ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ଅଷ୍ଟଷଷ୍ଟିତମସ୍ସର୍ଗଃ ।
ଅଥାହମୁତ୍ତରଂ ଦେଵ୍ୟା ପୁନରୁକ୍ତ ସ୍ସସଂଭ୍ରମମ୍ ।
ତଵ ସ୍ନେହାନ୍ନରଵ୍ୟାଘ୍ର ସୌହାର୍ଦାଦନୁମାନ୍ୟ ଵୈ ॥ 1 ॥
ଏଵଂ ବହୁଵିଧଂ ଵାଚ୍ୟୋ ରାମୋ ଦାଶରଥିସ୍ତ୍ଵୟା ।
ୟଥା ମାମାପ୍ନୁୟାଚ୍ଛୀଘ୍ରଂ ହତ୍ଵା ରାଵଣମାହଵେ ॥ 2 ॥
ୟଦି ଵା ମନ୍ୟସେ ଵୀର ଵସୈକାହମରିଂଦମ ।
କସ୍ମିଂଶ୍ଚିତ୍ସଂଵୃତେ ଦେଶେ ଵିକ୍ରାଂତଶ୍ଶ୍ଵୋ ଗମିଷ୍ୟସି ॥ 3 ॥
ମମ ଚାପ୍ୟଲ୍ପଭାଗ୍ୟାୟାସ୍ସାନ୍ନିଧ୍ୟାତ୍ତଵ ଵୀର୍ୟଵନ୍ ।
ଅସ୍ୟ ଶୋକଵିପାକସ୍ୟ ମୁହୂର୍ତଂ ସ୍ୟାଦ୍ଵିମୋକ୍ଷଣମ୍ ॥ 4 ॥
ଗତେ ହି ତ୍ଵୟି ଵିକ୍ରାଂତେ ପୁନରାଗମନାୟ ଵୈ ।
ପ୍ରାଣାନାମପି ସଂଦେହୋ ମମ ସ୍ୟାନ୍ନାତ୍ର ସଂଶୟଃ ॥ 5 ॥
ତଵାଦର୍ଶନଜଶ୍ଶୋକୋ ଭୂୟୋ ମାଂ ପରିତାପୟେତ୍ ।
ଦୁଃଖାଦ୍ଦୁଃଖପରାଭୂତାଂ ଦୁର୍ଗତାଂ ଦୁଃଖଭାଗିନୀମ୍ ॥ 6 ॥
ଅୟଂ ଚ ଵୀର ସଂଦେହସ୍ତିଷ୍ଠତୀଵ ମମାଗ୍ରତଃ ।
ସୁମହାଂସ୍ତ୍ଵତ୍ସହାୟେଷୁ ହର୍ୟୃକ୍ଷେଷୁ ହରୀଶ୍ଵର ॥ 7 ॥
କଥଂ ନୁ ଖଲୁ ଦୁଷ୍ପାରଂ ତରିଷ୍ୟଂତି ମହୋଦଧିମ୍ ।
ତାନି ହର୍ୟୃକ୍ଷସୈନ୍ୟାନି ତୌ ଵା ନରଵରାତ୍ମଜୌ ॥ 8 ॥
ତ୍ରୟାଣାମେଵ ଭୂତାନାଂ ସାଗରସ୍ୟାସ୍ୟ ଲଂଘନେ ।
ଶକ୍ତିସ୍ସ୍ୟାଦ୍ଵୈନତେୟସ୍ୟ ତଵ ଵା ମାରୁତସ୍ୟ ଵା ॥ 9 ॥
ତଦସ୍ମିନ୍ କାର୍ୟନିର୍ୟୋଗେ ଵୀରୈଵଂ ଦୁରତିକ୍ରମେ ।
କିଂ ପଶ୍ୟସି ସମାଧାନଂ ବ୍ରୂହି କାର୍ୟଵିଦାଂ ଵରଃ ॥ 10 ॥
କାମମସ୍ୟ ତ୍ଵମେଵୈକଃ କାର୍ୟସ୍ୟ ପରିସାଧନେ ।
ପର୍ୟାପ୍ତଃ ପରଵୀରଘ୍ନ ୟଶସ୍ୟସ୍ତେ ବଲୋଦୟଃ ॥ 11 ॥
ବଲୈ ସ୍ସମଗ୍ରୈର୍ୟଦି ମାଂ ହତ୍ଵା ରାଵଣମାହଵେ ।
ଵିଜୟୀ ସ୍ଵାଂ ପୁରୀଂ ରାମୋ ନୟେତ୍ତତ୍ସ୍ୟାଦ୍ୟଶସ୍କରମ୍ ॥ 12 ॥
ୟଥାଽହଂ ତସ୍ୟ ଵୀରସ୍ୟ ଵନାଦୁପଧିନା ହୃତା ।
ରକ୍ଷସା ତଦ୍ଭୟାଦେଵ ତଥା ନାର୍ହତି ରାଘଵଃ ॥ 13 ॥
ବଲୈସ୍ତୁ ସଂକୁଲାଂ କୃତ୍ଵା ଲଂକାଂ ପରବଲାର୍ଦନଃ ।
ମାଂ ନୟେଦ୍ୟଦି କାକୁତ୍ସ୍ଥସ୍ତତ୍ତସ୍ୟ ସଦୃଶଂ ଭଵେତ୍ ॥ 14 ॥
ତଦ୍ୟଥା ତସ୍ୟ ଵିକ୍ରାଂତମନୁରୂପଂ ମହାତ୍ମନଃ ।
ଭଵେଦାହଵଶୂରସ୍ୟ ତଥା ତ୍ଵମୁପପାଦୟ ॥ 15 ॥
