શ્રીમદ્વાલ્મીકીય રામાયણે સુંદરકાંડમ્ ।
અથ અષ્ટષષ્ટિતમસ્સર્ગઃ ।
અથાહમુત્તરં દેવ્યા પુનરુક્ત સ્સસંભ્રમમ્ ।
તવ સ્નેહાન્નરવ્યાઘ્ર સૌહાર્દાદનુમાન્ય વૈ ॥ 1 ॥
એવં બહુવિધં વાચ્યો રામો દાશરથિસ્ત્વયા ।
યથા મામાપ્નુયાચ્છીઘ્રં હત્વા રાવણમાહવે ॥ 2 ॥
યદિ વા મન્યસે વીર વસૈકાહમરિંદમ ।
કસ્મિંશ્ચિત્સંવૃતે દેશે વિક્રાંતશ્શ્વો ગમિષ્યસિ ॥ 3 ॥
મમ ચાપ્યલ્પભાગ્યાયાસ્સાન્નિધ્યાત્તવ વીર્યવન્ ।
અસ્ય શોકવિપાકસ્ય મુહૂર્તં સ્યાદ્વિમોક્ષણમ્ ॥ 4 ॥
ગતે હિ ત્વયિ વિક્રાંતે પુનરાગમનાય વૈ ।
પ્રાણાનામપિ સંદેહો મમ સ્યાન્નાત્ર સંશયઃ ॥ 5 ॥
તવાદર્શનજશ્શોકો ભૂયો માં પરિતાપયેત્ ।
દુઃખાદ્દુઃખપરાભૂતાં દુર્ગતાં દુઃખભાગિનીમ્ ॥ 6 ॥
અયં ચ વીર સંદેહસ્તિષ્ઠતીવ મમાગ્રતઃ ।
સુમહાંસ્ત્વત્સહાયેષુ હર્યૃક્ષેષુ હરીશ્વર ॥ 7 ॥
કથં નુ ખલુ દુષ્પારં તરિષ્યંતિ મહોદધિમ્ ।
તાનિ હર્યૃક્ષસૈન્યાનિ તૌ વા નરવરાત્મજૌ ॥ 8 ॥
ત્રયાણામેવ ભૂતાનાં સાગરસ્યાસ્ય લંઘને ।
શક્તિસ્સ્યાદ્વૈનતેયસ્ય તવ વા મારુતસ્ય વા ॥ 9 ॥
તદસ્મિન્ કાર્યનિર્યોગે વીરૈવં દુરતિક્રમે ।
કિં પશ્યસિ સમાધાનં બ્રૂહિ કાર્યવિદાં વરઃ ॥ 10 ॥
કામમસ્ય ત્વમેવૈકઃ કાર્યસ્ય પરિસાધને ।
પર્યાપ્તઃ પરવીરઘ્ન યશસ્યસ્તે બલોદયઃ ॥ 11 ॥
બલૈ સ્સમગ્રૈર્યદિ માં હત્વા રાવણમાહવે ।
વિજયી સ્વાં પુરીં રામો નયેત્તત્સ્યાદ્યશસ્કરમ્ ॥ 12 ॥
યથાઽહં તસ્ય વીરસ્ય વનાદુપધિના હૃતા ।
રક્ષસા તદ્ભયાદેવ તથા નાર્હતિ રાઘવઃ ॥ 13 ॥
બલૈસ્તુ સંકુલાં કૃત્વા લંકાં પરબલાર્દનઃ ।
માં નયેદ્યદિ કાકુત્સ્થસ્તત્તસ્ય સદૃશં ભવેત્ ॥ 14 ॥
તદ્યથા તસ્ય વિક્રાંતમનુરૂપં મહાત્મનઃ ।
ભવેદાહવશૂરસ્ય તથા ત્વમુપપાદય ॥ 15 ॥
તદર્થોપહિતં વાક્યં પ્રશ્રિતં હેતુસંહિતમ્ ।
નિશમ્યાહં તત શ્શેષં વાક્યમુત્તરમબ્રુવમ્ ॥ 16 ॥
દેવિ હર્યૃક્ષસૈન્યાનામીશ્વરઃ પ્લવતાં વરઃ ।
સુગ્રીવસ્સત્ત્વસંપન્નસ્તવાર્થે કૃતનિશ્ચયઃ ॥ 17 ॥
તસ્ય વિક્રમસંપન્નાસ્સત્ત્વવંતો મહાબલાઃ ।
મન સ્સંકલ્પસંપાતા નિદેશે હરયઃ સ્થિતાઃ ॥ 18 ॥
યેષાં નોપરિ નાધસ્તાન્ન તિર્યક્સજ્જતે ગતિઃ ।
ન ચ કર્મસુ સીદંતિ મહત્સ્વમિતતેજસઃ ॥ 19 ॥
અસકૃત્તૈર્મહાભાગૈર્વાનરૈર્બલદર્પિતૈઃ ।
પ્રદક્ષિણીકૃતા ભૂમિર્વાયુમાર્ગાનુસારિભિઃ ॥ 20 ॥
મદ્વિશિષ્ટાશ્ચ તુલ્યાશ્ચ સંતિ તત્ર વનૌકસઃ ।
મત્તઃ પ્રત્યવરઃ કશ્ચિન્નાસ્તિ સુગ્રીવસન્નિધૌ ॥ 21 ॥
અહં તાવદિહ પ્રાપ્તઃ કિં પુનસ્તે મહાબલાઃ ।
ન હિ પ્રકૃષ્ટાઃ પ્રેત્યંતે પ્રેષ્યંતે હીતરે જનાઃ ॥ 22 ॥
તદલં પરિતાપેન દેવિ મન્યુર્વ્યપૈતુ તે ।
એકોત્પાતેન તે લંકામેષ્યંતિ હરિયૂથપાઃ ॥ 23 ॥
મમ પૃષ્ઠગતૌ તૌ ચ ચંદ્રસૂર્યાવિવોદિતૌ ।
ત્વત્સકાશં મહાભાગે નૃસિંહાવાગમિષ્યતઃ ॥ 24 ॥
અરિઘ્નં સિંહસંકાશં ક્ષિપ્રં દ્રક્ષ્યસિ રાઘવમ્ ।
લક્ષ્મણં ચ ધનુષ્પાણિં લંકાદ્વારમુપસ્થિતમ્ ॥ 25 ॥
નખદંષ્ટ્રાયુધાન્ વીરાન્ સિંહશાર્દૂલવિક્રમાન્ ।
વાનરાન્વારણોંદ્રાભાન્ ક્ષિપ્રં દ્રક્ષસિ સંગતાન્ ॥ 26 ॥
શૈલાંબુદનિકાશાનાં લંકામલયસાનુષુ ।
નર્દતાં કપિમુખ્યાનામચિરાચ્છ્રોષ્યસિ સ્વનમ્ ॥ 27 ॥
નિવૃત્તવનવાસં ચ ત્વયા સાર્ધમરિંદમમ્ ।
અભિષિક્તમયોધ્યાયાં ક્ષિપ્રં દ્રક્ષ્યસિ રાઘવમ્ ॥ 28 ॥
તતો મયા વાગ્ભિરદીનભાષિણા શિવાભિરિષ્ટાભિરભિપ્રસાદિતા ।
જગામ શાંતિં મમ મૈથિલાત્મજા તવાપિ શોકેન તદાભિપીડિતા ॥ 29 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે સુંદરકાંડે અષ્ટષષ્ટિતમસ્સર્ગઃ ॥
