ശ്രീമദ്വാല്മീകീയ രാമായണേ സുംദരകാംഡമ് ।
അഥ അഷ്ടഷഷ്ടിതമസ്സര്ഗഃ ।
അഥാഹമുത്തരം ദേവ്യാ പുനരുക്ത സ്സസംഭ്രമമ് ।
തവ സ്നേഹാന്നരവ്യാഘ്ര സൌഹാര്ദാദനുമാന്യ വൈ ॥ 1 ॥
ഏവം ബഹുവിധം വാച്യോ രാമോ ദാശരഥിസ്ത്വയാ ।
യഥാ മാമാപ്നുയാച്ഛീഘ്രം ഹത്വാ രാവണമാഹവേ ॥ 2 ॥
യദി വാ മന്യസേ വീര വസൈകാഹമരിംദമ ।
കസ്മിംശ്ചിത്സംവൃതേ ദേശേ വിക്രാംതശ്ശ്വോ ഗമിഷ്യസി ॥ 3 ॥
മമ ചാപ്യല്പഭാഗ്യായാസ്സാന്നിധ്യാത്തവ വീര്യവന് ।
അസ്യ ശോകവിപാകസ്യ മുഹൂര്തം സ്യാദ്വിമോക്ഷണമ് ॥ 4 ॥
ഗതേ ഹി ത്വയി വിക്രാംതേ പുനരാഗമനായ വൈ ।
പ്രാണാനാമപി സംദേഹോ മമ സ്യാന്നാത്ര സംശയഃ ॥ 5 ॥
തവാദര്ശനജശ്ശോകോ ഭൂയോ മാം പരിതാപയേത് ।
ദുഃഖാദ്ദുഃഖപരാഭൂതാം ദുര്ഗതാം ദുഃഖഭാഗിനീമ് ॥ 6 ॥
അയം ച വീര സംദേഹസ്തിഷ്ഠതീവ മമാഗ്രതഃ ।
സുമഹാംസ്ത്വത്സഹായേഷു ഹര്യൃക്ഷേഷു ഹരീശ്വര ॥ 7 ॥
കഥം നു ഖലു ദുഷ്പാരം തരിഷ്യംതി മഹോദധിമ് ।
താനി ഹര്യൃക്ഷസൈന്യാനി തൌ വാ നരവരാത്മജൌ ॥ 8 ॥
ത്രയാണാമേവ ഭൂതാനാം സാഗരസ്യാസ്യ ലംഘനേ ।
ശക്തിസ്സ്യാദ്വൈനതേയസ്യ തവ വാ മാരുതസ്യ വാ ॥ 9 ॥
തദസ്മിന് കാര്യനിര്യോഗേ വീരൈവം ദുരതിക്രമേ ।
കിം പശ്യസി സമാധാനം ബ്രൂഹി കാര്യവിദാം വരഃ ॥ 10 ॥
കാമമസ്യ ത്വമേവൈകഃ കാര്യസ്യ പരിസാധനേ ।
പര്യാപ്തഃ പരവീരഘ്ന യശസ്യസ്തേ ബലോദയഃ ॥ 11 ॥
ബലൈ സ്സമഗ്രൈര്യദി മാം ഹത്വാ രാവണമാഹവേ ।
വിജയീ സ്വാം പുരീം രാമോ നയേത്തത്സ്യാദ്യശസ്കരമ് ॥ 12 ॥
യഥാഽഹം തസ്യ വീരസ്യ വനാദുപധിനാ ഹൃതാ ।
രക്ഷസാ തദ്ഭയാദേവ തഥാ നാര്ഹതി രാഘവഃ ॥ 13 ॥
ബലൈസ്തു സംകുലാം കൃത്വാ ലംകാം പരബലാര്ദനഃ ।
മാം നയേദ്യദി കാകുത്സ്ഥസ്തത്തസ്യ സദൃശം ഭവേത് ॥ 14 ॥
തദ്യഥാ തസ്യ വിക്രാംതമനുരൂപം മഹാത്മനഃ ।
ഭവേദാഹവശൂരസ്യ തഥാ ത്വമുപപാദയ ॥ 15 ॥