ତଦର୍ଥୋପହିତଂ ଵାକ୍ୟଂ ପ୍ରଶ୍ରିତଂ ହେତୁସଂହିତମ୍ ।
ନିଶମ୍ୟାହଂ ତତ ଶ୍ଶେଷଂ ଵାକ୍ୟମୁତ୍ତରମବ୍ରୁଵମ୍ ॥ 16 ॥
ଦେଵି ହର୍ୟୃକ୍ଷସୈନ୍ୟାନାମୀଶ୍ଵରଃ ପ୍ଲଵତାଂ ଵରଃ ।
ସୁଗ୍ରୀଵସ୍ସତ୍ତ୍ଵସଂପନ୍ନସ୍ତଵାର୍ଥେ କୃତନିଶ୍ଚୟଃ ॥ 17 ॥
ତସ୍ୟ ଵିକ୍ରମସଂପନ୍ନାସ୍ସତ୍ତ୍ଵଵଂତୋ ମହାବଲାଃ ।
ମନ ସ୍ସଂକଲ୍ପସଂପାତା ନିଦେଶେ ହରୟଃ ସ୍ଥିତାଃ ॥ 18 ॥
ୟେଷାଂ ନୋପରି ନାଧସ୍ତାନ୍ନ ତିର୍ୟକ୍ସଜ୍ଜତେ ଗତିଃ ।
ନ ଚ କର୍ମସୁ ସୀଦଂତି ମହତ୍ସ୍ଵମିତତେଜସଃ ॥ 19 ॥
ଅସକୃତ୍ତୈର୍ମହାଭାଗୈର୍ଵାନରୈର୍ବଲଦର୍ପିତୈଃ ।
ପ୍ରଦକ୍ଷିଣୀକୃତା ଭୂମିର୍ଵାୟୁମାର୍ଗାନୁସାରିଭିଃ ॥ 20 ॥
ମଦ୍ଵିଶିଷ୍ଟାଶ୍ଚ ତୁଲ୍ୟାଶ୍ଚ ସଂତି ତତ୍ର ଵନୌକସଃ ।
ମତ୍ତଃ ପ୍ରତ୍ୟଵରଃ କଶ୍ଚିନ୍ନାସ୍ତି ସୁଗ୍ରୀଵସନ୍ନିଧୌ ॥ 21 ॥
ଅହଂ ତାଵଦିହ ପ୍ରାପ୍ତଃ କିଂ ପୁନସ୍ତେ ମହାବଲାଃ ।
ନ ହି ପ୍ରକୃଷ୍ଟାଃ ପ୍ରେତ୍ୟଂତେ ପ୍ରେଷ୍ୟଂତେ ହୀତରେ ଜନାଃ ॥ 22 ॥
ତଦଲଂ ପରିତାପେନ ଦେଵି ମନ୍ୟୁର୍ଵ୍ୟପୈତୁ ତେ ।
ଏକୋତ୍ପାତେନ ତେ ଲଂକାମେଷ୍ୟଂତି ହରିୟୂଥପାଃ ॥ 23 ॥
ମମ ପୃଷ୍ଠଗତୌ ତୌ ଚ ଚଂଦ୍ରସୂର୍ୟାଵିଵୋଦିତୌ ।
ତ୍ଵତ୍ସକାଶଂ ମହାଭାଗେ ନୃସିଂହାଵାଗମିଷ୍ୟତଃ ॥ 24 ॥
ଅରିଘ୍ନଂ ସିଂହସଂକାଶଂ କ୍ଷିପ୍ରଂ ଦ୍ରକ୍ଷ୍ୟସି ରାଘଵମ୍ ।
ଲକ୍ଷ୍ମଣଂ ଚ ଧନୁଷ୍ପାଣିଂ ଲଂକାଦ୍ଵାରମୁପସ୍ଥିତମ୍ ॥ 25 ॥
ନଖଦଂଷ୍ଟ୍ରାୟୁଧାନ୍ ଵୀରାନ୍ ସିଂହଶାର୍ଦୂଲଵିକ୍ରମାନ୍ ।
ଵାନରାନ୍ଵାରଣୋଂଦ୍ରାଭାନ୍ କ୍ଷିପ୍ରଂ ଦ୍ରକ୍ଷସି ସଂଗତାନ୍ ॥ 26 ॥
ଶୈଲାଂବୁଦନିକାଶାନାଂ ଲଂକାମଲୟସାନୁଷୁ ।
ନର୍ଦତାଂ କପିମୁଖ୍ୟାନାମଚିରାଚ୍ଛ୍ରୋଷ୍ୟସି ସ୍ଵନମ୍ ॥ 27 ॥
ନିଵୃତ୍ତଵନଵାସଂ ଚ ତ୍ଵୟା ସାର୍ଧମରିଂଦମମ୍ ।
ଅଭିଷିକ୍ତମୟୋଧ୍ୟାୟାଂ କ୍ଷିପ୍ରଂ ଦ୍ରକ୍ଷ୍ୟସି ରାଘଵମ୍ ॥ 28 ॥
ତତୋ ମୟା ଵାଗ୍ଭିରଦୀନଭାଷିଣା ଶିଵାଭିରିଷ୍ଟାଭିରଭିପ୍ରସାଦିତା ।
ଜଗାମ ଶାଂତିଂ ମମ ମୈଥିଲାତ୍ମଜା ତଵାପି ଶୋକେନ ତଦାଭିପୀଡିତା ॥ 29 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ଅଷ୍ଟଷଷ୍ଟିତମସ୍ସର୍ଗଃ ॥
