શ્રીમદ્વાલ્મીકીય રામાયણે કિષ્કિંધાકાંડમ્ ।
અથ ષટ્પંચાશસ્સર્ગઃ ।
ઉપવિષ્ટાસ્તુ તે સર્વે યસ્મિન્પ્રાયં ગિરિસ્થલે ।
હરયો ગૃધ્રરાજશ્ચ તં દેશમુપચક્રમે ॥ 1 ॥
સંપાતિર્નામ નામ્ના તુ ચિરંજીવી વિહંગમઃ ।
ભ્રાતા જટાયુષઃ શ્રીમાન્વિખ્યાતબલપૌરુષઃ ॥ 2 ॥
કંદરાદભિનિષ્ક્રમ્ય સ વિંધ્યસ્ય મહાગિરેઃ ।
ઉપવિષ્ટાન્હરીંદૃષ્ટ્વા હૃષ્ટાત્મા ગિરમબ્રવીત્ ॥ 3 ॥
વિધિઃ કિલ નરં લોકે વિધાનેનાનુવર્તતે ।
યથાઽયં વિહિતો ભક્ષ્યશ્ચિરાન્મહ્યમુપાગતઃ ॥ 4 ॥
પરંપરાણાં ભક્ષિષ્યે વાનરાણાં મૃતં મૃતમ્ ।
ઉવાચેદં વચઃ પક્ષી તાન્નિરીક્ષ્ય પ્લવંગમાન્ ॥ 5 ॥
તસ્ય તદ્વચનં શ્રુત્વા ભક્ષ્યલુબ્ધસ્ય પક્ષિણઃ ।
અંગદઃ પરમાયસ્તો હનૂમંતમથાબ્રવીત્ ॥ 6 ॥
પશ્ય સીતાપદેશેન સાક્ષાદ્વૈવસ્વતો યમઃ ।
ઇમં દેશમનુપ્રાપ્તો વાનરાણાં વિપત્તયે ॥ 7 ॥
રામસ્ય ન કૃતં કાર્યં રાજ્ઞો ન ચ વચઃ કૃતમ્ ।
હરીણામિયમજ્ઞાતા વિપત્તિસ્સહસાગતા ॥ 8 ॥
વૈદેહ્યાઃ પ્રિયકામેન કૃતં કર્મ જટાયુષા ।
ગૃધ્રારાજેન યત્તત્ર શ્રુતં વસ્તદશેષતઃ ॥ 9 ॥
તથા સર્વાણિ ભૂતાનિ તિર્યગ્યોનિગતાન્યપિ ।
પ્રિયં કુર્વંતિ રામસ્ય ત્યક્ત્વા પ્રાણાન્યથા વયમ્ ॥ 10 ॥
અન્યોઽન્યમુપકુર્વંતિ સ્નેહકારુણ્યયંત્રિતાઃ ।
તેન તસ્યોપકારાર્થં ત્યજતાઽત્માનમાત્મના ॥ 11 ॥
પ્રિયં કૃતં હિ રામસ્ય ધર્મજ્ઞેન જટાયુષા ।
રાઘવાર્થે પરિશ્રાંતા વયં સંત્યક્તજીવિતાઃ ॥ 12 ॥
કાંતારાણિ પ્રપન્નાઃ સ્મ ન ચ પશ્યામ મૈથિલીમ્ ।
સ સુખી ગૃધ્રરાજસ્તુ રાવણેન હતો રણે ॥ 13 ॥
મુક્તશ્ચ સુગ્રીવભયાદ્ગતશ્ચ પરમાં ગતિમ્ ।
જટાયુષો વિનાશેન રાજ્ઞો દશરથસ્ય ચ ॥ 14 ॥
હરણેન ચ વૈદેહ્યા સ્સંશયં હરયો ગતાઃ ।
રામલક્ષ્મણયોર્વાસશ્ચ અરણ્યે સહ સીતયા ॥ 15 ॥
રાઘવસ્ય ચ બાણેન વાલિનશ્ચ તથા વધઃ ।
રામકોપાદશેષાણાં રક્ષસાનાં તથા વધઃ ॥ 16 ॥
કૈકેય્યા વરદાનેન ઇદં ચ વિકૃતં કૃતમ્ ।
તદસુખમનુકીર્તિતં વચો ભુવિ પતિતાંશ્ચ સમીક્ષ્ય વાનરાન્ ।
ભૃશચલિતમતિર્મહામતિઃ કૃપણમુદાહૃતવાન્ સ ગૃધ્રરાટ્ ॥ 17 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે ષટ્પંચાશસ્સર્ગઃ ॥