തദര്ഥോപഹിതം വാക്യം പ്രശ്രിതം ഹേതുസംഹിതമ് ।
നിശമ്യാഹം തത ശ്ശേഷം വാക്യമുത്തരമബ്രുവമ് ॥ 16 ॥
ദേവി ഹര്യൃക്ഷസൈന്യാനാമീശ്വരഃ പ്ലവതാം വരഃ ।
സുഗ്രീവസ്സത്ത്വസംപന്നസ്തവാര്ഥേ കൃതനിശ്ചയഃ ॥ 17 ॥
തസ്യ വിക്രമസംപന്നാസ്സത്ത്വവംതോ മഹാബലാഃ ।
മന സ്സംകല്പസംപാതാ നിദേശേ ഹരയഃ സ്ഥിതാഃ ॥ 18 ॥
യേഷാം നോപരി നാധസ്താന്ന തിര്യക്സജ്ജതേ ഗതിഃ ।
ന ച കര്മസു സീദംതി മഹത്സ്വമിതതേജസഃ ॥ 19 ॥
അസകൃത്തൈര്മഹാഭാഗൈർവാനരൈര്ബലദര്പിതൈഃ ।
പ്രദക്ഷിണീകൃതാ ഭൂമിർവായുമാര്ഗാനുസാരിഭിഃ ॥ 20 ॥
മദ്വിശിഷ്ടാശ്ച തുല്യാശ്ച സംതി തത്ര വനൌകസഃ ।
മത്തഃ പ്രത്യവരഃ കശ്ചിന്നാസ്തി സുഗ്രീവസന്നിധൌ ॥ 21 ॥
അഹം താവദിഹ പ്രാപ്തഃ കിം പുനസ്തേ മഹാബലാഃ ।
ന ഹി പ്രകൃഷ്ടാഃ പ്രേത്യംതേ പ്രേഷ്യംതേ ഹീതരേ ജനാഃ ॥ 22 ॥
തദലം പരിതാപേന ദേവി മന്യുർവ്യപൈതു തേ ।
ഏകോത്പാതേന തേ ലംകാമേഷ്യംതി ഹരിയൂഥപാഃ ॥ 23 ॥
മമ പൃഷ്ഠഗതൌ തൌ ച ചംദ്രസൂര്യാവിവോദിതൌ ।
ത്വത്സകാശം മഹാഭാഗേ നൃസിംഹാവാഗമിഷ്യതഃ ॥ 24 ॥
അരിഘ്നം സിംഹസംകാശം ക്ഷിപ്രം ദ്രക്ഷ്യസി രാഘവമ് ।
ലക്ഷ്മണം ച ധനുഷ്പാണിം ലംകാദ്വാരമുപസ്ഥിതമ് ॥ 25 ॥
നഖദംഷ്ട്രായുധാന് വീരാന് സിംഹശാര്ദൂലവിക്രമാന് ।
വാനരാന്വാരണോംദ്രാഭാന് ക്ഷിപ്രം ദ്രക്ഷസി സംഗതാന് ॥ 26 ॥
ശൈലാംബുദനികാശാനാം ലംകാമലയസാനുഷു ।
നര്ദതാം കപിമുഖ്യാനാമചിരാച്ഛ്രോഷ്യസി സ്വനമ് ॥ 27 ॥
നിവൃത്തവനവാസം ച ത്വയാ സാര്ധമരിംദമമ് ।
അഭിഷിക്തമയോധ്യായാം ക്ഷിപ്രം ദ്രക്ഷ്യസി രാഘവമ് ॥ 28 ॥
തതോ മയാ വാഗ്ഭിരദീനഭാഷിണാ ശിവാഭിരിഷ്ടാഭിരഭിപ്രസാദിതാ ।
ജഗാമ ശാംതിം മമ മൈഥിലാത്മജാ തവാപി ശോകേന തദാഭിപീഡിതാ ॥ 29 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ അഷ്ടഷഷ്ടിതമസ്സര്ഗഃ ॥
