജുഷ്ടേഷു ജിതേഷു തപസാ മയാ ।
മത്പ്രസാദാത്സഭാര്യസ്ത്വം വിഹരസ്വ സലക്ഷ്മണഃ ॥ 12 ॥
തമുഗ്രതപസായുക്തം മഹര്ഷിം സത്യവാദിനമ് ।
പ്രത്യുവാചാത്മവാന്രാമോ ബ്രഹ്മാണമിവ കാശ്യപഃ ॥ 13 ॥
അഹമേവാഹരിഷ്യാമി സർവാന് ലോകാന്മഹാമുനേ ।
ആവാസം ത്വഹമിച്ഛാമി പ്രദിഷ്ടമിഹ കാനനേ ॥ 14 ॥
ഭവാന്സർവത്ര കുശലസ്സർവഭൂതഹിതേ രതഃ ।
ആഖ്യാതശ്ശരഭംഗേണ ഗൌതമേന മഹാത്മനാ ॥ 15 ॥
ഏവമുക്തസ്തു രാമേണ മഹര്ഷിര്ലോകവിശ്രുതഃ ।
അബ്രവീന്മധുരം വാക്യം ഹര്ഷേണ മഹതാഽപ്ലുതഃ ॥ 16 ॥
അയമേവാശ്രമോ രാമ ഗുണവാന്രമ്യതാമിഹ ।
ഋഷിസംഘാനുചരിതസ്സദാ മൂലഫലൈര്യുതഃ ॥ 17 ॥
ഇമമാശ്രമമാഗമ്യ മൃഗസംഘാ മഹായശഃ ।
അഹത്വാ പ്രതിഗച്ഛംതി ലോഭയിത്വാഽകുതോഭയാഃ ॥ 18 ॥
നാന്യദ്ധോഷം ഭവേദത്ര മൃഗേഭ്യോഽന്യത്ര വിദ്ധി വൈ ।
തച്ഛൃത്വാ വചനം തസ്യ മഹര്ഷേര്ലക്ഷ്മണാഗ്രജഃ ॥ 19 ॥
ഉവാച വചനം ധീരോ വികൃഷ്യ സശരം ധനുഃ ।
താനഹം സുമഹാഭാഗ മൃഗസംഘാന്സമാഗതാന് ॥ 20 ॥
ഹന്യാം നിശിതധാരേണ ശരേണാശനിവര്ചസാ ।
ഭവാംസ്തത്രാഭിഷജ്യേത കിംസ്യാത്കൃച്ഛ്രതരം തതഃ ॥ 21 ॥
ഏതസ്മിന്നാശ്രമേ വാസം ചിരം തു ന സമര്ഥയേ ।
തമേവമുക്ത്വോപരമം രാമസ്സംധ്യാമുപാഗമത് ॥ 22 ॥
അന്വാസ്യ പശ്ചിമാം സ്നധ്യാം തത്ര വാസമകല്പയത് ।
സുതീക്ഷ്ണസ്യാഽശ്രമേ രമ്യേ സീതയാ ലക്ഷ്മണേന ച ॥ 23 ॥
തമേവമുക്ത്വോപരമം രാമസ്സംധ്യാമുപാഗമത് ॥ 24 ॥
അന്വാസ്യ പശ്ചിമാം സംംധ്യാം തത്ര വാസമകല്പയത് ।
സുതീക്ഷ്ണസ്യാശ്രമേ രമ്യേ സീതയാ ലക്ഷ്മണേന ച ॥ 25 ॥
തതശ്ശുഭം താപസഭോജ്യമന്നം സ്വയം സുതീക്ഷ്ണഃ പുരുഷര്ഷഭാഭ്യാമ് ।
താഭ്യാം സുസത്കൃത്യ ദദൌ മഹാത്മാ സംധ്യാനിവൃത്തൌ രജനീം മവേക്ഷ്യ ॥ 26 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ സപ്തമസ്സര്ഗഃ ॥
