ශ්රීමද්වාල්මීකීය රාමායණේ සුංදරකාංඩම් ।
අථ අෂ්ටෂෂ්ටිතමස්සර්ගඃ ।
අථාහමුත්තරං දේව්යා පුනරුක්ත ස්සසංභ්රමම් ।
තව ස්නේහාන්නරව්යාඝ්ර සෞහාර්දාදනුමාන්ය වෛ ॥ 1 ॥
ඒවං බහුවිධං වාච්යෝ රාමෝ දාශරථිස්ත්වයා ।
යථා මාමාප්නුයාච්ඡීඝ්රං හත්වා රාවණමාහවේ ॥ 2 ॥
යදි වා මන්යසේ වීර වසෛකාහමරිංදම ।
කස්මිංශ්චිත්සංවෘතේ දේශේ වික්රාංතශ්ශ්වෝ ගමිෂ්යසි ॥ 3 ॥
මම චාප්යල්පභාග්යායාස්සාන්නිධ්යාත්තව වීර්යවන් ।
අස්ය ශෝකවිපාකස්ය මුහූර්තං ස්යාද්විමෝක්ෂණම් ॥ 4 ॥
ගතේ හි ත්වයි වික්රාංතේ පුනරාගමනාය වෛ ।
ප්රාණානාමපි සංදේහෝ මම ස්යාන්නාත්ර සංශයඃ ॥ 5 ॥
තවාදර්ශනජශ්ශෝකෝ භූයෝ මාං පරිතාපයේත් ।
දුඃඛාද්දුඃඛපරාභූතාං දුර්ගතාං දුඃඛභාගිනීම් ॥ 6 ॥
අයං ච වීර සංදේහස්තිෂ්ඨතීව මමාග්රතඃ ।
සුමහාංස්ත්වත්සහායේෂු හර්යෘක්ෂේෂු හරීශ්වර ॥ 7 ॥
කථං නු ඛලු දුෂ්පාරං තරිෂ්යංති මහෝදධිම් ।
තානි හර්යෘක්ෂසෛන්යානි තෞ වා නරවරාත්මජෞ ॥ 8 ॥
ත්රයාණාමේව භූතානාං සාගරස්යාස්ය ලංඝනේ ।
ශක්තිස්ස්යාද්වෛනතේයස්ය තව වා මාරුතස්ය වා ॥ 9 ॥
තදස්මින් කාර්යනිර්යෝගේ වීරෛවං දුරතික්රමේ ।
කිං පශ්යසි සමාධානං බ්රූහි කාර්යවිදාං වරඃ ॥ 10 ॥
කාමමස්ය ත්වමේවෛකඃ කාර්යස්ය පරිසාධනේ ।
පර්යාප්තඃ පරවීරඝ්න යශස්යස්තේ බලෝදයඃ ॥ 11 ॥
බලෛ ස්සමග්රෛර්යදි මාං හත්වා රාවණමාහවේ ।
විජයී ස්වාං පුරීං රාමෝ නයේත්තත්ස්යාද්යශස්කරම් ॥ 12 ॥
යථාऽහං තස්ය වීරස්ය වනාදුපධිනා හෘතා ।
රක්ෂසා තද්භයාදේව තථා නාර්හති රාඝවඃ ॥ 13 ॥
බලෛස්තු සංකුලාං කෘත්වා ලංකාං පරබලාර්දනඃ ।
මාං නයේද්යදි කාකුත්ස්ථස්තත්තස්ය සදෘශං භවේත් ॥ 14 ॥
තද්යථා තස්ය වික්රාංතමනුරූපං මහාත්මනඃ ।
භවේදාහවශූරස්ය තථා ත්වමුපපාදය ॥ 15 ॥
තදර්ථෝපහිතං වාක්යං ප්රශ්රිතං හේතුසංහිතම් ।
නිශම්යාහං තත ශ්ශේෂං වාක්යමුත්තරමබ්රුවම් ॥ 16 ॥
දේවි හර්යෘක්ෂසෛන්යානාමීශ්වරඃ ප්ලවතාං වරඃ ।
සුග්රීවස්සත්ත්වසංපන්නස්තවාර්ථේ කෘතනිශ්චයඃ ॥ 17 ॥
තස්ය වික්රමසංපන්නාස්සත්ත්වවංතෝ මහාබලාඃ ।
මන ස්සංකල්පසංපාතා නිදේශේ හරයඃ ස්ථිතාඃ ॥ 18 ॥
යේෂාං නෝපරි නාධස්තාන්න තිර්යක්සජ්ජතේ ගතිඃ ।
න ච කර්මසු සීදංති මහත්ස්වමිතතේජසඃ ॥ 19 ॥
අසකෘත්තෛර්මහාභාගෛර්වානරෛර්බලදර්පිතෛඃ ।
ප්රදක්ෂිණීකෘතා භූමිර්වායුමාර්ගානුසාරිභිඃ ॥ 20 ॥
මද්විශිෂ්ටාශ්ච තුල්යාශ්ච සංති තත්ර වනෞකසඃ ।
මත්තඃ ප්රත්යවරඃ කශ්චින්නාස්ති සුග්රීවසන්නිධෞ ॥ 21 ॥
අහං තාවදිහ ප්රාප්තඃ කිං පුනස්තේ මහාබලාඃ ।
න හි ප්රකෘෂ්ටාඃ ප්රේත්යංතේ ප්රේෂ්යංතේ හීතරේ ජනාඃ ॥ 22 ॥
තදලං පරිතාපේන දේවි මන්යුර්ව්යපෛතු තේ ।
ඒකෝත්පාතේන තේ ලංකාමේෂ්යංති හරියූථපාඃ ॥ 23 ॥
මම පෘෂ්ඨගතෞ තෞ ච චංද්රසූර්යාවිවෝදිතෞ ।
ත්වත්සකාශං මහාභාගේ නෘසිංහාවාගමිෂ්යතඃ ॥ 24 ॥
අරිඝ්නං සිංහසංකාශං ක්ෂිප්රං ද්රක්ෂ්යසි රාඝවම් ।
ලක්ෂ්මණං ච ධනුෂ්පාණිං ලංකාද්වාරමුපස්ථිතම් ॥ 25 ॥
නඛදංෂ්ට්රායුධාන් වීරාන් සිංහශාර්දූලවික්රමාන් ।
වානරාන්වාරණෝංද්රාභාන් ක්ෂිප්රං ද්රක්ෂසි සංගතාන් ॥ 26 ॥
ශෛලාංබුදනිකාශානාං ලංකාමලයසානුෂු ।
නර්දතාං කපිමුඛ්යානාමචිරාච්ඡ්රෝෂ්යසි ස්වනම් ॥ 27 ॥
නිවෘත්තවනවාසං ච ත්වයා සාර්ධමරිංදමම් ।
අභිෂික්තමයෝධ්යායාං ක්ෂිප්රං ද්රක්ෂ්යසි රාඝවම් ॥ 28 ॥
තතෝ මයා වාග්භිරදීනභාෂිණා ශිවාභිරිෂ්ටාභිරභිප්රසාදිතා ।
ජගාම ශාංතිං මම මෛථිලාත්මජා තවාපි ශෝකේන තදාභිපීඩිතා ॥ 29 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ අෂ්ටෂෂ්ටිතමස්සර්ගඃ ॥
