ശ്രീമദ്വാല്മീകീയ രാമായണേ സുംദരകാംഡമ് ।
അഥ പംചാശസ്സര്ഗഃ ।
തമുദ്വീക്ഷ്യ മഹാബാഹുഃ പിംഗാക്ഷം പുരത സ്ഥിതമ് ।
കോപേന മഹതാഽവിഷ്ടോ രാവണോ ലോകരാവണഃ ॥ 1 ॥
ശംകാഹൃതാത്മാ ദധ്യൌ സ കപീംദ്രം തേജസാവൃതമ് ।
കിമേഷ ഭഗവാന്നംദീ ഭവേത്സാക്ഷാദിഹാഗതഃ ॥ 2 ॥
യേന ശപ്തോഽസ്മി കൈലാസേ മയാ സംചാലിതേ പുരാ ।
സോഽയം വാനരമൂര്തിസ്സ്യാത്കിംസ്വിദ്ബാണോ മഹാഽസുരഃ ॥ 3 ॥
സ രാജാ രോഷതാമ്രാക്ഷഃ പ്രഹസ്തം മംത്രിസത്തമമ് ।
കാലയുക്തമുവാചേദം വചോഽവിപുലമര്ഥവത് ॥ 4 ॥
ദുരാത്മാ പൃച്ഛ്യതാമേഷ കുതഃ കിം വാത്ര കാരണമ് ।
വനഭംഗേ ച കോഽസ്യാര്ഥോ രാക്ഷസീനാം ച തര്ജനേ ॥ 5 ॥
മത്പുരീമപ്രധൃഷ്യാം വാഽഗമനേ കിം പ്രയോജനമ് ।
ആയോധനേ വാ കിം കാര്യം പൃച്ഛയതാമേഷ ദുര്മതിഃ ॥ 6 ॥
രാവണസ്യ വചശ്ശ്രുത്വാ പ്രഹസ്തോ വാക്യമബ്രവീത് ।
സമാശ്വസിഹി ഭദ്രം തേ ന ഭീഃ കാര്യാ ത്വയാ കപേ ॥ 7 ॥
യദി താവത്ത്വമിംദ്രേണ പ്രേഷിതോ രാവണാലയമ് ।
തത്ത്വമാഖ്യാഹി മാ ഭൂത്തേ ഭയം വാനര മോക്ഷ്യസേ ॥ 8 ॥
യദി വൈശ്രവണസ്യ ത്വം യമസ്യ വരുണസ്യ ച ।
ചാരരൂപമിദം കൃത്വാ പ്രവിഷ്ടോ നഃ പുരീമിമാമ് ॥ 9 ॥
വിഷ്ണുനാ പ്രേഷിതോ വാഽപി ദൂതോ വിജയകാംക്ഷിണാ ।
ന ഹി തേ വാനരം തേജോ രൂപമാത്രം തു വാനരമ് ॥ 10 ॥
തത്ത്വതഃ കഥയസ്വാദ്യ തതോ വാനര മോക്ഷ്യസേ ।
അനൃതം വദതശ്ചാപി ദുര്ലഭം തവ ജീവിതമ് ॥ 11 ॥
അഥവാ യന്നിമിത്തസ്തേ പ്രവേശോ രാവണാലയേ ।
ഏവമുക്തോ ഹരിശ്രേഷ്ഠസ്തദാ രക്ഷോഗണേശ്വരമ് ॥ 12 ॥
അബ്രവീന്നാസ്മി ശക്രസ്യ യമസ്യ വരുണസ്യ വാ ।
ധനദേന ന മേ സഖ്യം വിഷ്ണുനാ നാസ്മി ചോദിതഃ ॥ 13 ॥
ജാതിരേവ മമ ത്വേഷാ വാനരോഽഹമിഹാഗതഃ ।
ദര്ശനേ രാക്ഷസേംദ്രസ്യ ദുര്ലഭേ തദിദം മയാ ॥ 14 ॥
വനം രാക്ഷസരാജസ്യ ദര്ശനാര്ഥേ വിനാശിതമ് ।
തതസ്തേ രാക്ഷസാഃ പ്രാപ്താ ബലിനോ യുദ്ധകാംക്ഷിണഃ ।
രക്ഷണാര്ഥം തു ദേഹസ്യ പ്രതിയുദ്ധാ മയാ രണേ ॥ 15 ॥
അസ്ത്രപാശൈര്ന ശക്യോഽഹം ബദ്ധും ദേവാസുരൈരപി ॥ 16 ॥
പിതാമഹാദേഷ വരോ മാമാപ്യേഷോഽഭ്യുപാഗതഃ ।
രാജാനം ദ്രഷ്ടുകാമേന മയാസ്ത്രമനുവര്തിതമ് ॥ 17 ॥
വിമുക്തോ ഹ്യഹമസ്ത്രേണ രാക്ഷസൈസ്ത്വഭിപീഡിതഃ ।
കേനചിദ്രാജകാര്യേണ സംപ്രാപ്തോഽസ്മി തവാംതികമ് ॥ 18 ॥
ദൂതോഽഹമിതി വിജ്ഞേയോ രാഘവസ്യാമിതൌജസഃ ।
ശ്രൂയതാം ചാപി വചനം മമ പഥ്യമിദം പ്രഭോ ॥ 19 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ പംചാശസ്സര്ഗഃ ॥
