શ્રીમદ્વાલ્મીકીય રામાયણે સુંદરકાંડમ્ ।
અથ પંચાશસ્સર્ગઃ ।
તમુદ્વીક્ષ્ય મહાબાહુઃ પિંગાક્ષં પુરત સ્થિતમ્ ।
કોપેન મહતાઽવિષ્ટો રાવણો લોકરાવણઃ ॥ 1 ॥
શંકાહૃતાત્મા દધ્યૌ સ કપીંદ્રં તેજસાવૃતમ્ ।
કિમેષ ભગવાન્નંદી ભવેત્સાક્ષાદિહાગતઃ ॥ 2 ॥
યેન શપ્તોઽસ્મિ કૈલાસે મયા સંચાલિતે પુરા ।
સોઽયં વાનરમૂર્તિસ્સ્યાત્કિંસ્વિદ્બાણો મહાઽસુરઃ ॥ 3 ॥
સ રાજા રોષતામ્રાક્ષઃ પ્રહસ્તં મંત્રિસત્તમમ્ ।
કાલયુક્તમુવાચેદં વચોઽવિપુલમર્થવત્ ॥ 4 ॥
દુરાત્મા પૃચ્છ્યતામેષ કુતઃ કિં વાત્ર કારણમ્ ।
વનભંગે ચ કોઽસ્યાર્થો રાક્ષસીનાં ચ તર્જને ॥ 5 ॥
મત્પુરીમપ્રધૃષ્યાં વાઽગમને કિં પ્રયોજનમ્ ।
આયોધને વા કિં કાર્યં પૃચ્છયતામેષ દુર્મતિઃ ॥ 6 ॥
રાવણસ્ય વચશ્શ્રુત્વા પ્રહસ્તો વાક્યમબ્રવીત્ ।
સમાશ્વસિહિ ભદ્રં તે ન ભીઃ કાર્યા ત્વયા કપે ॥ 7 ॥
યદિ તાવત્ત્વમિંદ્રેણ પ્રેષિતો રાવણાલયમ્ ।
તત્ત્વમાખ્યાહિ મા ભૂત્તે ભયં વાનર મોક્ષ્યસે ॥ 8 ॥
યદિ વૈશ્રવણસ્ય ત્વં યમસ્ય વરુણસ્ય ચ ।
ચારરૂપમિદં કૃત્વા પ્રવિષ્ટો નઃ પુરીમિમામ્ ॥ 9 ॥
વિષ્ણુના પ્રેષિતો વાઽપિ દૂતો વિજયકાંક્ષિણા ।
ન હિ તે વાનરં તેજો રૂપમાત્રં તુ વાનરમ્ ॥ 10 ॥
તત્ત્વતઃ કથયસ્વાદ્ય તતો વાનર મોક્ષ્યસે ।
અનૃતં વદતશ્ચાપિ દુર્લભં તવ જીવિતમ્ ॥ 11 ॥
અથવા યન્નિમિત્તસ્તે પ્રવેશો રાવણાલયે ।
એવમુક્તો હરિશ્રેષ્ઠસ્તદા રક્ષોગણેશ્વરમ્ ॥ 12 ॥
અબ્રવીન્નાસ્મિ શક્રસ્ય યમસ્ય વરુણસ્ય વા ।
ધનદેન ન મે સખ્યં વિષ્ણુના નાસ્મિ ચોદિતઃ ॥ 13 ॥
જાતિરેવ મમ ત્વેષા વાનરોઽહમિહાગતઃ ।
દર્શને રાક્ષસેંદ્રસ્ય દુર્લભે તદિદં મયા ॥ 14 ॥
વનં રાક્ષસરાજસ્ય દર્શનાર્થે વિનાશિતમ્ ।
તતસ્તે રાક્ષસાઃ પ્રાપ્તા બલિનો યુદ્ધકાંક્ષિણઃ ।
રક્ષણાર્થં તુ દેહસ્ય પ્રતિયુદ્ધા મયા રણે ॥ 15 ॥
અસ્ત્રપાશૈર્ન શક્યોઽહં બદ્ધું દેવાસુરૈરપિ ॥ 16 ॥
પિતામહાદેષ વરો મામાપ્યેષોઽભ્યુપાગતઃ ।
રાજાનં દ્રષ્ટુકામેન મયાસ્ત્રમનુવર્તિતમ્ ॥ 17 ॥
વિમુક્તો હ્યહમસ્ત્રેણ રાક્ષસૈસ્ત્વભિપીડિતઃ ।
કેનચિદ્રાજકાર્યેણ સંપ્રાપ્તોઽસ્મિ તવાંતિકમ્ ॥ 18 ॥
દૂતોઽહમિતિ વિજ્ઞેયો રાઘવસ્યામિતૌજસઃ ।
શ્રૂયતાં ચાપિ વચનં મમ પથ્યમિદં પ્રભો ॥ 19 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે સુંદરકાંડે પંચાશસ્સર્ગઃ ॥
