ஶ்ரீமத்³வால்மீகீய ராமாயணே கிஷ்கிந்தா⁴காண்ட³ம் ।
அத² ஷட்பஞ்சாஶஸ்ஸர்க:³ ।
உபவிஷ்டாஸ்து தே ஸர்வே யஸ்மின்ப்ராயம் கி³ரிஸ்த²லே ।
ஹரயோ க்³ருத்⁴ரராஜஶ்ச தம் தே³ஶமுபசக்ரமே ॥ 1 ॥
ஸம்பாதிர்னாம நாம்னா து சிரஞ்ஜீவீ விஹங்க³ம: ।
ப்⁴ராதா ஜடாயுஷ: ஶ்ரீமான்விக்²யாதப³லபௌருஷ: ॥ 2 ॥
கந்த³ராத³பி⁴னிஷ்க்ரம்ய ஸ விந்த்⁴யஸ்ய மஹாகி³ரே: ।
உபவிஷ்டான்ஹரீந்த்³ருஷ்ட்வா ஹ்ருஷ்டாத்மா கி³ரமப்³ரவீத் ॥ 3 ॥
விதி⁴: கில நரம் லோகே விதா⁴னேனானுவர்ததே ।
யதா²யம் விஹிதோ ப⁴க்ஷ்யஶ்சிரான்மஹ்யமுபாக³த: ॥ 4 ॥
பரம்பராணாம் ப⁴க்ஷிஷ்யே வானராணாம் ம்ருதம் ம்ருதம் ।
உவாசேத³ம் வச: பக்ஷீ தான்னிரீக்ஷ்ய ப்லவங்க³மான் ॥ 5 ॥
தஸ்ய தத்³வசனம் ஶ்ருத்வா ப⁴க்ஷ்யலுப்³த⁴ஸ்ய பக்ஷிண: ।
அங்க³த:³ பரமாயஸ்தோ ஹனூமந்தமதா²ப்³ரவீத் ॥ 6 ॥
பஶ்ய ஸீதாபதே³ஶேன ஸாக்ஷாத்³வைவஸ்வதோ யம: ।
இமம் தே³ஶமனுப்ராப்தோ வானராணாம் விபத்தயே ॥ 7 ॥
ராமஸ்ய ந க்ருதம் கார்யம் ராஜ்ஞோ ந ச வச: க்ருதம் ।
ஹரீணாமியமஜ்ஞாதா விபத்திஸ்ஸஹஸாக³தா ॥ 8 ॥
வைதே³ஹ்யா: ப்ரியகாமேன க்ருதம் கர்ம ஜடாயுஷா ।
க்³ருத்⁴ராராஜேன யத்தத்ர ஶ்ருதம் வஸ்தத³ஶேஷத: ॥ 9 ॥
ததா² ஸர்வாணி பூ⁴தானி திர்யக்³யோனிக³தான்யபி ।
ப்ரியம் குர்வந்தி ராமஸ்ய த்யக்த்வா ப்ராணான்யதா² வயம் ॥ 1௦ ॥
அன்யோன்யமுபகுர்வந்தி ஸ்னேஹகாருண்யயந்த்ரிதா: ।
தேன தஸ்யோபகாரார்த²ம் த்யஜதாத்மானமாத்மனா ॥ 11 ॥
ப்ரியம் க்ருதம் ஹி ராமஸ்ய த⁴ர்மஜ்ஞேன ஜடாயுஷா ।
ராக⁴வார்தே² பரிஶ்ராந்தா வயம் ஸந்த்யக்தஜீவிதா: ॥ 12 ॥
காந்தாராணி ப்ரபன்னா: ஸ்ம ந ச பஶ்யாம மைதி²லீம் ।
ஸ ஸுகீ² க்³ருத்⁴ரராஜஸ்து ராவணேன ஹதோ ரணே ॥ 13 ॥
முக்தஶ்ச ஸுக்³ரீவப⁴யாத்³க³தஶ்ச பரமாம் க³திம் ।
ஜடாயுஷோ வினாஶேன ராஜ்ஞோ த³ஶரத²ஸ்ய ச ॥ 14 ॥
ஹரணேன ச வைதே³ஹ்யா ஸ்ஸம்ஶயம் ஹரயோ க³தா: ।
ராமலக்ஷ்மணயோர்வாஸஶ்ச அரண்யே ஸஹ ஸீதயா ॥ 15 ॥
ராக⁴வஸ்ய ச பா³ணேன வாலினஶ்ச ததா² வத:⁴ ।
ராமகோபாத³ஶேஷாணாம் ரக்ஷஸானாம் ததா² வத:⁴ ॥ 16 ॥
கைகேய்யா வரதா³னேன இத³ம் ச விக்ருதம் க்ருதம் ।
தத³ஸுக²மனுகீர்திதம் வசோ பு⁴வி பதிதாம்ஶ்ச ஸமீக்ஷ்ய வானரான் ।
ப்⁴ருஶசலிதமதிர்மஹாமதி: க்ருபணமுதா³ஹ்ருதவான் ஸ க்³ருத்⁴ரராட் ॥ 17 ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே கிஷ்கிந்தா⁴காண்டே³ ஷட்பஞ்சாஶஸ்ஸர்க:³ ॥
