śrīmadvālmīkīya rāmāyaṇē sundarakāṇḍam ।
atha aṣṭaṣaṣṭitamassargaḥ ।
athāhamuttaraṃ dēvyā punarukta ssasambhramam ।
tava snēhānnaravyāghra sauhārdādanumānya vai ॥ 1 ॥
ēvaṃ bahuvidhaṃ vāchyō rāmō dāśarathistvayā ।
yathā māmāpnuyāchChīghraṃ hatvā rāvaṇamāhavē ॥ 2 ॥
yadi vā manyasē vīra vasaikāhamarindama ।
kasmiṃśchitsaṃvṛtē dēśē vikrāntaśśvō gamiṣyasi ॥ 3 ॥
mama chāpyalpabhāgyāyāssānnidhyāttava vīryavan ।
asya śōkavipākasya muhūrtaṃ syādvimōkṣaṇam ॥ 4 ॥
gatē hi tvayi vikrāntē punarāgamanāya vai ।
prāṇānāmapi sandēhō mama syānnātra saṃśayaḥ ॥ 5 ॥
tavādarśanajaśśōkō bhūyō māṃ paritāpayēt ।
duḥkhādduḥkhaparābhūtāṃ durgatāṃ duḥkhabhāginīm ॥ 6 ॥
ayaṃ cha vīra sandēhastiṣṭhatīva mamāgrataḥ ।
sumahāṃstvatsahāyēṣu haryṛkṣēṣu harīśvara ॥ 7 ॥
kathaṃ nu khalu duṣpāraṃ tariṣyanti mahōdadhim ।
tāni haryṛkṣasainyāni tau vā naravarātmajau ॥ 8 ॥
trayāṇāmēva bhūtānāṃ sāgarasyāsya laṅghanē ।
śaktissyādvainatēyasya tava vā mārutasya vā ॥ 9 ॥
tadasmin kāryaniryōgē vīraivaṃ duratikramē ।
kiṃ paśyasi samādhānaṃ brūhi kāryavidāṃ varaḥ ॥ 10 ॥
kāmamasya tvamēvaikaḥ kāryasya parisādhanē ।
paryāptaḥ paravīraghna yaśasyastē balōdayaḥ ॥ 11 ॥
balai ssamagrairyadi māṃ hatvā rāvaṇamāhavē ।
vijayī svāṃ purīṃ rāmō nayēttatsyādyaśaskaram ॥ 12 ॥
yathā'haṃ tasya vīrasya vanādupadhinā hṛtā ।
rakṣasā tadbhayādēva tathā nārhati rāghavaḥ ॥ 13 ॥
balaistu saṅkulāṃ kṛtvā laṅkāṃ parabalārdanaḥ ।
māṃ nayēdyadi kākutsthastattasya sadṛśaṃ bhavēt ॥ 14 ॥
tadyathā tasya vikrāntamanurūpaṃ mahātmanaḥ ।
bhavēdāhavaśūrasya tathā tvamupapādaya ॥ 15 ॥
tadarthōpahitaṃ vākyaṃ praśritaṃ hētusaṃhitam ।
niśamyāhaṃ tata śśēṣaṃ vākyamuttaramabruvam ॥ 16 ॥
dēvi haryṛkṣasainyānāmīśvaraḥ plavatāṃ varaḥ ।
sugrīvassattvasampannastavārthē kṛtaniśchayaḥ ॥ 17 ॥
tasya vikramasampannāssattvavantō mahābalāḥ ।
mana ssaṅkalpasampātā nidēśē harayaḥ sthitāḥ ॥ 18 ॥
yēṣāṃ nōpari nādhastānna tiryaksajjatē gatiḥ ।
na cha karmasu sīdanti mahatsvamitatējasaḥ ॥ 19 ॥
asakṛttairmahābhāgairvānarairbaladarpitaiḥ ।
pradakṣiṇīkṛtā bhūmirvāyumārgānusāribhiḥ ॥ 20 ॥
madviśiṣṭāścha tulyāścha santi tatra vanaukasaḥ ।
mattaḥ pratyavaraḥ kaśchinnāsti sugrīvasannidhau ॥ 21 ॥
ahaṃ tāvadiha prāptaḥ kiṃ punastē mahābalāḥ ।
na hi prakṛṣṭāḥ prētyantē prēṣyantē hītarē janāḥ ॥ 22 ॥
tadalaṃ paritāpēna dēvi manyurvyapaitu tē ।
ēkōtpātēna tē laṅkāmēṣyanti hariyūthapāḥ ॥ 23 ॥
mama pṛṣṭhagatau tau cha chandrasūryāvivōditau ।
tvatsakāśaṃ mahābhāgē nṛsiṃhāvāgamiṣyataḥ ॥ 24 ॥
arighnaṃ siṃhasaṅkāśaṃ kṣipraṃ drakṣyasi rāghavam ।
lakṣmaṇaṃ cha dhanuṣpāṇiṃ laṅkādvāramupasthitam ॥ 25 ॥
nakhadaṃṣṭrāyudhān vīrān siṃhaśārdūlavikramān ।
vānarānvāraṇōndrābhān kṣipraṃ drakṣasi saṅgatān ॥ 26 ॥
śailāmbudanikāśānāṃ laṅkāmalayasānuṣu ।
nardatāṃ kapimukhyānāmachirāchChrōṣyasi svanam ॥ 27 ॥
nivṛttavanavāsaṃ cha tvayā sārdhamarindamam ।
abhiṣiktamayōdhyāyāṃ kṣipraṃ drakṣyasi rāghavam ॥ 28 ॥
tatō mayā vāgbhiradīnabhāṣiṇā śivābhiriṣṭābhirabhiprasāditā ।
jagāma śāntiṃ mama maithilātmajā tavāpi śōkēna tadābhipīḍitā ॥ 29 ॥
ityārṣē śrīmadrāmāyaṇē vālmīkīya ādikāvyē sundarakāṇḍē aṣṭaṣaṣṭitamassargaḥ ॥
