śrīmadvālmīkīya rāmāyaṇē sundarakāṇḍam ।
atha pañchāśassargaḥ ।
tamudvīkṣya mahābāhuḥ piṅgākṣaṃ purata sthitam ।
kōpēna mahatā'viṣṭō rāvaṇō lōkarāvaṇaḥ ॥ 1 ॥
śaṅkāhṛtātmā dadhyau sa kapīndraṃ tējasāvṛtam ।
kimēṣa bhagavānnandī bhavētsākṣādihāgataḥ ॥ 2 ॥
yēna śaptō'smi kailāsē mayā sañchālitē purā ।
sō'yaṃ vānaramūrtissyātkiṃsvidbāṇō mahā'suraḥ ॥ 3 ॥
sa rājā rōṣatāmrākṣaḥ prahastaṃ mantrisattamam ।
kālayuktamuvāchēdaṃ vachō'vipulamarthavat ॥ 4 ॥
durātmā pṛchChyatāmēṣa kutaḥ kiṃ vātra kāraṇam ।
vanabhaṅgē cha kō'syārthō rākṣasīnāṃ cha tarjanē ॥ 5 ॥
matpurīmapradhṛṣyāṃ vā'gamanē kiṃ prayōjanam ।
āyōdhanē vā kiṃ kāryaṃ pṛchChayatāmēṣa durmatiḥ ॥ 6 ॥
rāvaṇasya vachaśśrutvā prahastō vākyamabravīt ।
samāśvasihi bhadraṃ tē na bhīḥ kāryā tvayā kapē ॥ 7 ॥
yadi tāvattvamindrēṇa prēṣitō rāvaṇālayam ।
tattvamākhyāhi mā bhūttē bhayaṃ vānara mōkṣyasē ॥ 8 ॥
yadi vaiśravaṇasya tvaṃ yamasya varuṇasya cha ।
chārarūpamidaṃ kṛtvā praviṣṭō naḥ purīmimām ॥ 9 ॥
viṣṇunā prēṣitō vā'pi dūtō vijayakāṅkṣiṇā ।
na hi tē vānaraṃ tējō rūpamātraṃ tu vānaram ॥ 10 ॥
tattvataḥ kathayasvādya tatō vānara mōkṣyasē ।
anṛtaṃ vadataśchāpi durlabhaṃ tava jīvitam ॥ 11 ॥
athavā yannimittastē pravēśō rāvaṇālayē ।
ēvamuktō hariśrēṣṭhastadā rakṣōgaṇēśvaram ॥ 12 ॥
abravīnnāsmi śakrasya yamasya varuṇasya vā ।
dhanadēna na mē sakhyaṃ viṣṇunā nāsmi chōditaḥ ॥ 13 ॥
jātirēva mama tvēṣā vānarō'hamihāgataḥ ।
darśanē rākṣasēndrasya durlabhē tadidaṃ mayā ॥ 14 ॥
vanaṃ rākṣasarājasya darśanārthē vināśitam ।
tatastē rākṣasāḥ prāptā balinō yuddhakāṅkṣiṇaḥ ।
rakṣaṇārthaṃ tu dēhasya pratiyuddhā mayā raṇē ॥ 15 ॥
astrapāśairna śakyō'haṃ baddhuṃ dēvāsurairapi ॥ 16 ॥
pitāmahādēṣa varō māmāpyēṣō'bhyupāgataḥ ।
rājānaṃ draṣṭukāmēna mayāstramanuvartitam ॥ 17 ॥
vimuktō hyahamastrēṇa rākṣasaistvabhipīḍitaḥ ।
kēnachidrājakāryēṇa samprāptō'smi tavāntikam ॥ 18 ॥
dūtō'hamiti vijñēyō rāghavasyāmitaujasaḥ ।
śrūyatāṃ chāpi vachanaṃ mama pathyamidaṃ prabhō ॥ 19 ॥
ityārṣē śrīmadrāmāyaṇē vālmīkīya ādikāvyē sundarakāṇḍē pañchāśassargaḥ ॥
