śrīmadvālmīkīya rāmāyaṇē kiṣkindhākāṇḍam ।
atha ṣaṭpañchāśassargaḥ ।
upaviṣṭāstu tē sarvē yasminprāyaṃ giristhalē ।
harayō gṛdhrarājaścha taṃ dēśamupachakramē ॥ 1 ॥
sampātirnāma nāmnā tu chirañjīvī vihaṅgamaḥ ।
bhrātā jaṭāyuṣaḥ śrīmānvikhyātabalapauruṣaḥ ॥ 2 ॥
kandarādabhiniṣkramya sa vindhyasya mahāgirēḥ ।
upaviṣṭānharīndṛṣṭvā hṛṣṭātmā giramabravīt ॥ 3 ॥
vidhiḥ kila naraṃ lōkē vidhānēnānuvartatē ।
yathā'yaṃ vihitō bhakṣyaśchirānmahyamupāgataḥ ॥ 4 ॥
paramparāṇāṃ bhakṣiṣyē vānarāṇāṃ mṛtaṃ mṛtam ।
uvāchēdaṃ vachaḥ pakṣī tānnirīkṣya plavaṅgamān ॥ 5 ॥
tasya tadvachanaṃ śrutvā bhakṣyalubdhasya pakṣiṇaḥ ।
aṅgadaḥ paramāyastō hanūmantamathābravīt ॥ 6 ॥
paśya sītāpadēśēna sākṣādvaivasvatō yamaḥ ।
imaṃ dēśamanuprāptō vānarāṇāṃ vipattayē ॥ 7 ॥
rāmasya na kṛtaṃ kāryaṃ rājñō na cha vachaḥ kṛtam ।
harīṇāmiyamajñātā vipattissahasāgatā ॥ 8 ॥
vaidēhyāḥ priyakāmēna kṛtaṃ karma jaṭāyuṣā ।
gṛdhrārājēna yattatra śrutaṃ vastadaśēṣataḥ ॥ 9 ॥
tathā sarvāṇi bhūtāni tiryagyōnigatānyapi ।
priyaṃ kurvanti rāmasya tyaktvā prāṇānyathā vayam ॥ 10 ॥
anyō'nyamupakurvanti snēhakāruṇyayantritāḥ ।
tēna tasyōpakārārthaṃ tyajatā'tmānamātmanā ॥ 11 ॥
priyaṃ kṛtaṃ hi rāmasya dharmajñēna jaṭāyuṣā ।
rāghavārthē pariśrāntā vayaṃ santyaktajīvitāḥ ॥ 12 ॥
kāntārāṇi prapannāḥ sma na cha paśyāma maithilīm ।
sa sukhī gṛdhrarājastu rāvaṇēna hatō raṇē ॥ 13 ॥
muktaścha sugrīvabhayādgataścha paramāṃ gatim ।
jaṭāyuṣō vināśēna rājñō daśarathasya cha ॥ 14 ॥
haraṇēna cha vaidēhyā ssaṃśayaṃ harayō gatāḥ ।
rāmalakṣmaṇayōrvāsaścha araṇyē saha sītayā ॥ 15 ॥
rāghavasya cha bāṇēna vālinaścha tathā vadhaḥ ।
rāmakōpādaśēṣāṇāṃ rakṣasānāṃ tathā vadhaḥ ॥ 16 ॥
kaikēyyā varadānēna idaṃ cha vikṛtaṃ kṛtam ।
tadasukhamanukīrtitaṃ vachō bhuvi patitāṃścha samīkṣya vānarān ।
bhṛśachalitamatirmahāmatiḥ kṛpaṇamudāhṛtavān sa gṛdhrarāṭ ॥ 17 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē ṣaṭpañchāśassargaḥ ॥
