ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ପଂଚାଶସ୍ସର୍ଗଃ ।
ତମୁଦ୍ଵୀକ୍ଷ୍ୟ ମହାବାହୁଃ ପିଂଗାକ୍ଷଂ ପୁରତ ସ୍ଥିତମ୍ ।
କୋପେନ ମହତାଽଵିଷ୍ଟୋ ରାଵଣୋ ଲୋକରାଵଣଃ ॥ 1 ॥
ଶଂକାହୃତାତ୍ମା ଦଧ୍ୟୌ ସ କପୀଂଦ୍ରଂ ତେଜସାଵୃତମ୍ ।
କିମେଷ ଭଗଵାନ୍ନଂଦୀ ଭଵେତ୍ସାକ୍ଷାଦିହାଗତଃ ॥ 2 ॥
ୟେନ ଶପ୍ତୋଽସ୍ମି କୈଲାସେ ମୟା ସଂଚାଲିତେ ପୁରା ।
ସୋଽୟଂ ଵାନରମୂର୍ତିସ୍ସ୍ୟାତ୍କିଂସ୍ଵିଦ୍ବାଣୋ ମହାଽସୁରଃ ॥ 3 ॥
ସ ରାଜା ରୋଷତାମ୍ରାକ୍ଷଃ ପ୍ରହସ୍ତଂ ମଂତ୍ରିସତ୍ତମମ୍ ।
କାଲୟୁକ୍ତମୁଵାଚେଦଂ ଵଚୋଽଵିପୁଲମର୍ଥଵତ୍ ॥ 4 ॥
ଦୁରାତ୍ମା ପୃଚ୍ଛ୍ୟତାମେଷ କୁତଃ କିଂ ଵାତ୍ର କାରଣମ୍ ।
ଵନଭଂଗେ ଚ କୋଽସ୍ୟାର୍ଥୋ ରାକ୍ଷସୀନାଂ ଚ ତର୍ଜନେ ॥ 5 ॥
ମତ୍ପୁରୀମପ୍ରଧୃଷ୍ୟାଂ ଵାଽଗମନେ କିଂ ପ୍ରୟୋଜନମ୍ ।
ଆୟୋଧନେ ଵା କିଂ କାର୍ୟଂ ପୃଚ୍ଛୟତାମେଷ ଦୁର୍ମତିଃ ॥ 6 ॥
ରାଵଣସ୍ୟ ଵଚଶ୍ଶ୍ରୁତ୍ଵା ପ୍ରହସ୍ତୋ ଵାକ୍ୟମବ୍ରଵୀତ୍ ।
ସମାଶ୍ଵସିହି ଭଦ୍ରଂ ତେ ନ ଭୀଃ କାର୍ୟା ତ୍ଵୟା କପେ ॥ 7 ॥
ୟଦି ତାଵତ୍ତ୍ଵମିଂଦ୍ରେଣ ପ୍ରେଷିତୋ ରାଵଣାଲୟମ୍ ।
ତତ୍ତ୍ଵମାଖ୍ୟାହି ମା ଭୂତ୍ତେ ଭୟଂ ଵାନର ମୋକ୍ଷ୍ୟସେ ॥ 8 ॥
ୟଦି ଵୈଶ୍ରଵଣସ୍ୟ ତ୍ଵଂ ୟମସ୍ୟ ଵରୁଣସ୍ୟ ଚ ।
ଚାରରୂପମିଦଂ କୃତ୍ଵା ପ୍ରଵିଷ୍ଟୋ ନଃ ପୁରୀମିମାମ୍ ॥ 9 ॥
ଵିଷ୍ଣୁନା ପ୍ରେଷିତୋ ଵାଽପି ଦୂତୋ ଵିଜୟକାଂକ୍ଷିଣା ।
ନ ହି ତେ ଵାନରଂ ତେଜୋ ରୂପମାତ୍ରଂ ତୁ ଵାନରମ୍ ॥ 10 ॥
ତତ୍ତ୍ଵତଃ କଥୟସ୍ଵାଦ୍ୟ ତତୋ ଵାନର ମୋକ୍ଷ୍ୟସେ ।
ଅନୃତଂ ଵଦତଶ୍ଚାପି ଦୁର୍ଲଭଂ ତଵ ଜୀଵିତମ୍ ॥ 11 ॥
ଅଥଵା ୟନ୍ନିମିତ୍ତସ୍ତେ ପ୍ରଵେଶୋ ରାଵଣାଲୟେ ।
ଏଵମୁକ୍ତୋ ହରିଶ୍ରେଷ୍ଠସ୍ତଦା ରକ୍ଷୋଗଣେଶ୍ଵରମ୍ ॥ 12 ॥
ଅବ୍ରଵୀନ୍ନାସ୍ମି ଶକ୍ରସ୍ୟ ୟମସ୍ୟ ଵରୁଣସ୍ୟ ଵା ।
ଧନଦେନ ନ ମେ ସଖ୍ୟଂ ଵିଷ୍ଣୁନା ନାସ୍ମି ଚୋଦିତଃ ॥ 13 ॥
ଜାତିରେଵ ମମ ତ୍ଵେଷା ଵାନରୋଽହମିହାଗତଃ ।
ଦର୍ଶନେ ରାକ୍ଷସେଂଦ୍ରସ୍ୟ ଦୁର୍ଲଭେ ତଦିଦଂ ମୟା ॥ 14 ॥
ଵନଂ ରାକ୍ଷସରାଜସ୍ୟ ଦର୍ଶନାର୍ଥେ ଵିନାଶିତମ୍ ।
ତତସ୍ତେ ରାକ୍ଷସାଃ ପ୍ରାପ୍ତା ବଲିନୋ ୟୁଦ୍ଧକାଂକ୍ଷିଣଃ ।
ରକ୍ଷଣାର୍ଥଂ ତୁ ଦେହସ୍ୟ ପ୍ରତିୟୁଦ୍ଧା ମୟା ରଣେ ॥ 15 ॥
ଅସ୍ତ୍ରପାଶୈର୍ନ ଶକ୍ୟୋଽହଂ ବଦ୍ଧୁଂ ଦେଵାସୁରୈରପି ॥ 16 ॥
ପିତାମହାଦେଷ ଵରୋ ମାମାପ୍ୟେଷୋଽଭ୍ୟୁପାଗତଃ ।
ରାଜାନଂ ଦ୍ରଷ୍ଟୁକାମେନ ମୟାସ୍ତ୍ରମନୁଵର୍ତିତମ୍ ॥ 17 ॥
ଵିମୁକ୍ତୋ ହ୍ୟହମସ୍ତ୍ରେଣ ରାକ୍ଷସୈସ୍ତ୍ଵଭିପୀଡିତଃ ।
କେନଚିଦ୍ରାଜକାର୍ୟେଣ ସଂପ୍ରାପ୍ତୋଽସ୍ମି ତଵାଂତିକମ୍ ॥ 18 ॥
ଦୂତୋଽହମିତି ଵିଜ୍ଞେୟୋ ରାଘଵସ୍ୟାମିତୌଜସଃ ।
ଶ୍ରୂୟତାଂ ଚାପି ଵଚନଂ ମମ ପଥ୍ୟମିଦଂ ପ୍ରଭୋ ॥ 19 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ପଂଚାଶସ୍ସର୍ଗଃ ॥
